1, 2. Nntatu kayi idi ikuata bantu ba bungi lelu? Batendeledi ba Nzambi mbadisuike bua kuenza tshinyi?

LELU tudi mu tshikondo tshia ntatu mikole. Buloba mbuule tente ne bipupu bia bungi. Bantu badi batata bua bikumina, mavuala makole adi akupa mâyi mu bantu, miunya mikole, disapalala dia mâyi, mikuna idi iluka midilu ne mvula mikole ya bipupu. Bantu badi kabidi ne buôwa ne tunyinganyinga bua ntatu idi ibakuata mu mêku anyi muntu pa nkayende. Bushuwa, kudi “bikondo bidi malu” atutulukila bonso buetu.​—Muam. 9:11.

² Batendeledi ba Nzambi mu tshibungi mbatantamene nsombelu mikole ya nunku. Nansha nanku, bu mudi nshikidilu wa bulongolodi ebu wenda usemena, tudi ne bua kuikala badilongolole bua kutantamena lutatu luonso ludi mua kutukuata. Mmunyi mutudi mua kutantamena ntatu katuyi tuteketa mu mikolo? Tshidi mua kutuambuluisha bua kuikala ne dikima padi ntatu itukuata ntshinyi?

3. Bilondeshile Lomo 15:4, mmunyi mutudi mua kukoleshibua patudi tutuilangana ne nsombelu mikole?

³ Nansha mudi nsombelu mikole ikuata bantu ba bungi lelu kupita kumpala, nsombelu eyi ivuaku katshia ku kale. Tumone malongesha atudi mua kupetela kudi batendeledi ba Nzambi ba kale bavua batantamene ntatu ne dikima.​—Lomo 15:4.

4. Nntatu kayi ivua Davidi mutantamene? Tshivua tshimuambuluishe ntshinyi?

⁴ Tukonkonone imue ntatu ivua Davidi mupete. Mukalenge Shaula uvua ujinga kumushipa. Umue musangu, baluishi bende bavua baluangana nende bakamunyenga bakaji bende. Bamue basalayi bende, bena mu dîku diende ne balunda bende bakamutungila. Misangu ya bungi, uvua  ne kanyinganyinga mu mutshima. (1 Sam. 18:8, 9; 30:1-5; 2 Sam. 17:1-3; 24:15, 17; Mus. 38:4-8) Miyuki ya Davidi idi mu Bible idi ileja patoke muvua ntatu mimukebele tunyinganyinga. Kadi, kayivua minyange malanda ende ne Nzambi to. Wakamba ne ditabuja dionso ne: ‘Yehowa udi munya wanyi ne lupandu luanyi; nentshine nganyi?’​—Mus. 27:1; bala Musambu wa 27:5, 10.

5. Tshivua tshiambuluishe Abalahama ne Sala bua kutantamena nsombelu mikole ntshinyi?

⁵ Abalahama ne Sala bakenza matuku a bungi mu ntenta bu benyi mu buloba bua bende. Kabavua anu ne nsombelu mupepele to. Kadi bakatantamena ne muoyo mujima nzala ne njiwu ivua ifumina kudi bisamba bivua bibanyunguluke. (Gen. 12:10; 14:14-16) Tshivua tshibambuluishe ntshinyi? Bible udi utuambila ne: Abalahama “uvua muindile tshimenga tshidi ne bishimikidi bilelela, tshidi Nzambi muikale muenji ne muibaki.” (Eb. 11:8-10) Abalahama ne Sala bakashala batuishile mêsu ku bintu bivua kumpala kabayi balekela malu a pa buloba abupuila panshi.

6. Mmushindu kayi utudi mua kuidikija Yobo?

⁶ Yobo pende uvua mupete ntatu mikole. Fuanyikija muvuaye mua kuikala mumvue pavua malu onso a mu nsombelu wende amueneka manyanguke. (Yobo 3:3, 11) Nansha muvua malu manyanguke nunku, kavua mumvue bimpe bua tshinyi malu au avua amufikila to. Kadi, kavua mutekete mu mikolo nansha. Uvua anu mulame muoyo wende mutoke ne ditabuja kudi Nzambi. (Bala Yobo 27:5.) Bushuwa, Yobo mmutushile tshilejilu tshimpe.

7. Nntatu kayi ivua Paulo mupete pavuaye wenzela Nzambi mudimu? Ntshinyi tshivua tshimupeshe dikima bua kutungunuka ne mudimu eu?

⁷ Tukonkonone kabidi tshilejilu tshia mupostolo Paulo. Uvua mupete ‘njiwu mu tshimenga, mu tshipela ne pa mbuu.’ Udi wakula bua ‘nzala, nyota, mashika makole ne dipangila dia bilamba.’ Paulo udi wamba kabidi bua muvuaye “mupitshishile butuku bujima ne munya mujima mu mbuu,” pamuapa bualu mazuwa avuaye mubuele avua makoseke pa mâyi. (2 Kol. 11:23-27) Nansha muvua malu onso aa mamuenzekele, tangila tshivuaye muambe pavuaye mupande ku njiwu ya lufu bua muvuaye wenzela Nzambi mudimu: “Biakenzeka nanku bua katudieyemenyi tuetu nkayetu to, kadi tueyemene Nzambi udi ubisha bafue. Yeye wakatupandisha ku bualu bunene nunku buvua bu lufu, ne neatupandishe kabidi.” (2 Kol. 1:8-10) Bantu ba bungi kabatu banji kupeta ntatu mikole ya bungi bu Paulo to. Nansha nanku, ba bungi ba kutudi bakadi badiumvue pabu anu muvuaye mudiumvue. Nunku tshilejilu tshia Paulo tshia muvuaye ne dikima tshidi mua kutukolesha.

8. Ntatu idi mua kutufikisha ku tshinyi? Fila tshilejilu.

⁸ Matuku etu aa buloba mbuule tente ne bipupu, ntatu ne tunyinganyinga; malu aa mmafikishe bantu ba bungi ku diteketa mu mikolo. Bidi kabidi nanku nansha bua bamue bena Kristo. Tshilejilu, Lani * ne bayende bavua bampanda-njila mu ditunga dia Australie. Lani udi wamba ne: pavuabu bamukuate ne disama dia kansere ka ku dibele, biakamutonda bikole. Udi kabidi uleja ne: “Pamvua nnua manga, bivua binsama kabidi bikole ne tshivua ndimona ne mushinga to.” Ku lukuabu luseke, uvua kabidi ne bua kulama bayende uvuabu bapande muongo. Tuetu ne lutatu lua nunku, tudi mua kuenza tshinyi?

9, 10. a) Ntshinyi tshitudi katuyi mua kulekela Satana utuenzela? b) Mmunyi mudi mêyi adi mu Bienzedi 14:22 atuambuluisha bua kutantamena ntatu?

⁹ Mbimpe tuvuluke ne: Satana mmusue kuenza mudimu ne ntatu itudi tupeta bua kunyanga ditabuja dietu. Kadi katuena ne bua kumulekela ujimija disanka dietu mushindu eu to. Nsumuinu 24:10 udi wamba ne: ‘Biwateketa palua dituku dia dikenga, bukole buebe budi bukepa.’ Kuelangana meji bua bilejilu bidi mu  Bible bu mudi bitukadi bakonkonone, nekutuambuluishe bua kuikala ne dikima patudi mu ntatu.

¹⁰ Mbimpe tuvuluke kabidi ne: katuena mua kujikija ntatu yonso to. Nunku, tudi ne bua kutekemena se: neitukuate. (2 Tim. 3:12) Bienzedi 14:22 udi utuambila ne: “Tudi ne bua kubuela mu Bukalenge bua Nzambi kupitshila mu makenga a bungi.” Pamutu pa kudimona bu muntu mulekelela, umone ntatu eyi bu mushindu wa kuleja muudi weyemena bukole budi nabu Nzambi bua kukuambuluisha.

11. Tudi ne bua kuenza tshinyi tuetu basue bua ntatu kayitutekeshi mu mikolo?

¹¹ Tudi ne bua kuimanyina pa malu mimpe. Dîyi dia Nzambi didi dituambila ne: ‘Mutshima wa disanka udi uvuija mpala wa musangelu, kadi bikala mutshima ne kanyinganyinga, muoyo wa muntu udi uteketa teketee.’ (Nsu. 15:13) Baminganga mbafike ku dimona ne: mubedi yeye wela meji ne: disama diende nedijike, nebimuambuluishe bua kumvua bimpe. Misangu ya bungi, bobu bapeshe muntu buanga butu kabuyi buondopa disama didiye nadi, kadi muikale wela meji ne: nebumuambuluishe, udi umvua bimpe. Kadi yeye wela meji ne: buanga abu budi mua kumukebela masama makuabu, neadiumvue anu bibi. Tshilejilu etshi tshidi tshituleja ne: tuetu tutungunuka ne kuela meji pa malu atudi katuyi mua kushintulula, netutekete mu mikolo. Tudi ne disanka bua mudi Yehowa utuambuluisha. Nansha mu bikondo bia ntatu, netupete dikoleshibua mu Dîyi diende, bena Kristo netu nebatukuatshishe, ne nyuma wende neatupeshe bukole. Aa ke malu atudi ne bua kuelela meji ne adi mua kutupetesha disanka. Pamutu pa kuela meji ku ntatu iudi upeta, dienzeje bua kutantamena lutatu luonso ne kutamba kutuma lungenyi ku malu mimpe.​—Nsu. 17:22.

12, 13. a) Ntshinyi tshivua tshiambuluishe batendeledi ba Nzambi bua kutantamena ntatu ivua mikebesha kudi bipupu? Fila tshilejilu. b) Mmunyi mudi ntatu mua kutufikisha ku dileja malu atudi tuangata ne mushinga?

¹² Bidimu bishale ebi, kuvua bipupu bikole bivua bienzeke mu amue matunga. Bana betu ba bungi ba mu matunga au bavua babitantamene. Kabiena bileja ne: bivua bipepele to. Tshilejilu, ku ntuadijilu kua 2010, tshikumina tshikole ne mavuala makole adi akupa mâyi mu bantu bivua bienzeke mu ditunga dia Chili bivua binyangakaje nzubu ne bintu bia bungi bia bana betu ba mu ditunga edi, bakuabu kujimijabu too ne midimu yabu. Nansha nanku, bana betu bakatungunuka amu ne kuenzela Nzambi mudimu. Tshilejilu, Samuel uvua mujimije nzubu wende ne bionso bivuamu wakamba ne: “Nansha mutuvua mu nsombelu mukole eu, meme ne mukajanyi tuvua anu tubuela mu bisangilu ne tuyisha. Ndi mutuishibue ne: malu aa ke avua matuambuluishe bua kuikala amu ne disanka.” Samuel ne mukajende pamue ne bena Kristo netu bakuabu kabavua balekele ntatu ayi ibupuila panshi, kadi bakatungunuka ne kuenzela Yehowa mudimu ne tshisumi.

¹³ Mu ngondo wa 9 wa 2009, mvula mikole ivua minyangakaje bintu bia bungi mu tshimenga tshia Manila mu ditunga dia Philippines. Muntu kampanda uvua mubanji, uvua mujimije bintu biende bia bungi wakamba ne: “Mvula eyi ivua mitatshishe bantu bonso, bapele ne babanji.” Bualu ebu budi butuvuluija mubelu muimpe wa Yezu wa ne: “Nudibutshile biuma mu diulu mudi kamuyi bishi anyi dimoma bidi mua kubidia, mudi bivi kabayi mua kubuela, kuiba.” (Mat. 6:20) Kudikebela bukubi ku bintu bia ku mubidi bidi mua kujimina ne lukasa kutu misangu ya bungi kupetesha tunyinganyinga. Mbimpe nsombelu wetu imanyine pa malanda mimpe ne Yehowa adi kaayi mua kunyanguka nansha bualu kayi bobu mua kutufikila.​—Bala Ebelu 13:5, 6.

14. Mmalu kayi adi atusaka bua kuikala ne dikima?

¹⁴ Yezu wakaleja muvua malu makole ne  bua kuikalaku mu matuku a dikalaku diende, kadi wakamba ne: “Kanutshinyi to.” (Luka 21:9) Bu mudi Yezu Mukalenge wetu ne Yehowa Mufuki wa diulu ne buloba batuambuluisha, katuena ne bua kutshina to. Paulo wakakankamija Timote wamba ne: “Nzambi ki mmutupeshe nyuma wa buôwa to, kadi wa bukole, wa dinanga ne wa meji mimpe.”​—2 Tim. 1:7.

15. Mmalu kayi avua bantu ba Nzambi bambe bua kuleja muvuabu bamueyemene? Mmunyi mutudi mua kupeta dikima dia buena diabu?

¹⁵ Tumone amue malu avua batendeledi ba Nzambi bambe ne dishindika dionso. Davidi wakamba ne: “Yehowa udi bukole buanyi ne ngabu wanyi; mutshima wanyi wakumueyemena, ndi mukuatshishibue. Nunku mutshima wanyi udi utamba kusanka.” (Mus. 28:7) Paulo wakaleja pende muvuaye ne dishindika dikole wamba ne: “Mu malu onso aa, tudi tutshimuna too ne ku ndekelu ku diambuluisha dia yeye uvua mutunange.” (Lomo 8:37) Pavua Yezu mumanye ne: bakavua pa kumukuata ne kumushipa, wakamba bualu buvua buleja muvuaye mu malanda makole ne Nzambi. Wakambila bapostolo bende ne: “Tshiena nkayanyi to, bualu Tatu udi nanyi.” (Yone 16:32) Mêyi onso aa adi aleja tshinyi? Adi aleja muvuabu beyemene Yehowa ne muoyo mujima. Tuetu beyemene Nzambi mushindu eu, netupete dikima dia kutantamena ntatu.​—Bala Musambu wa 46:1-3.

16. Bua tshinyi kulonga Dîyi dia Nzambi kudi ne mushinga wa bungi?

¹⁶ Dikima didi nadi bena Kristo kaditu didiluila to. Kadi, didi difumina ku dimanya Nzambi ne dimueyemena. Tudi mua kuenza nunku tuetu tulonga Bible. Muanetu wa bakaji mukuabu utu ne disama dia mutu udi umvuija tshitu tshimuambuluisha wamba ne: “Ntu mbala mbalulula mvese itu inkolesha.” Tutuku tuenza ntendelelu wa mu dîku lumingu luonso anu bu mutu mupika wa lulamatu mutuambile anyi? Kuenza malu aa nekutuambuluishe bua kuikala ne lungenyi lua buena lua mufundi wa Musambu wa 119 wakamba ne: ‘Mona mundi munange mikenji yebe! Ndi ngelangana meji bualu buayi dinda too ne ku dilolo.’​—Mus. 119:97.

17. a) Mbintu kayi bidi mua kutuambuluisha bua kuikala ne dikima? b) Fila tshilejilu tshia muvua muyuki wa muanetu kampanda uuvua mubale mu mikanda yetu mukuambuluishe.

¹⁷ Tudi kabidi ne mikanda idi ne malu adi akolesha dieyemena dietu kudi Yehowa. Miyuki ya malu a mu nsombelu idi mu bibejibeji bietu mmiambuluishe bana betu ba bungi. Muanetu wa bakaji mukuabu wa mu Asie udi ne disama dikole dia mu lungenyi uvua musanke pavuaye mubale muyuki wa muanetu wa balume mukuabu uvua misionere ne mutantamene disama dia muomumue. Wakafunda ne: “Muyuki eu uvua mungambuluishe bua kumvua  lutatu lumvua nalu ne mmumpeteshe ditekemena.”

18. Bua tshinyi tudi ne bua kuikala tusambila?

¹⁸ Disambila didi mua kutuambuluisha mu nsombelu yonso. Mupostolo Paulo wakaleja muvuadi ne mushinga pakambaye ne: “Kanusamishi mutu bua tshintu nansha tshimue, kadi mu malu onso mu disambila ne mu disengelela pamue ne disakidila, numanyishe Nzambi milombu yenu; ne ditalala dia Nzambi didi dipite dijingulula dionso dia malu nedilame mioyo yenu ne lungenyi luenu ku butuangaji bua Kristo Yezu.” (Filip. 4:6, 7) Utuku usambila misangu yonso bua kupeta bukole bua kutantamena ntatu anyi? Muanetu wa balume mukuabu Alex wa mu Grande-Bretagne uvua ne disama dia mutu munkatshi mua bidimu bia bungi wakamba ne: “Kuyukila ne Yehowa mu disambila ne kumuteleja pandi mbala Dîyi diende nkungambuluishe bikole.”

19. Tudi ne bua kumona kubuela mu bisangilu bia bena Kristo mushindu kayi?

¹⁹ Tshintu tshikuabu tshidi mua kutuambuluisha mbisangilu. Mufundi wa Musambu wa 84 wakamba ne: ‘Mutshima wanyi udi ujinga, e, udi mupange ne dijinga dia biendedi bia mu tshitendelelu tshia Yehowa.’ (Mus. 84:2) Tutuku petu tudiumvua nunku anyi? Lani utukadi batele udi umvuija muvua kubuela mu bisangilu bionso ne mushinga kudiye wamba ne: “Mvua mumanye ne: mvua ne bua kubuela mu bisangilu bua Yehowa angambuluishe.”

20. Kuyisha kudi kutuambuluisha mushindu kayi?

²⁰ Tudi kabidi tupeta dikima patudi tuyisha ne tshisumi. (1 Tim. 4:16) Muanetu wa bakaji mukuabu wa mu Australie uvua mupete ntatu ya bungi udi wamba ne: “Tshivua mmona kuyisha ne mushinga to, kadi mukulu kampanda wakandomba bua tuyishe nende. Ngakitaba. Yehowa wakangambuluisha; misangu yonso imvua nyisha mvua ngumvua disanka.” (Nsu. 16:20) Bantu ba bungi mbafike ku dimona ne: padibu bambuluisha bakuabu bua kuikala ne ditabuja dikole kudi Yehowa, badi bakolesha pabu ditabuja diabu. Padibu benza nunku, bidi bibambuluisha bua kupua ntatu idibu nayi muoyo ne batuishila mêsu ku malu a mushinga.​—Filip. 1:10, 11.

21. Ndishindika kayi ditudi nadi bua ntatu itudi tupeta?

²¹ Yehowa mmutupeshe bintu bia bungi bidi bituambuluisha bua kutantamena ntatu itudi tupeta lelu ne dikima. Tuetu tutumikila malu onso aa, tuelanganapu meji ne tuidikija bilejilu bia bantu ba Nzambi bavua ne dikima, netuikale bashindike ne: tudi mua kutantamena bimpe ntatu. Nansha mutudi mua kupeta nsombelu mikole bu mudi nshikidilu wa bulongolodi ebu wenda usemena, tudi ne bua kudiumvua anu bu Paulo wakamba ne: “Mbatuele panshi, kadi ki mbatubutule to. . . . Katuena tulekela.” (2 Kol. 4:9, 16) Tudi mua kutantamena ntatu ne dikima bualu Yehowa udi utuambuluisha.​—Bala 2 Kolinto 4:17, 18.