1, 2. a) Tshidi mua kuenzeka ntshinyi padi muntu wela meji bua muntu udiye munange ne wakula bua bualu buende? (Tangila tshimfuanyi tshia ntuadijilu.) b) Nnkonko kayi ituakonkonona?

KUELA meji bua muntu utudi banange ne kuakula buende kudi mua kukolesha bulunda buetu nende. Ke mudibi kabidi bua malanda etu ne Yehowa Nzambi. Bu muvua Davidi mulami wa mikoko, uvua ushala mutangile mutantshi mule mu diulu divua diuwule tente ne mitoto ne welangana meji bua Mufuki wabi udi kayi kufuanyikija ne muntu. Wakafunda ne: ‘Pandi ntangila diulu diebe, didi mudimu wa bianza biebe, ne ngondo ne mitoto biwakafuka; muntu udi nganyi bua wewe kumuelela meji? Ne muana wa muntu udi nganyi bua wewe udi umulama ne dinanga?’ (Mus. 8:3, 4) Panyima pa mupostolo Paulo mumane kumona muvua disua dia Yehowa bua Isalele wa mu nyuma dienda dikumbana mu mushindu wa dikema, wakakema wamba ne: “Aka! Monayi ndondo wa bubanji bua Nzambi, meji ende ne dimanya diende!”​—Lomo 11:17-26, 33.

² Patudi mu mudimu wa buambi, tudi tuela meji bua Yehowa ne tuakula bua bualu buende. Kuenza nunku kudi kutupetesha masanka. Bantu ba bungi badi benza mudimu wa bumpanda-njila mbamone ne: dimue dia ku masanka adi afumina ku divudija dia mudimu wa kuambila bakuabu lumu lua Bukalenge ndia ne: udi uvudija dinanga diabu kudi Nzambi. Nansha wewe muikale mpanda-njila mpindieu anyi ne tshipatshila etshi, konkonona bualu ebu: Mmunyi mudi mudimu wa bumpanda-njila mua kukolesha malanda ebe ne Yehowa? Biwikala mpanda-njila, diebeje ne: ‘Ntshinyi tshikala mua kungambuluisha bua kutungunuka ne mudimu eu udi upetesha masanka?’ Kadi biwikala kuyi muanji kulua mpanda-njila, diebeje ne: ‘Mmalu kayi andi mua kuakaja bua kutuadija mudimu eu?’ Tukonkononayi mishindu idi mudimu wa bumpanda-njila mua kukolesha malanda etu ne Nzambi.

3. Kuakula mu buambi bua malu mimpe ikala Bukalenge bua Nzambi mua kutupetesha kudi mua kutuambuluisha mushindu kayi?

³ Kuambila bakuabu malu mimpe ikala Bukalenge bua Nzambi mua kutupetesha kudi kutusemeja pabuipi ne Yehowa. Mmvese kayi uutu musue kuenza nende mudimu pautu uyisha ku nzubu ne ku nzubu? Pamuapa utu musue kubadila bantu Musambu wa 37:10, 11; Danyele 2:44; Yone 5:28, 29 peshi Buakabuluibua 21:3, 4. Misangu yonso itutu tuyukila ne bantu bua malu adi Nzambi mulaye aa, tutu tuvuluka ne: Nzambi wetu udi bushuwa mupeshanganyi wa “dipa dionso dimpe ne dipa dionso dipuangane.” Bualu ebu budi butusemeja pabuipi nende.​—Yak. 1:17.

4. Bua tshinyi dianyisha ditudi nadi bua buimpe bua Nzambi didi divula patudi tumona mudi bantu bakuabu bikala ne nzala ya mu nyuma?

⁴ Kumona mudi bantu batudi tuyisha bikale ne nzala ya mu nyuma kudi kukolesha dianyisha ditudi nadi bua bulelela. Pa buloba lelu, bantu kabena ne buludiki buimpe budi mua kubambuluisha bua kupeta disanka to. Ba bungi badi ne buôwa bua matuku atshidi alua ne mbapangile ditekemena. Badi bakeba kumanya tshipatshila tshia muoyo. Nansha bantu ba bungi badi mu bitendelelu badi ne dimanya dikese dia Mifundu. Mbafuanangane bikole ne bantu ba mu Ninewe wa kale. (Bala Yona 4:11.) Tuetu tuenza mudimu wa buambi bikole, tudi tumona bipepele dishilangana didi pankatshi pa nsombelu wa mu nyuma udi nende bantu batudi tuyisha ne wa bantu ba Yehowa. (Yesh. 65:13) Yehowa katu anu utukumbajila majinga etu a mu nyuma patupu to; udi upesha yonso wa kutudi mushindu wa kukoleshibua ne kupeta ditekemena dilelela.​—Buak. 22:17.

5. Kuambila bakuabu malu a Nzambi kudi mua kutuambuluisha bua kudiumvua mushindu kayi patudi ne ntatu?

⁵ Kuambila bakuabu malu a Nzambi kudi kutuambuluisha bua tuetu kubenga kuditatshisha bikole bua ntatu yetu. Tshilejilu, Trisha udi mpanda-njila wa pa tshibidilu wakamona mudi bualu ebu bulelela pavua baledi bende bashipe dibaka. Udi wamba ne: “Bualu ebu buvua bumbungamije bikole kupita malu onso amvua nawu.” Dimue dituku uvua mubungame kakese ne mumvue bua kushala musombe kumbelu, nansha nanku, wakaya bua kulonga Bible ne bana basatu bavua mu nsombelu mukole kuabu. Tatuabu uvua mubalekela ne tutuabu uvua ubakengesha bikole. Trisha udi wamba ne: “Ngakamona ne: lutatu kayi luonso lumvua nalu anyi nsamishila mutu luvua lukese bikole kupita yabu. Patuvua tulonga nabu, bavua bashala bantangile ne baseka ne disanka. Bana abu bavua dipa dia kudi Yehowa nangananga bua dituku adi.”

6, 7. a) Mmunyi mudi ditabuja dietu dikola patudi tuyisha bulelela bua mu Bible? b) Mmushindu kayi ututu tumvua patudi tumona mudi mikenji ya mu Mifundu yambuluisha balongi betu ba Bible bua kushintulula nsombelu wabu?

⁶ Kulongesha malu malelela a mu Bible kudi kukolesha ditabuja dietu. Mupostolo Paulo wakafunda bua bena Yuda ba mu matuku ende bavua bapangile bua kuenza malu avuabu balongesha bakuabu wamba ne: “Wewe udi ulongesha mukuabu, kuena udilongesha wewe muine anyi?” (Lomo 2:21) Bampanda-njila lelu mbashilangane ne bantu aba. Batu bapeta mpunga ya bungi ya kulongesha bantu bakuabu bulelela ne kulombola malonga a Bible. Bua kukumbaja mudimu eu bimpe, bidi bikengela kudilongolola bua dilonga dionso ne pamuapa kuenza makebulula bua kuandamuna nkonko. Mpanda-njila kampanda diende Janeen udi wamba ne: “Dîba dionso dindi mpeta mpunga wa kuyisha bantu bakuabu bulelela, ntu ngumvua ne: malu antu ndongesha atu abuela bikole mu lungenyi ne mu muoyo wanyi. Bua bualu ebu, ditabuja dianyi kadiena dimana to, kadi didi dienda dikola.”

⁷ Kumona mudi balongi ba Bible bashintulula nsombelu wabu padibu batumikila mikenji ya mu Bible kudi kukolesha dianyisha dietu bua meji a Nzambi. (Yesh. 48:17, 18) Bualu ebu budi butuambuluisha bua kudisuika bua kutungunuka ne kutumikila mikenji eyi mu nsombelu wetu. Mpanda-njila mukuabu diende Adrianna udi wamba ne: “Nsombelu ya bantu idi mua kubakebela ntatu padibu beyemena meji abu nkayabu. Kadi padibu batuadija  kueyemena meji a Yehowa, badi batuadija kupeta masanka diakamue.” Bia muomumue, Phil udi wamba pende ne: “Udi umona mudi Yehowa mukumbane bua kushintulula bantu bavua kabayi bakumbane bua kushintuluka mu bobu nkayabu.”

8. Mmunyi mudi kuyisha pamue ne bena Kristo netu kutukolesha?

⁸ Kuyisha pamue ne bena Kristo netu kudi kukolesha malanda etu ne Nzambi. (Nsu. 13:20) Bampanda-njila ba bungi batu bayisha mêba a bungi ne bena Kristo nabu. Kuenza nunku kudi kubapetesha mpunga ya ‘kukankamijangana.’ (Lomo 1:12; bala Nsumuinu 27:17.) Mpanda-njila mukuabu diende Lisa udi wamba ne: “Muaba untu ngenzela mudimu, bantu batu ne tshibidilu tshia kutembangana ne kumvuilangana mukawu. Dituku dionso mbipepele bua kumvua mudi bantu bajanangana ne bikale ne ngakuilu wa busenji. Benza bionso ebi anu bua kunema. Misangu mikuabu badi mua kukufuisha bundu anyi kukuseka bualu udi ne nsombelu wa buena Kristo. Kadi kuyisha pamue ne bena Kristo netu kudi bushuwa kukolesha. Padi dituku dijika, ndi mpingana kumbelu mukoleshibue, nansha meme mutshioke mushindu kayi.”

9. Padi mulume ne mukajende benza mudimu wa bumpanda-njila pamue bidi biambuluisha dibaka diabu mushindu kayi?

⁹ Kuenza mudimu wa bumpanda-njila pamue ne muena dibaka netu kudi kukolesha mionji isatu ya dibaka. (Muam. 4:12) Madeline udi wenza mudimu wa bumpanda-njila pamue ne bayende udi wamba ne: “Meme ne bayanyi tutu tupitshisha tshikondo kampanda tuyukila bua malu atudi bapete mu mudimu wa buambi anyi bua malu atudi babale mu Bible atudi mua kutumikila patudi mu buambi. Tshidimu tshionso tshitudi tuenza mudimu wa bumpanda-njila pamue, tutu tukolesha malanda etu.” Bia muomumue, Trisha udi wamba ne: “Meme ne bayanyi katutu basue kubuela mabanza to, nunku katutu tukokangana bua makuta to. Tudi ne programe wa mudimu wa diatshimue, nunku tudi tudienzeja bua kupinganyina bantu ne  kulombola malonga a Bible, kuenza nunku kudi kutuambuluisha bua kukolesha dibaka dietu.”

10. Patudi tuteka malu a Bukalenge pa muaba wa kumpala ne tumona mudi Nzambi utukuatshisha, mmunyi mudi dieyemena dietu kudiye dikola?

¹⁰ Dieyemena dietu kudi Yehowa didi dikola patudi tuteka malu a Bukalenge pa muaba wa kumpala, tumona mudiye utukuatshisha ne mudiye wandamuna masambila etu. Mu mushindu kampanda, bualu ebu butu bukumbanyina bena Kristo badi balamate Nzambi. Kadi bantu badi benza mudimu wa bumpanda-njila mbamone mudi kueyemena Yehowa mua kubambuluisha bua kushala mu mudimu wa bumpanda-njila. (Bala Matayi 6:30-34.) Curt udi mpanda-njila ne wenza mudimu bu mutangidi wa tshijengu muambuluishi wakitaba bua kuenza luendu lua mêba abidi ne tshitupa bua kuya kukumbula tshisumbu kampanda. Yeye ne mukajende udi pende mpanda-njila bavua ne kasolonyi kakumbane mu mashinyi abu bua kuya mu tshisumbu atshi kadi kakayi kakumbana bua kupingana to, ne kuvua kushala lumingu lumue bua kumufutabu ku mudimu wende. Curt udi wamba ne: “Ngakatuadija kudiebeja bikala dipangadika dimvua muangate dimpe.” Panyima pa bobu bamane kusambila, bakangata dipangadika dia kukumbaja mudimu eu, bashindike ne: Nzambi uvua ne bua kubakumbajila majinga abu. Pakavuabu pa kuya, muanetu wa bakaji mukuabu wakababikila ne kubambila ne: uvua ne tshintu kampanda tshia kubapesha. Wakabapesha makuta anu bungi buvuabu nabu dijinga bua luendu luabu. Curt udi usakidila ne: “Paudi upeta malu a buena aa ku musangu ne ku musangu, mbipepele bua kumona mudi Yehowa utuambuluisha.”

11. Ngamue masanka kayi atu bampanda-njila bapeta?

¹¹ Eyowa, bampanda-njila batu bamona misangu ya bungi ne: padibu badifila ne muoyo mujima mu mudimu wa Yehowa ne bakolesha malanda abu nende, badi ‘bapeta’ masanka adi bu musulu udi kawuyi ukama. (Dut. 28:2) Kadi mudimu wa bumpanda-njila utu pawu ne ntatu. Mutendeledi yonso wa Nzambi utu anu upeta ntatu idi mikebesha kudi buntomboji bua Adama. Nansha mudi bamue bampanda-njila bamona ne: badi mua kuanji kulekela mudimu bua tshikondo kampanda, kudi anu mushindu wa kupita bimpe ne ntatu anyi kuyepuka. Tshidi mua kuambuluisha bampanda-njila bua kutungunukabu ne kuenza mudimu wabu ntshinyi?

12, 13. a) Ntshinyi tshidi mpanda-njila mua kuenza yeye ne lutatu lua kukumbaja mêba adibu bamulombe? b) Bua tshinyi programe wa kubala Bible dituku dionso, kudilongela ne kuelangana meji udi ne mushinga?

¹² Bampanda-njila ba bungi batu ne bia bungi bia kuenza. Bidi mua kubakolela bua kukumbaja malu onso, nunku kudilongolola kuimpe kudi ne mushinga. (1 Kol. 14:33, 40) Mpanda-njila yeye ne lutatu bua kukumbaja mêba adibu bamulomba, mbimpe akonkonone kabidi mushindu udiye ukuata mudimu ne dîba diende. (Ef. 5:15, 16) Udi mua kudikonka ne: ‘Ndîba bungi kayi dintu mpitshisha mu dijikija dia lutetuku ne mu malu a tshianana? Ndiku mua kudienzeja bikole bua kudipangisha amue malu anyi? Ndiku mua kuakaja programe wa mudimu wanyi wa bianza anyi?’ Muena Kristo yonso udi mua kuitaba ne: bitu bipepele bua kukumbaja malu makuabu mu programe wetu; nunku bampanda-njila badi mua kutangila ku musangu ne ku musangu malu atubu benza ne kuakaja padibi bikengela.

¹³ Dibala dia Bible dituku dionso, didilongela ne dielangana meji mmalu adi ne bua kuikala mu programe wa mpanda-njila. Nunku, mpanda-njila udi ne bua kudienzeja bua malu a mushinga mukese kaangatshi dîba divuaye mulongolole bua kuenza malu a mushinga aa to. (Filip. 1:10) Tshilejilu, fuanyikijabi mpanda-njila upingana kumbelu panyima pa yeye mumane kuyisha dituku dijima. Udi ujinga bua alongolole bisangilu bia musangu walonda dilolo adi. Kadi, udi wanji ubala mesaje. Pashishe, udi ukangula ordinatere, ubala mesaje adibu bamufundile ne wandamuna. Patshidiye mukangule ordinatere, udi uya site wa Enternete bua kumona bikala mushinga wa tshintu kampanda tshivuaye ukeba kusumba mupueke. Udi upapukila ukadi muenze mêba matue ku abidi kayi muanji kutuadija kulongolola bisangilu bivuaye musue kulongolola dilolo adi. Bua tshinyi kudi  tshilumbu mu bualu ebu? Banyemi ba lubilu bapiluke badi ne bua kutabalela bimpe mibidi yabu bobu basue kunenga mu mudimu eu. Bia muomumue, bampanda-njila badi ne bua kuikala ne tshibidilu tshia kudia bimpe biakudia bia mu nyuma pa kudilongela bua kutungunuka ne mudimu wabu.​—1 Tim. 4:16.

14, 15. a) Bua tshinyi bampanda-njila badi ne bua kuikala ne nsombelu mupepele? b) Mpanda-njila yeye mupete ntatu, udi ne bua kuenza tshinyi?

¹⁴ Bampanda-njila bimpe batu badienzeja bua kuikala ne nsombelu mupepele. Yezu wakakankamija bayidi bende bua kuikala ne dîsu dimpe. (Mat. 6:22) Wakenza bua nsombelu wende ikale mupepele bua kukumbajaye mudimu wende kakuyi tshipumbishi. Wakamba ne: “Mikenge idi ne mena ayi, nyunyi ya muulu idi ne masua, kadi Muana wa muntu kena ne muaba wa kuteka mutu.” (Mat. 8:20) Mbimpe mpanda-njila udi musue kulonga malu ku diambuluisha dia tshilejilu tshia Yezu amanye ne: yeye ne bintu bia bungi, nebimulomba bua kubilama, kubilongoluesha ne kukeba bikuabu bua kupingaja pa bia kale.

¹⁵ Bampanda-njila mbamanye ne: mudimu wabu ngua pa buawu, kadi kabena badiangata bu bapite bakuabu to. Kadi mbamanye ne: mudimu wa bumpanda-njila ndipa dia kudi Yehowa. Nunku, bua bobu kushala mu mudimu eu, yonso wa kudibu udi ne bua kueyemena Yehowa. (Filip. 4:13) Badi mua kupeta ntatu ne makenga. (Mus. 34:19) Biobi bienzeke nanku, bampanda-njila badi ne bua kulomba Yehowa buludiki ne kumupesha mpunga wa kufila diambuluisha, pa mutu pa kulekela ne lukasa diakalenga didibu nadi dia kuenza mudimu eu. (Bala Musambu wa 37:5.) Padibu bamona mudi Nzambi ubambuluisha ne dinanga, nebasemene pabuipi nende, ne nebamumone bu Tatuabu wa mu diulu udi ubatabalela.​—Yesh. 41:10.

16. Wewe musue kulua mpanda-njila, udi ne bua kuenza tshinyi?

¹⁶ Wewe musue pebe kupeta masanka a buena adi bampanda-njila bapeta, leja Yehowa dijinga diebe. (1 Yone 5:14, 15) Yukila ne bampanda-njila. Tuadija kuenza malu akuambuluisha bua kulua mpanda-njila. Ke tshivua Keith ne Erika benze. Mudimu wabu wa bianza uvua ubangata mêba a bungi. Anu bu bena mabaka ba bungi ba mulongo wabu, bakasumba nzubu ne mashinyi mapiamapia matuku makese panyima pa bobu bamane kuselangana. Badi bamba ne: “Tuvua tuela meji ne: bintu ebi bivua mua kutupetesha disanka, kadi kabiakatupeteshadi to.” Pakafua mudimu wa Keith, wakalua mpanda-njila muambuluishi. Udi uvuluka wamba ne: “Mudimu wa bumpanda-njila wakamvuluija mudi mudimu wa kuyisha upetesha disanka dia bungi.” Bakadia bulunda ne bena mabaka bakuabu bavua babambuluishe bua kumona disanka didi difumina ku dikala ne nsombelu mupepele ne ku dienza mudimu wa bumpanda-njila. Keith ne Erika bakenza tshinyi? Badi bamba ne: “Tuakafunda bipatshila bietu bia mu nyuma pa dibeji ne kudilamika ku frigo wetu, tuvua tutangila tshipatshila tshionso tshituvua tukumbaja.” Pakapita matuku, bakalua bampanda-njila.

17. Bua tshinyi mbimpe kuakaja programe webe anyi nsombelu webe bua kulua mpanda-njila?

¹⁷ Udiku pebe mua kulua mpanda-njila anyi? Wewe mumone ne: kuena mua kukumbana mpindieu, enza tshionso tshiudi mua kuenza bua kusemena bikole pabuipi ne Yehowa pa kuikala ne tshibidilu tshia kuyisha bikole. Panyima pa wewe mumane kusambila ne muelangane meji bua bualu ebu, udi mua kumona ne: kuakaja amue malu mu programe webe anyi mu nsombelu webe kudi mua kukuambuluisha bua kulua mpanda-njila. Wewe ne mushindu wa kulua mpanda-njila, masanka awapeta neikale a bungi kupita bualu kayi buonso buwikala mua kudipangisha. Neupete disanka dia bungi didi difumina ku diteka bipatshila bia Bukalenge kumpala kua biebe. (Mat. 6:33) Neumone muikala disanka didi difumina ku dipesha bakuabu divula. Neupete kabidi mpunga ya bungi ya kuela meji bua Yehowa ne kuakula bua bualu buende, neumunange bikole ne neumusankishe.