ERNEST udi ne bidimu 70 ne pamutu udi wamba ne dibungama ne: “Ndi ngenda mpeta masama ku musangu ne ku musangu mu nsombelu wanyi.” * Ukadiku mumvue muntu wamba mêyi a buena aa anyi? Biwikala wenda ukulakaja, ne umona mudi bukole buebe bua mubidi buenda buteketa, mêyi adi mu Muambi nshapita wa 12 adi akukumbanyina. Mu mvese wa 1, badi babikila bikondo bia bukulakaje ne: “matuku mabi.” Nansha nanku, ki mbalongolole bua wikale ukenga to. Udi mua kuikala anu ne nsombelu muimpe, wenzela Yehowa mudimu ne disanka.

Nuenu bana betu ba balume ne ba bakaji bakadi bakulakaje, kanuena nkayenu mu ntatu yenu to. Batendeledi ba Yehowa ba kale bakavua bakulakaje bavua pabu bapete ntatu ya muomumue. Tshilejilu, Izaka, Yakoba ne Ahiya kabatshivua bamona kabidi bimpe to. (Gen. 27:1; 48:10; 1 Bak. 14:4) Sala wakadiumvua “mukoke.” (Gen. 18:11, 12) Mukalenge Davidi ‘katshivua umvua luya to.’ (1 Bak. 1:1) Bâzilai uvua mubanji katshivua kabidi umvua muenya wa biakudia anyi katshivua kabidi umvua mêyi a mizike. (2 Sam. 19:32-35) Abalahama ne Naomi bavua ne bua kutantamena lutatu lua difuisha bena dibaka nabu.​—Gen. 23:1, 2; Luta 1:3, 12.

Ntshinyi tshivua tshiambuluishe yonso wa kudibu bua kushala ne lulamatu kudi Yehowa ne kulama disanka? Pakavua Abalahama mukulakaje, uvua mueyemene mulayi wa Nzambi, ne “wakalua ne bukole bua ditabuja diende.” (Lomo 4:19, 20) Tuetu petu tudi dijinga ne ditabuja dikole. Bungi bua bidimu bietu, mamanya etu anyi nsombelu wetu kabiena mua kutupetesha ditabuja dia nunku to. Tshilejilu, nansha mukavua Yakoba mukoke, mulue mpofu ne mutshibukile panshi, wakaleja muvuaye ne ditabuja dikole mu milayi ya Nzambi. (Gen. 48:1-4, 10; Eb. 11:21) Lelu, Ines udi ne bidimu 93, udi ne disama dia misunyi yenda iteketa, kadi udi wamba ne: “Yehowa udi umbenesha dituku dionso. Dituku dionso ntu ngela meji bua Mparadizu. Kuenza nunku kudi kumpesha ditekemena.” Muanetu eu udi ne lungenyi luimpe be!

Tudi tukolesha ditabuja dietu patudi tusambila, tulonga Dîyi dia Nzambi ne tubuela mu bisangilu. Muprofete Danyele ukavua mukulakaje uvua ne tshibidilu tshia kusambila misangu isatu ku dituku, ne uvua utungunuka ne kulonga Dîyi dia Nzambi. (Dan. 6:10; 9:2) Ana mukaji mukamba ukavua mukulakaje “kavua upangika ku ntempelo.” (Luka 2:36, 37) Paudi ubuela mu bisangilu dîba kayi dionso, ne wenza muebe muonso bua kufilamu mandamuna, kuena anu udikolesha nkayebe, kadi udi ukolesha kabidi bakuabu badimu. Yehowa utu anu wanyisha masambila ebe, nansha wewe kuyi ne bukole bua kuenza malu onso.​—Nsu. 15:8.

Ba bungi ba kunudi badi ne lulamatu batu basue kumona, kubala ne kuikala ne makanda makumbane bua kubuelabu mu bisangilu, kadi nudi numona ne: bidi anu bienda bikola ne pamuapa kakuyi mushindu nansha mukese wa kuenza nanku. Mpindieu tshia kuenza ntshinyi? Enza mudimu bimpe ne tshintu tshionso tshiudi natshi. Ba bungi batu kabayi ne mushindu wa kubuela mu bisangilu batu basue kubitelejila ku telefone. Nansha muvua muanetu wa bakaji Inge ne bidimu 79 katshiyi umona kabidi bimpe, uvua ulongolola bisangilu ku diambuluisha dia mabeji avua ne malu mafunda mu maleta manene avuabu bamupatuile ku ordinatere kudi muanetu wa balume wa mu tshisumbu tshiabu.

Pamuapa udi mua kuikala ne tshintu tshitu bakuabu basue kuikala natshi, tshintu atshi ndîba diudi nadi. Kuenaku mua kuenza nadi mudimu bua kuteleja mêyi makuata a malu a mu Bible, a mikanda yetu idi yumvuija Bible, a miyuki ne kuteleja drama anyi? Udi kabidi mua kubikila bena Kristo nebe bua kupeshangana nabu kupa kua nyuma ne bua nuenu ‘kukankamijangana munkatshi muenu.’​—Lomo 1:11, 12.

Christa udi ne bidimu 80 ne pamutu udi wamba ne dibungama ne: “Dikepesha tshisumi tshiuvua natshi mbualu bubi menemene.” Mmunyi mudi bakulakaje mua kulama disanka diabu? Peter udi ne bidimu 75 udi wamba ne: “Bidi bikengela nuikale ne mmuenenu muimpe, kanuyi nutamba kuela meji bua tshinudi kanuyi mua nukumbaja kabidi, kadi nusanke bua tshinudi mua kukumbaja.”

Udiku mua kuela meji bua mishindu ya kuyisha iudi mua kukokesha anyi? Heidi kena ukumbana bua kuyisha ku nzubu ne ku nzubu bu muvuaye wenza kumpala to. Kadi pakavuaye ne bidimu 80 ne pamutu, wakalonga bua  kuenza mudimu ne ordinatere bua kufunda mikanda. Bamue bamanyishi bakadi bakulakaje mbatuadije kuyukila malu a mu Bible ne bantu padibu basomba pa tshibasa tshia ku lupangu lua nyama anyi muaba utu mashinyi imanyina. Biwikala musombele mpindieu mu nzubu ya dilamina bakulakaje, kuenaku mua kukeba pikalaku mushindu bua kupeta “teritware” udi ne baminganga badi banulama ne bantu bakuabu ba muaba au anyi?

Pakavua Mukalenge Davidi mukulakaje bikole menemene, wakayisha ntendelelu mukezuke kumpala. Wakafila bintu ne kulongololaye malu bua bibake ntempelo. (1 Kul. 28:11–29:5) Bia muomumue, udi mua kuikala mumanye malu adi enda enzeka mu mudimu wa Bukalenge udi wenzeka pa buloba bujima, nanku enza pebe tshiudi mua kuenza bua kuwutua mpanda. Kuenaku mua kuambuluisha bampanda-njila anyi bambi ba lumu luimpe ba tshisumi badi mu tshisumbu tshienu ne mêyi a kubakankamija nawu, kubapeshaku tshintu kampanda tshiudi natshi, biakudia anyi biakunua biudi mua kupeta anyi? Paudi usambila, udi mua kutela bansonga ne bena mu mêku, badi benza mudimu wa ku dîba ne ku dîba, badi basama ne aba badi ne majitu manene.

Nzambi udi ukuangata wewe ne mudimu uudi wenza ne mushinga wa bungi. Nuenu bana betu bakadi bakulakaje, Tatu wetu wa mu diulu kakunulekela nansha kakese. (Mus. 71:9) Yehowa mmununange bikole menemene. Mu katupa kîpi emu, bidimu bietu tuetu bonso nebikale bienda bivula katuyi tupeta tunyinganyinga anyi ntatu. Kadi, netutungunuke ne kuenzela Yehowa Nzambi wetu wa dinanga mudimu bua kashidi ne kashidi, bikale ne makanda a bungi ne mubidi kawuyi kalema.