Disanka diende divua mu mikenji ya Yehowa

ALBERT SCHROEDER, umue wa bena mu Kasumbu Kaludiki ka Bantemu ba Yehowa, mmufue mu Disatu dia 8 ngondo muisatu 2006. Uvua ne bidimu 94 ne uvua muenze bidimu bipite pa 73 mu mudimu wa ku dîba ne ku dîba.

Muanetu Schroeder uvua muledibue mu 1911, mu tshimenga tshia Saginaw mu Michigan, mu ditunga dia États-Unis. * Patshivuaye muana, kakuende muntu mukaji (muledi wa mamuende) wakamulongesha malu a bungi a mu Bible, ne wakamusaka bua kunanga dibala Dîyi dia Yehowa. Wakalonga muakulu wa Latin ne tshiena-Allemagne ne malu a nzembu ku iniversite wa Michigan. Kadi pakavula dinanga diende dia Dîyi dia Nzambi, wakakosa tulasa tuende ne kuluaye mumanyishi wa Bukalenge wa ku dîba ne ku dîba. Mu 1932 wakabuela mu dîku dia Betele wa ku Brooklyn, mu New York.

Mu 1937, patshivua Muanetu Schroeder ne bidimu 26, bakamutuma bua kulombola mudimu wa Bantemu ba Yehowa mu Grande-Bretagne. Lukunukunu luvuaye nalu mu mudimu wa kuyisha luakasaka bantu ba bungi ba mu ditunga adi bua kuangata mudimu wa ku dîba ne ku dîba. Umue wa ku bansongalume bavuaye muenze nabu mudimu ku Betele wa ku Londres uvua John Barr. Bakalua kuenza kabidi mudimu pamue mu Kasumbu Kaludiki munkatshi mua bidimu bia bungi.

Bantu bonso bakamona mudimu uvua Muanetu Schroeder muenze bua Bantemu ba Yehowa mu tshikondo tshia mvita kabavua bawanyishe nansha. Nunku mu ngondo wa 8 mu 1942, bakamuipata mu Grande-Bretagne. Panyima pa luendu lua lutatu lukole mu Mbuu wa Atlantike munkatshi mua mvita, wakafika ku Brooklyn mu ngondo wa 9.

Tshikondo atshi, basadidi ba Yehowa bakavua bamone ne: nekuikale mudimu munene wa kuenza panyima pa Mvita Mibidi ya Buloba bujima. Muanetu Schroeder wakakema bikole ne wakasanka pakamanyaye mudimu mupiamupia uvuabu bamupeshe: kuambuluisha bua kulongolola malu a kulongesha mu Tshilongelu tshia Bible tshia Gilada. Munkatshi mua bidimu bia bungi, wakalongesha bamisionere mu tshilongelu atshi. Balongi bavuaye mulongeshe mu Gilada ne pashishe mu Kalasa ka Mudimu wa Bukalenge batu bavuluka ne disanka malu avuaye mubalongeshe. Uvua usanka bikole bua kusaka balongi bende bua kunanga mikenji ya Nzambi, ne uvua ushindamena pa mushinga wa kumanya Yehowa.

Mu 1956, Muanetu Schroeder wakasela Charlotte Bowin, ne mu 1958 bakalela muana wa balume, Judah Ben. Muanetu Schroeder uvua mulume muimpe ne tatu muimpe. Mu 1974 wakatuadija kuenza mudimu mu Kasumbu Kaludiki, muvuabu banyisha bikole dijingulula diende dia malu. Uvua muntu muimpe wa budipuekeshi uvua musue nangananga kutumbisha dîna dinene dia Nzambi. Tudi bashindike ne: Muanetu Schroeder mmupete difutu diende mu diulu bualu uvua muena Kristo muela manyi uvua bushuwa ne ‘disanka diende mu mikenji ya Yehowa.’​—Musambu 1:2.

[Mêyi adi kuinshi]