1, 2. a) Mmalu kayi atudi ne bua kuenza bua kuikala mu malanda mimpe ne Yehowa? b) Kukonkonona miyuki ya mu Bible ya mushindu uvua bantu benze malu pavua Nzambi mubanyoke nekutuambuluishe mushindu kayi?

MUFUNDI wa Misambu wakaleja muvuaye mueyemene Nzambi pakambaye ne: ‘Bidi bimpe bua meme kusemena pabuipi ne Nzambi. Ngakuvuija Mukalenge Yehowa tshinyemenu tshianyi.’ (Mus. 73:28) Nnsombelu kayi ivua mimufikishe ku diamba mêyi aa? Pavua mufundi wa Misambu eu mumone muvua bantu babi bikale mu ditalala, mutshima wende wakanji kunyingalala bikole. Wakadila wamba ne: ‘Ngakalengeja mutshima wanyi patupu, ngakuowa bianza bianyi pangakadi tshiyi ne tshilumbu.’ (Mus. 73:2, 3, 13, 21) Kadi pakayaye mu “muaba wa tshijila wa Nzambi,” muaba eu wakamuambuluisha bua kushintulula lungenyi luende ne bua kulama malanda ende ne Nzambi. (Mus. 73:16-18) Bualu ebu buapesha muntu uvua utshina Nzambi eu dilongesha dia mushinga mukole edi: Kuikala munkatshi mua bantu ba Nzambi, kuitaba mibelu ne kuyitumikila kudi ne mushinga bua kuikala mu malanda mimpe ne Yehowa.​—Mus. 73:24.

² Tuetu petu tudi basue kuikala mu malanda mimpe ne Nzambi mulelela udi ne muoyo. Bua kufika ku dienza nunku, mbimpe tuenze bua mibelu yende anyi dinyoka diende bitulengeje bua tulue bantu badi bamusankisha. Ku kale, Nzambi wakapesha ne bulenga bantu ne bisamba mpunga wa kuitaba dinyoka diende. Mbafunde mu Bible miyuki ya mushindu wakenzabu malu “bua kutulongesha” ne bua “kutudimuija tuetu badi ku nshikidilu kua ndongoluelu ya malu.” (Lomo 15:4; 1 Kol. 10:11) Kukonkonona miyuki eyi bimpe nekutuambuluishe bua kujingulula bimpe bumuntu bua Yehowa ne nekutuleje mutudi mua kupetela masanka ku mushindu udiye utulengeja.

3. Mmunyi mudi mukanda wa Yeshaya 64:8 ne wa Yelemiya 18:1-6 ileja bukokeshi budi nabu Yehowa kudi bantu? (Tangila tshimfuanyi tshidi ku ntuadijilu.)

³ Yeshaya 64:8 udi uleja bukokeshi budi nabu Yehowa kudi bantu ne bisamba mu tshilejilu wamba ne: “Wewe Yehowa udi Tatu wetu; tuetu tudi dima ne wewe udi mufumbi; buonso buetu tudi bintu biwakuenza ku bianza biebe.” Mufumbi udi ne bukokeshi bua kufumba dima bua kuenza tshintu tshidiye musue kuenza nadi. Dima kadiena ne tshididi mua kuamba to. Ke mudibi kabidi bua muntu ne Nzambi. Muntu kena mua kukokangana ne Nzambi nansha musangu umue, anu mudi dima kadiyi mua kukokangana ne mufumbi udi nadi mu bianza bua kudienza tshidiye musue kuenza nadi.​—Bala Yelemiya 18:1-6.

4. Nzambi utuku ufumba bantu ne bisamba ku mpukapuka anyi? Umvuija.

⁴ Mushindu uvua Yehowa muenzele bena Isalele wa kale malu wakaleja mudiye mua kuenza anu mudi mufumbi wenza ne dima. Kadi kudi dishilangana dinene. Mufumbi udi mua kuenza bintu bia mishindu yonso bidiye musue kuenza ne ndambu wa dima. Yehowa udiku ufumba bantu anyi bisamba ku mpukapuka wenza bamue bimpe ne bakuabu babi anyi? Bible udi wandamuna ne: tòo. Yehowa mmupeshe bantu dipa ditambe buimpe, mmumue ne: dipa dia kudisunguila malu. Katu wenza mudimu ne bukokeshi buende mu mushindu udi mua kuvuija dipa diende edi patupu to. Bantu badi ne bua kusungula bua Mufuki wabu Yehowa abalengeje.​—Bala Yelemiya 18:7-10.

5. Padi bantu babenga bua Yehowa kubafumba, mmunyi mutuye wenza mudimu ne bukokeshi buende kudibu?

⁵ Netuambe munyi bikala bantu babenga ku bukole bua Mufumbi munene kubalengejaye? Mmunyi mudi Nzambi wenza mudimu ne bukokeshi buende? Ela meji tshidi mua kuenzekela dima padidi kadiyi dikumbane bua muntu kuenzaye nadi tshintu kampanda tshidiye musue kuenza. Kakuyi mpata, mufumbi udi mua kuenza nadi tshintu tshikuabu anyi kudilekela. Kadi misangu ya bungi padi dima kadiyi ne mushinga, tshilema ntshia mufumbi. Kabiena nanku bua Mufumbi wetu to. (Dut. 32:4) Padi muntu kayi witaba mushindu udi Yehowa umufumba, tshilema tshitu anu tshia muntu au. Yehowa udi ukuata mudimu ne bukokeshi buende budi buenze bu bua mufumbi kudi bantu padiye ushintulula mushindu udiye ubenzela malu bilondeshile mudibu bitaba bua abafumbe. Bantu badi bitaba ne muoyo mujima, Yehowa udi ubafumba mu mushindu muimpe. Tshilejilu, bena Kristo bela manyi badi “bivuadi bia luse” bidibu bafumbe bua kulua ‘bivuadi bia kuelela bintu bia bunême.’ Ku lukuabu luseke, bantu badi babenga kutumikila Nzambi ku bukole badi balua bu “bivuadi bia tshiji bidi bikumbanyine kabutu.”​—Lomo 9:19-23.

6, 7. Mmunyi muvua mukalenge Davidi ne mukalenge Shaula bashilangane mu mushindu uvuabu batumikile mibelu ya Yehowa?

 ⁶ Mushindu umue udi Yehowa ufumba bantu, nku diambuluisha dia mibelu anyi dinyoka. Tudi mua kumona mudi Yehowa wenza mudimu ne bukokeshi budiye nabu kudi bantu badiye ufumba patudi tukonkonona malu adi atangila Shaula ne Davidi, bakalenge babidi ba kumpala ba mu Isalele. Pavua mukalenge Davidi muende masandi ne Beta-Sheba, bienzedi biende bibi biakamukebela yeye ne bantu bakuabu ntatu. Nansha muvua Davidi muikale mukalenge, Yehowa kavua mubenge bua kumupesha dinyoka dikole to. Nzambi wakatuma muprofete wende Natana kudi Davidi ne mukenji mukole. (2 Sam. 12:1-12) Davidi wakenza tshinyi? Biakamusama ku muoyo, yeye kunyingalala. Nzambi wakafuila Davidi luse.​—Bala 2 Samuele 12:13.

 ⁷ Kadi, mukalenge Shaula uvua Davidi mupingane mu nkuasa, kavua yeye muitabe mibelu to. Yehowa wakatumina Shaula dîyi kudi muprofete Samuele bua abutule bena Amaleka ne bimuna biabu. Shaula wakabenga kutumikila dîyi dia Nzambi edi. Wakalama mukalenge Agaga ne muoyo ne bimuna  bivuaye musungule. Bua tshinyi? Pamuapa bualu uvua musue kuditumbisha. (1 Sam. 15:1-3, 7-9, 12) Pavuabu babele Shaula, uvua ne bua kushintulula mutshima wende ne kulekela bua Mufumbi munene amulengeje. Kadi Shaula wakabenga bua kumufumbabu. Wakabingisha tshivuaye muenze, uleja muvuatshi tshianyishibue bualu bavua mua kulambula nyama ayi, ne wakapepeja mibelu ya Samuele. Yehowa wakumbusha Shaula mu nkuasa, ne Shaula kavua kabidi mupetulule malanda mimpe ne Nzambi mulelela nansha kakese.​—Bala 1 Samuele 15:13-15, 20-23.

8. Ndilongesha kayi ditudi tupeta bua mushindu uvua bena Isalele babenge bua Yehowa kubafumba?

⁸ Ki nganu bantu nkayabu batu Yehowa upesha mpunga wa kuitaba mushindu udiye ubafumba to, utu upesha kabidi ne bisamba mpunga wa kuenza nunku. Mu 1513 kumpala kua Yezu, bena Isalele bavuabu bapatule mu bupika mu Ejipitu bakadia tshipungidi tshia kuikala mu malanda ne Nzambi. Isalele uvua tshisamba tshiende tshisungula, ne tshivua ne diakalenga dia kufumbibua kudiye. Kadi bena Isalele bakatungunuka ne kuenza malu mabi ku mêsu kua Yehowa, bakatendelela too ne nzambi ya bisamba bivua bibanyunguluke. Yehowa wakatuma baprofete bende misangu ya bungi bua kubapingaja mu njila, kadi bena Isalele bakabenga bua kubateleja. (Yel. 35:12-15) Nzambi wakabanyoka bikole bua mutu wabu mukole. Anu bu tshivuadi tshidi tshikumbanyine kabutu, bena Ashû bakatshimuna bukalenge bua ku Nord bua bisamba dikumi, ne bena Babulona bakatshimuna pabu bukalenge bua bisamba bibidi bua ku Sud. Bualu ebu budi dilongesha dinene kutudi. Mushindu udi Yehowa utufumba neutuambuluishe anu tuetu bawitabe ne muoyo mujima.

9, 10. Ntshinyi tshiakenza bena Ninewe pavua Yehowa mubadimuije?

 ⁹ Yehowa wakapesha kabidi bena mu Ninewe, tshimenga tshikulu tshia ditunga dia Ashû mpunga wa kuandamuna ku didimuija diende. Dîyi diende diakalua kudi Yona diamba ne: ‘Bika, ndaku ku Ninewe, musoko au munene, uwubele; bualu bua bubi buabu buakubanda ku mêsu kuanyi.’ Tshimenga tshia Ninewe tshivua tshikumbanyine kabutu.​—Yona 1:1, 2; 3:1-4.

¹⁰ Kadi pavua Yona mumanyishe mukenji wa kabutu, ‘bena Ninewe bakitabuja mêyi a Nzambi; bakajila biakudia, bakaluata bivualu bikayabala, kubangila kudi banême too ne kudi bapuekele.’ Mukalenge wabu ‘wakajuka mu nkuasa wende wa bukalenge, wakavula tshivualu tshiende tshia bumfumu, wakaluata bivualu bikayabala, wakashikama mu butu.’ Bena Ninewe bakitaba mushindu uvua Yehowa ubafumba ne bakanyingalala. Nunku Yehowa kakababutula nansha.​—Yona 3:5-10.

11. Mushindu uvua Yehowa muenzele bena Isalele ne bena Ninewe malu wakaleja ne: uvua ne ngikadilu kayi?

¹¹ Nansha muvua bena Isalele bikale tshisamba tshisungula, kabiakapangisha Nzambi bua kubanyoka nansha. Ku lukuabu luseke, bena Ninewe kabavua badie tshipungidi ne Nzambi to. Kadi Yehowa wakamanyisha dilumbuluisha diende kudibu ne kubafuila luse pavuabu badileje muvuabu dima dimpe mu bianza biende. Bilejilu bibidi ebi bidi bushuwa bituleja mudi Yehowa Nzambi wetu ‘kayi utangila bantu ne kansungasunga.’​—Dut. 10:17.

12, 13. a) Bua tshinyi Nzambi utu ushintulula malu adiye mulongolole padi bantu bitaba bua abafumbe? b) ‘Kunyingalala’ kua Yehowa bua Shaula kuvua kumvuija tshinyi? ‘Kunyingalala’ kua Yehowa bua bena Ninewe kuvua kumvuija tshinyi?

¹² Mushindu udi Yehowa utufumba udi uleja ne: kena muena malu makole to, ne udi wenza malu bilondeshile nsombelu. Bualu ebu budi bumuenekela mu nsombelu ivua Yehowa muangate dipangadika dia kunyoka bantu bilondeshile buakane buende, kadi mulue kushintulula lungenyi luende bua malu avuabu balue kuenza. Bible udi wamba bua mukalenge wa kumpala wa Isalele ne: Yehowa ‘wakanyingalala bua muvuaye mupeshe Shaula bukalenge.’ (1 Sam. 15:11, MMM) Pavua bena mu Ninewe banyingalale ne bumbuke mu njila wabu mubi, Bible udi wamba ne: ‘Nzambi wakanyingalala bua muanda mukole wakambaye diambedi ne: nembenzele; yeye kakawenza nansha.’​—Yona 3:10, NW.

¹³ Muaku wa mu tshiena Ebelu udibu bakudimune ne: “kunyingalala” udi misangu ya bungi uleja kushintulula lungenyi anyi tshidi muntu mulongolole bua kuenza. Lungenyi lua Yehowa lua kusungula Shaula mukalenge luakashintuluka pakamubengaye. Bualu ebu buakenzeka ki mbualu Yehowa uvua mutupakane pavuaye musungule Shaula to, kadi bualu Shaula wakenza malu kayi ne ditabuja ne wakabenga kumutumikila. Nzambi mulelela wakanyingalala bua bena Ninewe, mmumue ne: wakashintulula tshivuaye mulongolole bua kubenzela. Bidi bitukolesha patudi tumanya ne: Yehowa Mufumbi wetu udi kayi muena malu makole ne udi wenza malu bilondeshile nsombelu, muena bulenga ne ufuilangana luse, mmusue kushintulula malu adiye mulongolole padi bantu babi bashintuluka.

14. a) Mmunyi mudi Yehowa utufumba lelu? b) Mmunyi mutudi ne bua kuandamuna ku mushindu udi Nzambi utufumba?

¹⁴ Yehowa udi utufumba lelu nangananga ku diambuluisha dia Bible Dîyi diende ne dia bulongolodi buende. (2 Tim. 3:16, 17) Katuenaku ne bua kuitaba mubelu peshi dinyoka kayi dionso ditudi tupeta ku diambuluisha dia bintu ebi anyi? Nansha tuetu batambule kukadi bidimu bungi kayi, peshi bikale ne majitu mu bulongolodi bungi kayi, tudi ne bua kutungunuka ne kuitaba mibelu ya Yehowa ne kuenza bua itulengeje bu bivuadi bia bunême.

15, 16. a) Ndungenyi kayi lubi ludi muntu mua kupeta padi dinyoka didibu bamupeshe dilomba bua bamumbushe majitu adiye nawu? Fila tshilejilu. b) Tshidi mua kutuambuluisha bua kumbusha bundu ne kubenga kudiumvua bibi padibu batupesha dinyoka ntshinyi?

 ¹⁵ Badi mua kutupesha amue manyoka menze bu mushindu wa kutulongesha anyi wa kutululamija. Kadi misangu mikuabu bitu bikengela bua batunyoke bualu tudi benze bualu kampanda bubi. Dinyoka dia nunku didi mua kuenza bua tujimije majitu atudi nawu. Tuangate tshilejilu tshia Dennis * uvua mukulu mu tshisumbu. Wakenza bualu kampanda bubi bualu kavua mukonkonone bimpe mmuenenu wa mu Bible bua bidi bitangila malu a bungenda mushinga to, bobu kumubela. Dennis wakumvua bishi dilolo divuabu bamanyishe tshisumbu ne: kavua kabidi mukulu? Udi wamba ne: “Mvua mumvue bu ne: mvua mujimije bionso. Mvua mupete majitu a bungi mu tshisumbu munkatshi mua bidimu 30 bishale. Mvua mpanda-njila wa pa tshibidilu, muenze mudimu ku Betele, mulue musadidi wa mudimu ne pashishe mukulu. Ntshivua mfuminaku ku dienza muyuki bua musangu wa kumpala mu mpungilu wa distrike. Ngakajimija bionso abi musangu umue. Mvua kabidi ngumvua bundu ne bivua bintonda bikole, mvua ngela meji ne: tshivua kabidi ne muaba nansha umue mu bulongolodi to.”

¹⁶ Dennis uvua ne bua kushintuluka, kulekela njila mubi uvua mumufikishe ku dipeta manyoka. Kadi ntshinyi tshivua tshimuambuluishe bua kumbusha meji mabi? Udi wamba ne: “Mvua mudisuike bua kulama bibidilu bimpe bia buena Kristo. Tshivua tshingambuluishe bikole, ndiambuluisha dia kudi bena Kristo ne dikankamija dimvua mupetele mu mikanda yetu. Tshiena-bualu tshia ne: ‘Uvuaku ne majitu mu tshisumbu anyi? Udiku mua kuapetulula anyi?’ tshia mu Tshibumba tshia Nsentedi tshia dia 15 ngondo wa 8 wa 2009 tshivua anu bu mukanda mumfundila bua kungandamuna ku masambila anyi. Ngakanyisha bikole mubelu wa ne: ‘Muudi kuyi ne majitu mu tshisumbu, dienzeja bua kukolesha malanda ebe ne Yehowa.’” Mmunyi muvua dinyoka edi diambuluishe Dennis? Wakamba panyima pa bidimu ne: “Yehowa mmumbeneshe kabidi ne ndi mulue musadidi wa mudimu.”

17. Mmunyi mudi dipatshibua mu tshisumbu mua kuambuluisha muntu udi muenze bibi bua kushintuluka? Fila tshilejilu.

¹⁷ Kuipatshibua mu tshisumbu mmushindu mukuabu udi Yehowa unyoka bantu. Dinyoka edi didi dikuba tshisumbu ku malu mabi ne diambuluisha muntu udi muenze bubi bua kushintuluka. (1 Kol. 5:6, 7, 11) Tshilejilu, Robert wakipatshibua mu tshisumbu munkatshi mua bidimu bitue ku 16, munkatshi mua bidimu ebi, baledi bende ne bana babu bakatumikila ne muoyo mujima tshidi Dîyi dia Nzambi diamba bua kubenga kusomba ne benji ba malu mabi anyi mene kubela muoyo. Robert mmupingane mu tshisumbu kukadi mpindieu ndambu wa bidimu ne udi ulubuluka bimpe mu malu a Nzambi. Pavuabu bamuebeje tshivua tshimusake bua kupingana kudi Yehowa ne kudi bantu bende panyima pa bidimu bungi nunku, wakaleja ne: mushindu uvua bena mu dîku diabu bamulekele uvua umutonda bikole. Udi wamba ne: “Bu bena mu dîku dietu basomba nanyi nansha mêba makese, bankonka bua kumanya mundi, malu makese avuabu mua kuenza au avua mua kunsankisha ne pamuapa tshivua mua kupeta dijinga dia kupingana kudi Nzambi to.”

18. Tudi ne bua kuikala dima dia mushindu kayi mu bianza bia Mufumbi munene?

¹⁸ Pamuapa kabiena anu bikengela bua batupeshe dinyoka dia nunku to, kadi netuikale dima dia mushindu kayi mu bianza bia Mufumbi munene? Netuenze tshinyi bobu batupeshe dinyoka? Netuikalaku mua kuenza malu bu Davidi anyi bu Shaula? Mufumbi munene n’Tatu wetu. Kupu muoyo ne: ‘Yehowa udi ubela udiye munange, bu mudi tatu ubela muanende mulume udi umusankisha.’ Nunku, ‘kupetudi dikengesha didi Yehowa ukuyisha nadi, kubela kuende kakukutondi.’​—Nsu. 3:11, 12.