Udi ‘mulami muimpe wa bulenga bua Nzambi’ anyi?

‘Mu dinanga dia bana benu ba mu Kristo nunangangane, muntu ne muntu; mu buneme muntu ne muntu ateke mukuabu kumpala.’​—LOMO 12:10.

1. Ndishindika kayi ditudi tupeta mu Dîyi dia Nzambi?

DÎYI DIA NZAMBI didi dituambila misangu ne misangu ne: Yehowa neatukuatshishe patudi batekete anyi mu ntatu. Tshilejilu didi ditukolesha ku muoyo padidi diamba ne: ‘Yehowa udi wimanyika bonso badi bamba kupona, udi ubisha bonso badi biname panshi.’ ‘Udi ukolesha badi ne mitshima minyingalale, udi ujingila bilulu pa mputa yabu.’ (Mus. 145:14; 147:3) Pashishe Tatuetu wa mu diulu yeye nkayende udi wamba ne: ‘Meme Yehowa Nzambi webe nenkukuate ku tshianza tshiebe tshia balume, nkuambila ne: Kutshinyi, nenkukuatshishe.’​—Yesh. 41:13.

2. Mmunyi mudi Yehowa ukuatshisha basadidi bende?

² Kadi mmunyi mudi Yehowa udi musombele mu diulu mua ‘kutukuata ku tshianza’? Mmunyi mudiye ‘utubisha patudi biname panshi’ bua tunyinganyinga? Yehowa Nzambi udi utuambuluisha mu mishindu ya bungi. Tshilejilu, udi upesha bantu bende ‘bukole butambe’ bua bantu ku diambuluisha dia nyuma wende. (2 Kol. 4:7; Yone 14:16, 17) Basadidi ba Nzambi badi bapeta kabidi bukole ku diambuluisha dia mibelu idibu babala mu Bible. (Eb. 4:12) Kudiku mushindu mukuabu udi Yehowa utukolesha anyi? Mukanda wa kumpala wa Petelo udi wandamuna lukonko elu.

‘Bulenga buvulangane bua Nzambi’

3. (a) Ntshinyi tshidi mupostolo Petelo wamba bua ntatu? (b) Tshitupa tshia ndekelu tshia mukanda wa Petelo wa kumpala tshidi tshiakula bua tshinyi?

³ Petelo wakambila bena Kristo nende bela manyi ne: bavua ne bua kuikala ne disanka bualu difutu dinene divua dibindile. Wakabambila kabidi ne: ‘Nutambe kusanka nansha bikalaku bualu bua nuenu kunyingalajibua tshitupa tshipi mu mateta a mishindu ya bungi.’ (1 Pet. 1:1-6) Petelo udi wakula bua “mishindu ya bungi” bua kuleja ne: mateta adi alua mu mishindu mishilangane. Kadi kakashiya bana babu mu dielakana bua kumanya ni bavua mua kutantamena mateta mashilangane aa to. Wakabaleja ne: Yehowa neabambuluishe bua kuatantamena onso nansha wowu a mushindu kayi. Petelo udi ubashindikila bualu ebu ku ndekelu kua mukanda wende kudiye wakula bua malu a ‘ku nshikidilu kua malu onso.’​—1 Pet. 4:7.

4. Bua tshinyi mêyi adi mu 1 Petelo 4:10 adi atukolesha ku muoyo?

⁴ Petelo udi wamba ne: ‘Bu muakangata muntu ne muntu tshipedi, nukuatshishangane natshi munkatshi muenu bu balami bimpe ba ngasa muvulangane wa Nzambi.’ (1 Pet. 4:10) Mu tshiena Greke, padi Petelo wakula bua “muvulangane” mu mvese eu udi wakula bua muaku wa muomumue ne “mishindu ya bungi.” Mmusue kuamba ne: ‘Mateta adi alua mu mishindu mishilangane, kadi Nzambi pende udi utupesha ngasa anyi bulenga buende mu mishindu mishilangane.’ Bua tshinyi mêyi aa adi atukolesha ku muoyo? Adi atuleja ne: nansha tuetu bapete lutatu lua mushindu kayi, Nzambi udi ne mishindu ya bungi yatuambuluishaye bua tuetu kulupita bukole. Kadi bilondeshile mêyi a Petelo aa, Yehowa udi utuleja bulenga buende ku diambuluisha dia nganyi? Ku diambuluisha dia bena Kristo netu.

“Nukuatshishangane”

5. (a) Muena Kristo yonso udi ne bua kuenza tshinyi? (b) Nkonko kayi itudi mua kudiela?

⁵ Petelo udi wambila bena mu tshisumbu  bonso ne: “Ku mutu kua malu onso nuikalangane ne dinanga dikole munkatshi muenu.” Pashishe udi ubambila kabidi ne: ‘Bu muakangata muntu ne muntu tshipedi, nukuatshishangane natshi munkatshi muenu.’ (1 Pet. 4:8, 10) Nunku, muena mu tshisumbu yonso udi ne tshidiye mua kuenza bua kukolesha bena Kristo nende. Yehowa mmupeshe muntu ne muntu tshintu tshia mushinga ne tuetu petu tudi ne dibanza dia kutshiabanyangana ne bakuabu. Kadi ntshinyi tshidiye mutupeshe? Petelo udi wamba ne: ‘Ntshipedi.’ Ntshipedi kayi atshi? Mmunyi mutudi ‘tukuatshishangana natshi’?

6. Tela bimue bintu bidi Nzambi mupeshe bena Kristo.

⁶ Dîyi dia Nzambi didi diamba ne: ‘Kupa kuonso kuimpe ne dipa dionso diakane tshishiki bidi bifuma mu diulu.’ (Yak. 1:17) Bushuwa, Yehowa udi upesha bantu bende bintu bionso bimpe bidibu nabi anu bua bulenga buende. Dipa ditambe bunene didiye mutupesha ke nyuma wende. Nyuma eu udi utuambuluisha bua kuikala ne ngikadilu itu nayi Nzambi bu mudi dinanga, bulenga ne lutulu. Ngikadilu eyi idi itusaka bua kunanga bena Kristo netu ne kubambuluisha ne muoyo mujima. Ku bintu bimpe bidi nyuma muimpe utupetesha kudi kabidi meji a mu diulu ne dimanya dilelela. (1 Kol. 2:10-16; Gal. 5:22, 23) Nunku, tudi ne bua kuenza mudimu ne bukole buetu, meji etu ne dimanya ditudi nadi bua kutumbisha ne kunemeka Tatu wetu wa mu diulu. Nzambi mmutuele dibanza dia kuenza mudimu ne dimanya dietu ne ngikadilu yetu bua kuleja bena Kristo netu bulenga budi kabuyi butuakanyine bua Nzambi.

Mmunyi ‘mutudi mua kukuatshishangana natshi’?

7. (a) Tshiambilu tshia ‘bu muakangata muntu ne muntu’ tshidi tshiumvuija tshinyi? (b) Nkonko kayi itudi mua kudiela, ne bua tshinyi?

⁷ Petelo udi wamba bua bipedi bitudi bapete ne: ‘bu muakangata muntu ne muntu tshipedi, nukuatshishangane natshi.’ Padi Petelo wamba ne: “bu muakangata muntu ne muntu,” bidi bisua kuleja ne: bantu badi mua kuikala ne ngikadilu mishilangane ne kuikala kabidi ne meji bungi bushilangane. Nansha nanku, muntu yonso udi ne bua ‘kukuatshishangana natshi,’ tuamba ne: tshipedi kampanda tshidiye mupete. Pashishe, tshiambilu tshia ne: ‘nukuatshishangane natshi bu balami bimpe’ mmukenji udibu batuelele. Nunku tudiebeje ne: ‘Ntuku nkolesha bena Kristo nanyi ne bipedi bindi mupete anyi?’ (Tangila 1 Timote 5:9, 10.) ‘Peshi ntu ngenza mudimu ne bukole ne meji adi Nzambi mumpeshe anu bua  diakalenga dianyi, pamuapa bua kulua mubanji anyi kupeta lumu anyi?’ (1 Kol. 4:7) Patudi ‘tukuatshishangana’ ne bipedi bidi Yehowa mutupeshe, tudi tumusankisha.​—Nsu. 19:17; bala Ebelu 13:16.

8, 9. (a) Ngimue mishindu kayi idi bena Kristo ba pa buloba bujima bakuatshishangana? (b) Mmalu kayi anutu nuenza mu tshisumbu tshienu bua kuambuluishangana?

⁸ Dîyi dia Nzambi didi diakula bua mishindu mishilangane ivua bena Kristo ba kumpala bambuluishangana. (Bala Lomo 15:25, 26; 2 Timote 1:16-18.) Bia muomumue lelu, bena Kristo balelela badi batumikila pabu mukenji wa kukuatshishanga ne bipedi bidibu bapete. Tumonayi imue mishindu itudi tukuatshishangana.

⁹ Bana betu ba bungi batu balonga munkatshi mua mêba mavule bua kulongolola bisangilu. Padibu bakula mu bisangilu bua malu avuabu bapete pavuabu badilongela Bible, mibelu yabu idi ikolesha bena mu tshisumbu bonso bua kutantamena ntatu. (1 Tim. 5:17) Bakuabu ba bungi batu pabu bamanyike bua musangelu ne luse lutubu bumvuila bena Kristo nabu. (Lomo 12:15) Bamue batu ne tshibidilu tshia kuya kusamba badi mu ntatu mikole ne kubalombela Nzambi. (1 Tes. 5:14) Bakuabu batu bafundila bena Kristo nabu badi mu lutatu kampanda mêyi a kubakankamika nawu. Banga pabu batu bambuluisha balema anyi bantu badi basama bua kuya mu bisangilu. Bantemu ba bungi mbadifile mu mudimu wa kuambuluisha bana betu badi bikumina kampanda binyangile nzubu yabu. Dinanga ne diambuluisha didi bana betu aba bambuluisha bena Kristo nabu bidi bileja bonso buabi bulenga anyi ‘ngasa muvulangane wa Nzambi.’​—Bala 1 Petelo 4:11.

Ntshinyi tshidi ne mushinga wa bungi?

10. (a) Paulo uvua mumanye ne: Nzambi uvua mumupeshe midimu ibidi kayi? (b) Tudi mua kuenza tshinyi bua kumuidikija?

¹⁰ Nzambi ki mmupeshe basadidi bende anu bipedi bua kuambuluisha nabi bena Kristo nabu to, kadi mmubapeshe kabidi mukenji udibu ne bua kuambila bantu bakuabu. Mupostolo Paulo wakitaba mishindu ibidi ya mudimu uvua Yehowa mumupesha eyi. Wakafundila bena mu tshisumbu tshia mu Efeso ubambila bua bulenga anyi ‘diabanyangana dia ngasa wa Nzambi’ wakamupabu bua bualu buabu. (Ef. 3:2) Kadi wakamba kabidi ne: ‘Nzambi wakatujadika bua kutekaye lumu luimpe mu bianza bietu.’ (1 Tes. 2:4) Anu bu Paulo, tuetu petu tudi bamanye ne: Nzambi mmutupeshe mudimu wa kumanyisha lumu luimpe lua Bukalenge buende. Patudi tuyisha ne tshisumi, tudi tuidikija Paulo uvua muyishi wa lumu luimpe uvua kayi utshioka. (Bien. 20:20, 21; 1 Kol. 11:1) Tudi bamanye ne: kuyisha Bukalenge bua Nzambi kudi mua kusungila bantu. Kadi tudi tudienzeja bua kuidikija Paulo patudi tukeba mishindu ya ‘kupesha’ bena Kristo netu ‘kupa kukuabu kua nyuma.’​—Bala Lomo 1:11, 12; 10:13-15.

11. Mmunyi mutudi ne bua kumona mudimu wetu wa kuyisha ne wa kukolesha bena Kristo netu?

¹¹ Ku midimu ibidi eyi, nguepi udi mutambe mukuabu? Padi muntu wela lukonko lua mushindu eu, mmuenze anu bu udi ukonka ne: ku mapuapua abidi a nyunyi, ndiepi didi dipite dikuabu? Tudi bamanye diandamuna bimpe. Bua nyunyi kubuka bimpe, udi ne bua kuikala ne mapuapua onso abidi. Bia muomumue, bua tuetu kuikala bena Kristo balelela, tudi ne bua kuenza midimu yonso ibidi idi Nzambi mutupeshe. Nunku, pamutu pa tuetu kumona mudimu wa kuyisha lumu luimpe ne wa kukolesha bena Kristo netu bu midimu idi kayiyi ipetangana, tudi ne bua kuyangata bu midimu idi ikumbajangana anu bu muvua mupostolo Petelo ne Paulo bayangata. Mu mushindu kayi?

12. Ntshinyi tshitudi ne bua kuenza bua kuikala bantu badi Yehowa wenza nabu mudimu?

¹² Tuetu bambi ba lumu luimpe, tudi ne bua kudienzeja bua kulenga mitshima ya bantu patudi tubambila lumu luimpe lua Bukalenge bua Nzambi ludi lukolesha bantu ku muoyo. Dîba adi, tudi tubambuluisha bua kulua bayidi ba Kristo. Pashishe tudi ne bua kuenza mudimu ne meji ne bipedi bikuabu bidi Nzambi mutupeshe bua kukolesha bena Kristo netu  mu mêyi ne bienzedi bietu bua kubaleja bulenga bua Nzambi. (Nsu. 3:27; 12:25) Nunku, tudi tubambuluisha bua kutungunuka ne kuikala anu bayidi ba Kristo. Patudi tuyisha lumu luimpe ne ‘tukuatshishangana’ ne bena Kristo netu, tudi ne diakalenga dinene dia kuikala bantu badi Yehowa wenza nabu mudimu.​—Gal. 6:10.

“Nunangangane”

13. Ntshinyi tshidi mua kutuenzekela patudi katuyi ‘tukuatshishangana’?

¹³ Paulo wakabela bena Kristo nende ne: ‘Mu dinanga dia bana benu ba mu Kristo nunangangane muntu ne muntu; mu buneme muntu ne muntu ateke mukuabu kumpala.’ (Lomo 12:10) Nunku kunanga bana betu kudi kutusaka bua kubenzela mudimu bu balami ba bulenga budi kabuyi butuakanyine bua Nzambi. Tumanye ne: Satana yeye mutufikishe ku dibenga ‘kukuatshishangana,’ udi utufikisha ku dipanduluka. (Kolos. 3:14) Nunku patudi katuyi mu buobumue, katuena mua kuyisha ne tshisumi to. Satana mmumanye bimpe ne: yeye mutupangishe bua kuenza umue wa ku midimu ibidi idi Nzambi mutupeshe, netukuluke anu bu mutubi bienzeka padibu batshibula dipuapua dia nyunyi.

14. Nganyi udi ‘kukuatshishanga’ kuambuluisha? Fila tshilejilu.

¹⁴ ‘Kukuatshishanga’ kakuena kuambuluisha anu bantu badi bapeta bulenga bua Nzambi to, kadi kudi kuambuluisha kabidi badi babupeshangana. (Nsu. 11:25) Tuangate tshilejilu tshia Ryan ne mukajende Roni ba mu Illinois, mu États-Unis. Pakumvuabu ne: tshipepele tshikole tshivuabu babikila ne: Katrina tshivua tshinyange nzubu mipite bungi ya Bantemu nabu, dinanga diakabasaka bua kulekela midimu yabu, kupana nzubu wabu ne kusumba kamashinyi kadi ne ka kontenere panyima, kuvuijabu ka kontenere bu kazubu ne kuenzabu luendu lua kilometre 1 400 bua kuya mu tshimenga tshia Louisiane. Bakenza tshidimu tshijima ne matuku mu Louisiane bua kuambuluisha bana babu ne dîba diabu, bukole buabu ne makuta abu. Ryan udi ne bidimu 29 udi wamba ne: “Kuenza mudimu eu nkungambuluishe bua kusemena pabuipi ne Nzambi. Ndi mudimuene mudi Yehowa ulama bantu bende.” Udi wamba kabidi ne: “Kuenza mudimu ne bana betu bakadi bashindame nkundongeshe mushindu wa kuditatshisha bua bana betu. Ndi mufike ku dimona kabidi ne: tuetu bansonga tudi ne bia bungi bia kuenza mu bulongolodi bua Yehowa.” Mukajende Roni udi  ne bidimu 25 udi wamba ne: “Ndi ne disanka dia bungi bua mundi muenze panyi mudimu wa kuambuluisha bana betu. Katshia bandela tshitu muanji kumvua disanka dia mushindu eu to. Ndi mumanye ne: mu bidimu bidi kumpala eku, nentungunuke anu ne kupeta masanka bua mudimu muimpe eu.”

15. Mmalu kayi adi atusaka bua kutungunuka ne kuambuluisha bana betu bu balami ba bulenga budi kabuyi butuakanyine bua Nzambi?

¹⁵ Bushuwa, kutumikila mukenji wa Nzambi wa kuyisha lumu luimpe ne wa kukolesha bena Kristo netu kudi kutupetesha tuetu bonso masanka. Bantu batudi tuambuluisha badi bapeta bukole bua kutungunuka ne kuenzela Yehowa mudimu, ne tuetu petu tudi tupeta disanka didi muntu mua kupeta anu padiye upesha bantu bakuabu bintu. (Bien. 20:35) Padi muntu yonso uditatshisha bua bena kuitabuja nende, bena mu tshisumbu bonso badi bapeta disanka dia bungi. Pashishe patudi tunangangana, tudi tuleja patoke mutudi bena Kristo balelela. Yezu wakamba ne: ‘Bua bualu ebu bantu bonso nebamanye ne: Nudi bayidi banyi, binuasuangana nunku.’ (Yone 13:35) Ndekelu wa bionso, butumbi budi buya kudi Tatu wetu wa dinanga Yehowa bualu dijinga diende dia kukolesha bantu badi mu ntatu didi dimuenekela kudi basadidi bende badi pa buloba. Nunku, tudi ne bua kuenza mudimu ne tshipedi tshidi Nzambi mutupeshe bua ‘kukuatshishangana natshi munkatshi muetu bu balami bimpe ba ngasa muvulangane wa Nzambi.’ Neutungunuke ne kuenza nanku anyi?​—Bala Ebelu 6:10.

Udi muvuluke anyi?

• Mmu mishindu kayi idi Yehowa ukolesha basadidi bende?

• Ntshinyi tshidi Yehowa mutupeshe?

• Mmu imue mishindu kayi itudi mua kuambuluisha bena Kristo netu?

• Ntshinyi tshiatusaka bua kutungunuka ne ‘kukuatshishangana’ ne tshipedi tshietu?

[Nkonko ya dilonga]

[Bimfuanyi mu dibeji 13]

Utuku wambuluisha bakuabu ne ‘tshipedi’ tshiudi mupete anyi utu ukeba anu kudisankisha?

[Bimfuanyi mu dibeji 15]

Tudi tuyisha lumu luimpe ne tuambuluisha bena Kristo netu

[Tshimfuanyi mu dibeji 16]

Bana betu badi benza mudimu wa kuambuluisha badi bajimije nzubu ne bintu biabu mba kuela kalumbadi bua didifila diabu