‘Wakatuenzeja ne disengelela’ dionso

BANTU ba bungi ba mu matunga a ku Asie batu bende lumu bua diakidila dia benyi. Tshilejilu, mu ditunga dia Inde, bena dîku kampanda dijima badi nansha mua kuitaba bua kulala ne nzala bua kumona mua kudisha muenyi wa tshimpitshimpi. Bamamu bavule ba mu ditunga dia Iran batu misangu yonso balama biakudia mu frigo bua kumona mua kuakidila nabi benyi bavua mua kubakuata mu tshimpitshimpi.

Bantu ba bungi badibu batele mu Bible bavua pabu ne lungenyi lua kalolo lua mushindu eu. Tshilejilu tshia dikema tshia bualu ebu ntshia Ludia wa ku Filipoi (tshimenga tshinene tshia mu Makedonia), mukaji wa mu bisamba bia bende uvua muitabuje malongesha a bena Yuda. Dituku kampanda dia nsabatu, mupostolo Paulo ne binende bavuaye nabu mu luendu bakapeta Ludia ne bakaji bakuabu bunguile ku muelelu wa musulu pambelu pa tshimenga tshia Filipoi. Pakabanga Paulo kubayisha musangu au, Yehowa wakabulula mutshima wa Ludia. Mukaji au kutambulaye pamue ne ba mu nzubu muende. Pashishe yeye kusengelela Paulo ne bena diende ne: ‘Binuajingulula ne: meme ndi muena ditabuja mulelela wa Mukalenge, nulue mu nzubu muanyi.’ Luka uvua muye ne Paulo mu luendu alu udi uleja ne: ‘Wakatuenzeja ne disengelela’ dionso bua tuye kuende.​—Bienzedi 16:11-15.

Anu bu muakenza Ludia, lelu eu bena Kristo batu bakidila bena Kristo nabu ku mabu, bu mudi batangidi bena ngendu ne bakaji babu. Batu pabu ‘babasengelela’ bua bafikaku ku mabu. Bobu badi bakidilangana aba batu pabu basanka bua disomba ne bena Kristo nabu abu ne bua malu adi abakolesha atubu bayikila nabu. Nansha mudi Bantemu ba Yehowa ba bungi bikale ne dimona dishadile, batu anu ‘basankidila benyi misangu yonso.’ (Lomo 12:13; Ebelu 13:2) Muoyo wabu wa kupangana bintu utu ubavuija bena disanka. Yezu uvua muambilamu pakambaye ne: ‘Kupa kudi kutamba kuangata kusankisha muntu.’​—Bienzedi 20:35.