Yehu uvua ukuatshisha ntendelelu mulelela ne tshisumi

YEHU uvua utua ntendelelu mulelela nyama ku mikolo. Uvua wenza mudimu wende ne bukole, mitalu, tshisumi, dikima ne kayi walukila tshianyima. Yehu uvua ne ngikadilu itudi ne bua kuidikija.

Bakapesha Yehu mudimu tshikondo tshivua bena Isalele mu nsombelu mubi. Ditunga diabu divua ku bukokeshi bua Izebele uvua mukaji wa mukalenge Ahaba ne mamuende wa mukalenge Yolama. Uvua utua ntendelelu wa Baala nyama ku mikolo pamutu pa kutendelela Yehowa, uvua ushipa baprofete ba Nzambi ne uvua munyange bantu ne “malu ende a masandi” ne a “mbuku.” (2 Bak. 9:22; 1 Bak. 18:4, 13) Yehowa wakatuma dîyi bua kubutula nzubu mujima wa Ahaba kusangisha ne Yolama ne Izebele. Yehu ke uvua ne bua kukumbaja bualu ebu.

Bible udi ubanga kuakula bualu bua Yehu tshikondo tshivuaye mfumu wa basalayi pavua bena Isalele baluangana ne bena Sulia ku Lamota-gilada. Yehu uvua ne muanzu munene anyi uvua mfumu wa tshiluilu tshia bena Isalele. Muprofete Elisha wakatuma umue wa ku bana ba baprofete bua kuela Yehu manyi bu mukalenge ne kumuambila bua kushipa bana balume bonso ba mu nzubu mua Ahaba uvua mutombokele Nzambi.​—2 Bak. 8:28; 9:1-10.

Pavua bena dia Yehu basue kumanya tshivua muntu au mulue kuenza, Yehu kavua musue kubambila to. Kadi pakamuenzejabu wakabambila bulelela, ke yeye ne balunda bende kutuadijabu kuluka meji bua kuluisha Yolama. (2 Bak. 9:11-14) Bidi bimueneka ne: basalayi kabatshivua basue kabidi mushindu uvua bana ba Ahaba ne Izebele bakokesha to. Mu mishindu yonso, Yehu wakela meji bikole bua mushindu uvuaye mua kukumbaja mudimu uvuabu bamupeshe.

Bakatapa mukalenge Yolama mu mvita ke kuyaye mu tshimenga tshia Yizelele bua kumuondapabu. Yehu uvua mumanye ne: bua yeye kukumbaja bualu ebu bimpe bivua bikengela bua bena mu Yizelele kabamanyi bualu nansha bumue to. Yehu wakamba ne: ‘Muntu kumuki mu musoko bua kuambaye bualu ebu mu Yizelele.’ (2 Bak. 9:14, 15) Imue misangu uvua mua kuikala mudianjile kumona muvua basalayi bavua balamate Yolama kabayi basue tshivuaye musue kuenza. Yehu uvua musue bua ne: kabamupangishi bua kukumbajaye mudimu wende.

UVUA WENDESHA LUBILU LUA DIKEMA

Bua kukumbaja mudimu wende pa dîba divuabu kabayi belele meji, Yehu wakumbuka ne dikalu dia tubalu ku Lamota-gilada mutangile ku Yizelele mutantshi wa kilometre 72. Pakavuaye usemena pabuipi ne Yizelele, mutentekedi uvua pa tshibumba wakamona ‘Yehu ne bantu bende.’ (2 Bak. 9:17) Bidi bimueneka ne: Yehu wakaya ne basalayi ba bungi bua kukumbaja tshipatshila tshiende.

 Pavua mutentekedi mumone ne: Yehu muntu wa dikima uvua pende mu diende dikalu, wakamba ne: “Yeye udi wendesha dikalu lukasa lukasa.” (2 Bak. 9:20) Pa tshibidilu Yehu uvua wendesha dikalu lubilu, kadi bua tshikondo atshi bidi bimueneka ne: uvua wendesha ne lubilu lua dikema bua mudimu wa pa buawu uvuaye nawu.

Yehu mumane kubenga bua kuandamuna bantu babidi bavuabu bamutumine, wakatuilangana ne mukalenge Yolama ne muena diende Ahazaya mukalenge wa Yuda ne yonso wa kudibu uvua mu diende dikalu. Yolama wakamuebeja ne: ‘Yehu, ulualua talalaa, anyi?’ Yehu wakamuandamuna ne: ‘Tudi ne ditalala kudi kunyi patshidi malu a masandi a mamu webe ne mbuku yende bikumbane bia bungi?’ Pakumvua Yolama bualu ebu, wakakudimuka bua kunyema. Kadi Yehu uvua ne lukasa lua bungi. Wakangata muketa kuwasaye mukalenge Yolama mu tshiadi, yeye kufuila mu dikalu diende. Nansha muvua Ahazaya munyeme, Yehu wakamulonda ne wakamushipa pende.​—2 Bak. 9:22-24, 27.

Muntu mukuabu wa mu nzubu wa Ahaba uvuabu ne bua kushipa uvua mukalenge mukaji mubi Izebele. Yehu wakakula bua bualu buende wamba ne: ‘Mukaji eu wakedibua mulawu.’ Yehu wakabuela mu Yizelele, kumonaye Izebele utangila pa dididishi dia kuulu. Yehu wakambila bena mudimu ba mu nzubu wa mukalenge kayi udiangana mukana bua kuelabu Izebele panshi. Yehu wakadiatakaja ne tubalu Izebele uvua unyanga bena Isalele. Pashishe Yehu wakashipa kabidi bantu bakuabu ba bungi ba mu nzubu wa mukalenge mubi Ahaba.​—2 Bak. 9:30-34; 10:1-14.

Nansha mudi tshikisu tshikale tshibi, tudi ne bua kumanya ne: mu tshikondo atshi, Yehowa uvua ukuata mudimu ne bantu bende bua kukumbaja malumbuluisha ende. Bible udi wamba ne: ‘Kubutuka kua Ahazaya kuakadi bua Nzambi, bualu bua yeye wakaya kudi Yolama; bualu bua pakafikaye kudiye, yeye wakaya ne Yolama bua kuluangana ne Yehu, muana wa Nimishi, nguakelabu manyi pa mutu kudi Yehowa bua kubutulaye ba mu nzubu wa Ahaba.’ (2 Kul. 22:7) Pavuaye mumbushe mubidi wa Yolama mu dikalu, Yehu wakajingulula muvua bualu abu bukumbaja mulayi wa Yehowa wa kunyoka Ahaba bua lufu lua Nabota. Kabidi bavua bambile Yehu bua ‘kusombuela mashi a bantu ba Nzambi’ akamatshisha Izebele panshi.​—2 Bak. 9:7, 25, 26; 1 Bak. 21:17-19.

Lelu, bantu ba Yehowa kabena baluangana ne baluishi ba ntendelelu mulelela ku mubidi to. Nzambi udi wamba ne: “Kusombuela  mbualu buanyi.” (Eb. 10:30) Kadi bua kulama tshisumbu bua bantu kabatshinyangi, bakulu bena Kristo badi mua kuenza malu ne dikima anu bu Yehu. (1 Kol. 5:9-13) Muena mu tshisumbu yonso udi ne bua kudisuika bua kubenga kushemeja malanda ne bantu bipata.​—2 Yone 9-11.

YEHU UVUA WENZELA YEHOWA MUDIMU NE LUKUNUKUNU

Tshivua tshisaka Yehu bua kukumbaja mudimu wende tshidi tshimuenekela mu mêyi avuaye muambile Yehonadaba muntu wa lulamatu aa: ‘Ulue nanyi, umone lukunukunu lundi nalu kudi Yehowa.’ Yehonadaba wakitaba bua kuya ne Yehu, kubandabu mu dikalu ne kuyabu ku Samalea. Kuoku aku, Yehu ‘wakenza bualu ebu ne budimu bua yeye amanye mua kushipa batendeledi ba Bâla.’​—2 Bak. 10:15-17, 19.

Yehu wakamba muvuaye ujinga kufila “mulambu munene” kudi Bâla. (2 Bak. 10:18, 19) Mumanyi kampanda udi wamba ne: “Yehu wakanaya ne miaku ne budimu.” Nansha mudi muaku udibu bakuate nawu mudimu muaba eu “umvuija ‘mulambu’ wetu mulelela eu, udi mua kumvuija kabidi ‘dishipa’ dia batontolodi.” Bu muvua Yehu kayi musue bua mutendeledi wa Bâla nansha umue apangile bualu abu, wakabasangisha bonso mu nzubu wa Bâla ne kubambilaye bua kuvuala bilamba bia pa buabi. ‘Pakamanabu kufila milambu ya kuosha pa kapia,’ Yehu wakambila balume 80 bavua ne bia mvita bua kushipabu batendeledi ba Bâla. Pashishe wakupuisha nzubu wa Bâla ne kumuvuija bu diala, muaba uvua kawuyi mukumbane bua kutendelela.​—2 Bak. 10:20-27.

Bushuwa Yehu wakela mashi a bungi panshi. Kadi Bible udi wamba muvuaye ne dikima ne muvuaye musungile Isalele ku bukokeshi bubi bua Izebele ne dîku diende. Bua mukalenge kampanda wa mu Isalele kukumbajaye bualu ebu, uvua ne bua kuikala ne dikima, tshisumi ne mudisuike bua kukumbaja mudimu wende. Nkonga miaku kampanda udi wamba ne: “Tshivua mudimu mukole ne wakawukumbaja bimpe menemene. Kuya ne bualu ebu mu bulenga kakuvua pamuapa mua kujikija ntendelelu wa Bâla mu Isalele to.”

Kakuyi mpata udi mua kumona mudi nsombelu idi bena Kristo batuilangana nayi lelu ilomba bua bikale ne imue ngikadilu ivua nayi Yehu. Tshilejilu, ntshinyi tshitudi ne bua kuenza padibu basua kutusaka bua kuenza malu adi Yehowa ubenga? Tudi ne bua kububenga ne lukasa, bikale ne dikima ne tshisumi. Tudi mua kuleja lukunukunu kudi Yehowa patudi bamulamate ne muoyo mujima.

IKALA MUDIMUKE BUA KUENDA MU MIKENJI YA YEHOWA

Ndekelu wa muyuki eu udi ututabuluja. Yehu “wakashala ne tuana tua ngombe tua or tuakadi mu Betele ne mu Dana.” (2 Bak. 10:29) Mmunyi mudi muntu uvua umueneka muikale ne lukunukunu bua ntendelelu mulelela mua kuanyisha ditendelela dia mpingu?

Yehu uvua mua kuikala wela meji ne: bua bukalenge bua Isalele kushalabu butapuluke ne bua Yuda bivua bikengela bikale kabidi batapuluke mu malu a ntendelelu. Nunku anu bu bakalenge ba kale ba mu Isalele, Yehu uvua musue bua bashale batapuluke ne bukalenge bua Yuda ke bualu kayi wakatungunuja ntendelelu wa kana ka ngombe. Kadi bualu ebu buvua mua kuleja muvuaye kayi ne ditabuja kudi Yehowa uvua mumuvuije mukalenge.

Yehowa wakanyisha Yehu bualu ‘wakenza malu mimpe ku mêsu kua Nzambi.’ Kadi Yehu ‘kakatamba kuenda mu njila wa mikenji ya Yehowa Nzambi wa Isalele ne mutshima wende wonso.’ (2 Bak. 10:30, 31) Paudi utangila malu akavua Yehu muenze, udi mua kukema ne kunyingalala bua tshivuaye muenze pashishe. Kadi tudi mua kupetela dilongesha ku bualu ebu. Katuena mua kulengulula malanda etu ne Yehowa to. Tudi ne bua kukolesha malanda etu ne Nzambi dituku dionso ku diambuluisha dia dilonga Dîyi diende, dielanganapu meji ne dienza masambila ne muoyo mujima kudi Tatu wetu wa mu diulu. Nunku tuikalayi badimuke bua kutungunuka ne kuenda mu mikenji ya Yehowa ne muoyo mujima.​—1 Kol. 10:12.

[Kazubu mu dibeji 4]

Mbakule bua Yehu mu miyuki idi kayiyi ya mu Bible

Bafundi batu misangu ya bungi belakana bikala bantu badibu batele mu Bible bavuaku menemene. Kudiku bijadiki bidi kabiyi bia mu Bible bidi biakula bua Yehu anyi?

Kudi bintu bitue ku bisatu bia mu Ashû wa kale bidi biakula bua mukalenge wa Isalele eu, bimutela mu dîna diende. Mêyi a tshimue tshia kudibi adi bu adi akula bua Yehu, anyi pamuapa umue wa ku baleji mpala bende winama kumpala kua mukalenge Shalamanesê III wa mu Ashû ne umulambula bintu. Mêyi aa adi amba ne: “Mu bintu bia Yehu (Ia-ú-a) muana wa Omeli (Hu-um-ri); mvua mupetemu argent, or, tshibakudi tshia or, dibungu dia or dikale ne ntaku musongoloke, makopo a or, milondu ya or, tshiamu tshia eten, dikombo dia mukalenge ne bintu bia mitshi bisonga bivuabu babikila ne: puruhtu.” Yehu kavua “muana wa Omeli” to, kadi mbakuate mudimu ne tshiambilu etshi bua kuleja muvuaye mumupingane mu bukalenge, imue misangu bualu Omeli uvua mumanyike ne bualu uvua muase Samalea uvua tshimamuende wa bukalenge bua Isalele.

Malu avua mukalenge wa Ashû muambe bua bintu bivuabu bambe ne: Yehu mmufile kaena ne bijadiki to. Nansha nanku, mmutele Yehu misangu isatu: mu mêyi mafunda pa dibue, pa lupingu lua Shalamanesê ne mu miyuki ya bakalenge ba mu Ashû. Malu aa adi atujadikilaku dikalaku dia muntu udi Bible mutele eu.