Tusankayi pamue

MBIKOLE bua kupeta diakalengele ne disanka. Bantu ba bungi batu bela meji ne: kakuena mushindu wa kusanka pamue ne bakuabu to. Nsombelu wa lelu nangananga mu bimenga binene mmufikishe bantu ku diditapulula ne bakuabu anyi diditola.

Mulongeshi kampanda diende Alberto Oliverio udi wamba ne: “Dikala nkaya mbualu budi bufikila bantu bonso, kakuyi mpata nsombelu udi nende bantu nangananga mu bimenga binene udi ubafikisha bipepele ku diditola. Mu nsombelu ya bungi, udi utufikisha ku dilengulula nsombelu wa muntu utudi tuenza nende mudimu mu biro, wa muena mutumba anyi wa muntu udi usumbisha bintu ku mutumba kuetu.” Diditola dia mushindu eu ditu difikisha muntu ku tunyinganyinga tukole.

Kadi bena Kristo kabena ne nsombelu ne lungenyi lua nunku to. Mupostolo Paulo wakafunda ne: “Nusanke misangu yonso.” (1 Tes. 5:16) Tudi ne malu a bungi adi atusaka bua kuikala ne disanka ne kusanka pamue ne bakuabu. Tudi tutendelela Nzambi Mutambe Bunene Yehowa, tudi bumvue bulelela bua mu Bible, tudi ne  ditekemena dia kupeta lupandu ne muoyo wa tshiendelele ne tudi mua kuambuluisha bakuabu bua bapete masanka a muomumue aa.​—Mus. 106:4, 5; Yel. 15:16; Lomo 12:12.

Kuikala ne disanka ne kusanka pamue ne bakuabu mbimanyinu bia bena Kristo balelela. Nunku kabiena bitukemesha bua muvua Paulo mufundile bena Filipoi ne: ‘Ndi nsanka bianyi, ne ndi nsanka ne buonso buenu; muomumue nuenu nusanke bienu, nusanke nanyi kabidi.’ (Filip. 2:17, 18) Mu mêyi makese aa, Paulo udi wakula misangu ibidi bua kuikala ne disanka ne kusanka pamue ne bakuabu.

Bushuwa, bena Kristo badi ne bua kudimuka bua kuepuka lungenyi luonso lua diditola. Muntu nansha umue udi uditapulula ne bakuabu kena mua kusanka pamue ne bena Kristo nende to. Nunku mmunyi mutudi mua kutumikila mubelu wa Paulo wa ‘kusanka mu Mukalenge’ pamue ne bena Kristo netu?​—Filip. 3:1.

Tusankayi pamue ne bena Kristo netu

Pavua Paulo mufundile bena Filipoi mukanda, uvua pamuapa mua kuikala mu buloko mu Lomo bua mudimu wa buambi. (Filip. 1:7; 4:22) Nansha muvuaye mu buloko, kavua mujimije disanka bua mudimu wa buambi. Kadi uvua ne disanka dia kuenzela Yehowa mudimu wa bungi ne ‘kupongolodibua bu mulambu.’ (Filip. 2:17) Mmuenenu uvua nende Paulo udi uleja ne: disanka kadiena dilondesha nsombelu udi nende muntu to. Nansha muvuaye mu buloko wakamba ne: ‘Nentungunuke ne kusanka nanku.’​—Filip. 1:18, Mukenji Mulenga Lelu.

Paulo wakambuluisha bua kuasa tshisumbu mu Filipoi ne uvua munange bikole bena Kristo nende ba muaba au. Uvua mumanye ne: kuambila bakuabu disanka divuaye mupete mu mudimu wa Yehowa kuvua mua kubakankamija pabu. Nunku wakafunda ne: ‘Bana betu ba mu Kristo, ndi musue nuenu numanye ne: malu akunkuata akuandamuka bua kudiundisha lumu luimpe; nunku nkanu yanyi bua Kristo yakamanyibua munkatshi mua masalayi onso a mu nzubu wa lukanu ne munkatshi mua bantu bonso bakuabu kabidi.’ (Filip. 1:12, 13) Kuambila bakuabu bualu budi bukolesha kuvua umue mushindu uvua Paulo upeta disanka ne usanka ne bena Kristo nende. Bena Filipoi bavua mua kuikala basanke pabu pamue nende. Kadi bua bobu kuenza nunku, kabivua bikengela bua batekete bua malu avua makuate Paulo to. Bavua ne bua kuidikija tshilejilu tshiende. (Filip. 1:14; 3:17) Kadi bena Filipoi bavua ne bua kutungunuka ne kusambila bua Paulo, kumuambuluisha ne kumukuatshisha bilondeshile bivuabu nabi.​—Filip. 1:19; 4:14-16.

Tudiku tuleja lungenyi lua kuikala ne disanka lua buena luvua Paulo muleje anyi? Tudiku tudienzeja bua kumona malu adi atutulukila mu  nsombelu ne mu mudimu wetu wa buena Kristo mu mushindu muimpe anyi? Patudi tudisangisha ne bena Kristo netu, mbimpe tusanke bua mudimu wa buambi. Katuena ne bua kuindila malu adi akemesha bua kushisha kusanka to. Tudi mua kuikala bakoke ntema ya muntu ku mukenji wa Bukalenge mu mushindu wa pa buawu ku diambuluisha dia mbuelelu muimpe anyi bamueleshe meji mu mushindu muimpe. Pamuapa tuvua mua kuikala bayukile bimpe ne muntu kampanda pa mvese utuvua basungule mu Bible. Peshi bavua batumanye mu teritware utuvua tuyisha ne: tudi Bantemu ba Yehowa, ne bualu ebu mbufile bumanyishi buimpe. Kulondelangana malu a buena aa mmushindu wa kusanka pamue.

Batendeledi ba Yehowa ba bungi bavua ne badi badipangisha amue malu anu bua kukumbaja mudimu wa diyisha. Bampanda-njila, batangidi bena ngendu, bena ku Betele, bamisionere ne bana betu badi baya kuenza mudimu wa luibaku mu matunga makuabu badi badifila mu mudimu wa ku dîba ne ku dîba ne badi ne disanka bua bualu ebu. Tutuku tumvua disanka ne tusanka pamue nabu anyi? Nunku tulejayi dianyisha bua ‘benzejanganyi netu ba mudimu bua bukalenge bua Nzambi.’ (Kolos. 4:11) Patudi tutuilangana nabu mu bisangilu bia tshisumbu anyi mu mpuilu, tudi ne bua kubakankamija ne muoyo umue. Tudi kabidi mua kuidikija tshisumi tshiabu. Tudi mua kukeba “tshikondo tshimpe” tshia kuteleja malu a mu nsombelu wabu ne malu makuabu adi akolesha patudi tubabikila ku metu pamuapa bua kudia nabu tshiakudia.​—Filip. 4:10.

Tusankayi pamue ne badi mu ntatu

Kutantamena dikengeshibua ne kutshimuna ntatu bivua bikoleshe dipangadika dia Paulo dia kushala mulamate Yehowa. (Kolos. 1:24; Yak. 1:2, 3) Bu muvuaye mumanye ne: bena Kristo ba mu Filipoi bavua mua kutuilangana pabu ne ntatu ya muomumue ne bavua mua kukankamijibua bua ditantamana diende, Paulo uvua ne disanka ne uvua usanka pamue nabu. Ke bualu kayi wakafunda ne: ‘Bualu bua nuakapebua ngasa bua bualu bua Kristo, kena anu bua kumuitabuja, kadi bua kukenga bua bualu buende kabidi; nudi ne diluangana diodiumue dinuakatangila munda muanyi, ne dinudi numvua katataka ne didi munda muanyi.’​—Filip. 1:29, 30.

Bia muomumue, lelu badi baluisha bena Kristo bua mudimu wabu wa diyisha. Imue misangu buluishi ebu budi bulua ne tshikisu anyi mu mishindu misokome. Batontolodi badi mua kutushiminyina malu, balela badi mua kutukengesha, anyi balunda peshi balongi netu badi mua kutuseka. Yezu wakatudimuija ne: ntatu eyi kayena ne bua kutukemesha anyi kututekesha to. Kadi idi ne bua kutusaka bua kuikala ne disanka. Wakamba ne: ‘Panupendabu ne panukengeshabu ne panushiminyinabu mashimi onso bua bualu buanyi, nenuikale ne disanka. Nusanke, nuikale ne disanka dingi, bualu bua difutu dienu didi mu diulu ndinene; bakakengesha baprofete nunku bakadi kumpala kuenu.’​—Mat. 5:11, 12.

Katuena ne bua kutshina anyi kuzakala patudi tumvua lumu lua mudi bena Kristo netu bakengeshibua bikole mu amue matunga to. Kadi tudi ne bua kusanka bua ditantamana diabu. Tudi mua kusambila bua bualu buabu, kulomba Yehowa bua akoleshe ditabuja ne ditantamana diabu. (Filip. 1:3, 4) Nansha mutudi mua kuenzela bana betu aba malu makese, tudi mua kuambuluisha aba badi bakengeshibua batudi nabu mu tshisumbu tshietu. Tudi mua kubatabalela ne kubakuatshisha. Tudi mua kukeba bikondo bia kusanka pamue nabu patudi tubabikila imue misangu bua kubuela mu ntendelelu wetu wa mu dîku, kuyisha nabu ne kujikija lutetuku pamue nabu.

Kudi malu a bungi adi atusaka bua kusanka pamue. Tukandamenayi lungenyi lua mu bulongolodi ebu lua kuditola ne tutungunukayi ne kusanka ne bena Kristo netu. Tuetu benze nunku, nebituambuluishe bua kukolesha dinanga ne buobumue mu tshisumbu ne netusanke pamue ne dîku dijima dia bena Kristo. (Filip. 2:1, 2) Bushuwa, ‘tusanke mu Mukalenge misangu yonso’ bualu Paulo udi utuambila ne: ‘Nengambe tshiakabidi ne: nusanke.’​—Filip. 4:4.

[Mêyi a dianyisha bua tshimfuanyi mu dibeji 6]

Buloba: Ne dianyisha dia Replogle Globes