Tshibumba tshia Nsentedi tshiapiatshipia mu Anglais mipepeja

TUDI ne disanka dia kupatula Tshibumba tshia Nsentedi tshia kumpala mu Anglais mipepeja. Netutete bua kuanji kupatula tshibejibeji tshipiatshipia etshi ku ngondo yonso munda mua tshidimu tshijima, tuetu bamone ne: tshidi tshiambuluisha bantu netutungunuke ne kutshipatula. Bisumbu nebikale bitshipeta diatshimue ne Tshibumba tshia Nsentedi tshitutu tulonga konso eku.

Bidi ne mushinga bua muntu yonso ikale umvua bimpe malu atudi tulonga mu Tshibumba tshia Nsentedi lumingu luonso, bualu dilonga dia Tshibumba tshia Nsentedi ke mushindu udi ‘mupika wa lulamatu ne wa budimu’ ulongesha bantu ba Nzambi lelu. (Matayo 24:45) Kadi bua tshinyi Tshibumba tshia Nsentedi tshia mu Anglais mipepeja etshi tshidi ne mushinga?

Bana betu ba bungi pa buloba bujima batu babuela mu bisangilu bia mu Anglais, kadi kabatu bumvua Anglais idibu bafunda mu Tshibumba tshia Nsentedi to. Kudi malu a bungi adi afikisha ku bualu ebu. Tshilejilu batu bakula Anglais mu matunga a bungi a mu Afrique, mu Asie ne mu bidîla bidi ku Sud kua Mbuu wa Pacifique. Bana betu badi miaba eyi batu bakula Anglais mu bisangilu ne mu buambi, kadi pamuapa bakula miakulu mikuabu kumbelu. Kabidi, Anglais itubu bakula mu matunga au idi mua kuikala mishilangane ne Anglais idibu bafunde mu Tshibumba tshia Nsentedi tshitutu tulonga konso eku. Bamue bana betu mbena tshimuanyi badi basombele mu matunga mudibu babuela mu bisangilu anu bia mu Anglais. Bidi mua kubakolela bua kumvua malu adi mu Tshibumba tshia Nsentedi bualu Anglais ki mmuakulu wabu wa ku dibele to. Bamue bana badi bakole ne muakulu wa Anglais kabatu bumvua anu malu onso adi mu Tshibumba tshia Nsentedi tshitutu tulonga to. Tshibejibeji tshia mu Anglais mipepeja netshiambuluishe bana betu ba bungi ba pa buloba bujima bua kumvua bimpe malu atudi tulonga muTshibumba tshia Nsentedi.

Nansha mudibu bafunde tshibejibeji etshi mu Anglais mipepeja mishilangane ne idi mu tshibejibeji tshia konso eku, bionso bibidi nebikale bilongesha malu amue a mu Bible. Bionso bibidi nebikale ne bikoso, nkonko, bimfuanyi ne nkonko ya diambulula ya mumue. Nunku, muntu yonso udi mua kusungula tshibejibeji tshidiye musue kukuata natshi mudimu mu dilonga dia Tshibumba tshia Nsentedi.

Tudi bashindike ne: tshibejibeji tshidi ne Anglais mipepeja etshi netshiambuluishe bena Kristo netu kusangisha ne bana bua kulongolola dilonga dia Tshibumba tshia Nsentedi ku lumingu luonso. Yehowa mmunange ‘bana betu ba mu Kristo,’ nunku tudi tumuela tuasakidila bua mudiye ukuata mudimu ne ‘mupika wa lulamatu ne wa budimu’ bua kutupesha tshionso tshitudi natshi dijinga mu tshikondo tshiakanyine.​—1 Pet. 2:17.

Kasumbu kaludiki ka Bantemu ba Yehowa