1, 2. a) Bua tshinyi udi mutuishibue ne: Yehowa mmunange bantu bende? b) Yehowa uvua mufuke bantu ne dijinga kayi?

NTSHINYI tshidi tshikujadikila ne: Yehowa mmunange bantu bende? Kumpala kua wewe kuandamuna lukonko elu, anji angata bilejilu ebi: Bana betu ba balume ne ba bakaji bavua bakankamije muanetu wa bakaji kampanda diende Taylene ne bulenga buonso munkatshi mua bidimu bia bungi. Bakamuambila bua katambi kuditatshisha bua bidiye kayi mua kukumbaja. Udi wamba ne: “Bu Yehowa kayi munnange, kavua mua kutungunuka ne kumbela nunku to.” Brigitte, muanetu wa bakaji uvua udikoleshila bana babidi nkayende panyima pa lufu lua bayende udi wamba ne: “Kukolesha bana mu bulongolodi bua Satana ndumue lua ku ntatu mikole, nangananga bua muledi udi udikoleshila bana nkayende. Kadi ndi mutuishibue ne: Yehowa mmunnange bualu mmundombole mu bikondo bia muadi ku mêsu ne bia tunyinganyinga, ne katu muanji kundekela mpeta lutatu lundi tshiyi mua kutantamena to.” (1 Kolinto 10:13) Sandra udi ne disama kampanda dikole didibu kabayi mua kuondopa. Mu mpungilu kampanda, muanetu wa bakaji  mukuabu wakatabalela Sandra. Bayende wa Sandra udi wamba ne: “Nansha mutuvua katuyi bamumanye bimpe, mushindu uvuaye muditatshishe ne muoyo mujima bua Sandra uvua mutusankishe bikole. Padi bana betu ba balume ne ba bakaji batuleja dinanga nansha mu malu makese, bidi bindeja mudi Yehowa mutunange bikole.”

² Yehowa uvua mufuke bantu ne dijinga dia kunangangana ne kudiumvua banangibue. Kadi mbipepele bua kuteketa mu mikolo bua disama, bua ntatu ya dipangila makuta anyi bualu katuena tupatula bipeta bimpe mu mudimu wa buambi. Tuetu batuadije kudiumvua ne: Yehowa ki mmutunange kabidi, tudi ne bua kuvuluka ne: tudi ne mushinga wa bungi ne udi pabuipi netu mutukuate ku tshianza tshietu tshia balume ne utuambuluisha. Tuetu bamulamate, kakutupua muoyo nansha kakese.​—Yeshaya 41:13; 49:15.

3. Ntshinyi tshidi mua kukolesha dishindika dietu dia ne: dinanga didi Yehowa mutunange ndia kashidi?

³ Bantemu batukadi batele ku ntuadijilu bavua batuishibue ne: Nzambi uvua nabu mu bikondo bia ntatu. Tudi petu mua kuikala ne dishindika dia muomumue dia ne: udi netu. (Musambu 118:6, 7) Mu tshiena-bualu etshi netuakule bua bintu binayi bidi bileja mudi Yehowa mutunange: 1) bifukibua biende, 2) Bible, 3) disambila, ne 4) tshia kupikula natshi. Kuelangana meji bua bintu bimpe bidi Yehowa muenze kudi mua kutuambuluisha bua kuikala ne dianyisha dia bungi bua dinanga diende didi dishala kashidi.​—Bala Musambu wa 77:11, 12.

4. Ntshinyi tshidi bifukibua bia Yehowa bitulongesha?

⁴ Patudi tutangila bintu bidi Yehowa mufuke, tudi tumona mudiye mutunange bikole. (Lomo 1:20) Tshilejilu, Yehowa uvua muenze buloba bua bantu basombapu ne bua benze kabidi malu makuabu. Mmutupeshe tshintu tshionso tshitudi natshi dijinga bua muoyo utusankishe. Tudi dijinga ne kudia, kadi Yehowa mmutupeshe biakudia bishilashilangane bidi bienza bua kudia kuikale kusankisha. (Muambi 9:7) Muanetu wa bakaji kampanda diende Catherine udi usanka bua bidiye umona mu bufuki, nangananga mu muvu utu bintu bisampila mu Canada. Udi wamba ne: “Bitu bushuwa bikemesha bua mudi tshintu tshionso tshipetulula muoyo: bilongo bidi ne bua kupatuka mu buloba ne nyunyi idi ipingana ifuma ku luendu luayi, ne mudi kanyunyi ka kasonji kapetulula njila waku bua kulua kudia mu tshidiilu tshia tunyunyi tshidi pambelu ku dididishi dia tshikuku tshianyi. Yehowa mmutunange bua mudiye mutupeshe bintu bidi bitusankisha bikole.” Tatu wetu mmunange bifukibua biende, ne mmusue bua bitusankishe tuetu petu.​—Bienzedi 14:16, 17.

5. Mmunyi mudi dinanga dia Yehowa dimuenekela mu mushindu udiye mufuke bantu?

⁵ Yehowa mmutufuke ne bukole bua kuenza mudimu muimpe ne kuikala ne disanka mu mudimu eu. (Muambi 2:24) Uvua mupeshe bantu mudimu wa kuwuja buloba, kubudima, ne wa kulama mishipa, nyunyi ne bintu bikuabu bidi ne muoyo pa buloba. (Genese 1:26-28)  Mmutufuke kabidi ne ngikadilu mimpe bua tumone mua kumuidikija.​—Efeso 5:1.

6. Bua tshinyi tudi ne bua kuikala ne dianyisha dia bungi bua Dîyi dia Nzambi?

⁶ Yehowa mmutupeshe Bible bualu mmutunange bikole. Bible udi utuleja malu atudi ne bua kumanya bua Nzambi ne mudiye umvua bua bantu. Tshilejilu, Bible udi utuambila muvua Yehowa mumvue bua bena Isalele bavua babenge kumutumikila misangu ne misangu. Musambu wa 78:38 udi wamba ne: ‘Yeye wakadi muwule tente ne luse, wakababuikidila tshitshu tshiabu, kakababutula. Bulelela, yeye wakakanda tshiji tshiende misangu ya bungi, kakasonsola tshiji tshiende tshionso nansha.’ Kuelangana meji pa mvese eu kudi mua kukuambuluisha bua kumona mudi Yehowa mukunange ne uditatshisha bua bualu buebe. Tuikale bashindike ne: Yehowa udi  uditatshisha bikole bua bualu buetu.​—Bala 1 Petelo 5:6, 7.

7. Bua tshinyi tudi ne bua kuangata Bible ne mushinga wa bungi?

⁷ Tudi ne bua kuangata Bible ne mushinga wa bungi. Bua tshinyi? Bualu Yehowa udi uyukila netu ku diambuluisha dia Dîyi diende. Padi muledi ne muanende bayukila badilekelele, badi bakolesha dinanga diabu ne beyemenangana. Yehowa n’Tatu wetu wa dinanga. Nansha mututu katuyi banji kumumona anyi kumvua dîyi diende, bidi anu bu ne: utu uyukila netu buludiludi ku diambuluisha dia Bible. Tudi ne bua kutungunuka ne kumuteleja. (Yeshaya 30:20, 21) Patudi tubala Dîyi dia Nzambi, tudi tufika ku dimanya Yehowa ne tumueyemena, yeye udi utulombola ne utulama.​—Bala Musambu wa 19:7-11; Nsumuinu 1:33.

8, 9. Ntshinyi tshidi Yehowa musue bua tumanye? Fila tshilejilu tshia mu Bible.

⁸ Yehowa mmusue bua tumanye ne: mmutunange ne kena wimanyina anu pa mapanga etu to. Udi ukeba anu bua kumona malu mimpe adi munda muetu. (2 Kulondolola 16:9) Tuangate tshilejilu tshia muvua Yehowa mumone malu mimpe avua munda mua mukalenge wa Yuda Yehoshafata. Yehoshafata wakangata dipangadika dibi dia kudisangisha ne mukalenge wa Isalele Ahaba bua kuluangana ne bena Sulia ku Lamota-gilada. Nansha muvua baprofete ba dishima 400 bambile Ahaba muntu mubi ne: uvua ne bua kutshimuna mvita, Mikaya muprofete mulelela wa Yehowa wakambila Yehoshafata ne Ahaba ne: bobu baluangane, bavua ne bua kubatshimuna. Ke tshiakenzeka menemene. Ahaba wakafua mu mvita, kadi Yehoshafata wakapanduka buoya ku tshibala. Pakajika mvita, Yehowa wakatuma Yehu bua kubela Yehoshafata bua tshilema tshivuaye muenze. Nunku Yehu wakamuambila kabidi ne: “Malu mimpe makuabu adi munda muebe.”​—2 Kulondolola 18:4, 5, 18-22, 33, 34; 19:1-3.

⁹ Bidimu bia bungi kumpala, Yehoshafata ukavua muambile bantu bende banene, bena Lewi, ne bakuidi bua kuya mu bimenga bionso bia mu Yuda bua kulongeshabu bantu mikenji ya Yehowa. Bavua benze mudimu wabu bimpe bualu too ne bantu ba mu bisamba bikuabu bakafika ku dimanya Yehowa. (2 Kulondolola 17:3-10) Kadi nansha muvua Yehoshafata mulue kuangata dipangadika dibi pashishe, Yehowa kavua mupue muoyo malu mimpe avuaye muenze kumpala mu nsombelu wende to. Tshilejilu etshi tshidi tshitukolesha bikole bualu imue misangu tutu tuenza bilema. Kadi, tuetu benzele Yehowa mudimu ne muetu muonso, neatungunuke ne kutunanga ne kakupua malu mimpe atudi benze muoyo to.

10, 11. a) Bua tshinyi disambila ndipa dia pa buadi dia kudi Yehowa? b) Mmunyi mudi Nzambi wandamuna masambila etu? (Tangila tshimfuanyi tshia ntuadijilu.)

¹⁰ Tatu muimpe utu pabuipi bua kuteleja bana bende padibu bajinga kumuambila bualu. Utu musue kumanya mudibu badiumvua, bualu udi uditatshisha bikole bua bualu buabu. Yehowa, Tatu wetu wa dinanga utu wenza bia muomumue. Utu ututeleja patudi tumusambila. Kuyukila ne Tatu wetu ndiakalenga dinene be!

¹¹ Tudi mua kusambila Yehowa dîba dionso ditudi basue. Mmulunda wetu, ne utu anu pabuipi bua kuteleja masambila etu. Taylene utukadi batele udi wamba ne: “Udi mua kumuambila bualu kayi buonso.” Patudi tuambila Yehowa malu adi munda muetu, udi mua kutuandamuna ku diambuluisha dia mvese, dia tshiena-bualu kampanda tshia mu mikanda  yetu, anyi ku diambuluisha dia dikankamija dia kudi muanetu kampanda wa balume peshi wa bakaji. Yehowa utu uteleja milombu yetu mienza ne muoyo mujima, ne utu utumvuila nansha padi muntu nansha umue kayi mua kuenza nanku. Mushindu udiye wandamuna masambila etu udi uleja mudi dinanga diende kutudi didi dishala kashidi.

12. Bua tshinyi tudi ne bua kulonga masambila adi mu Bible? Fila tshilejilu.

¹² Tudi mua kupeta malongesha a mushinga mukole mu masambila adi mu Bible. Imue misangu mbimpe kulonga amue a ku masambila aa mu ntendelelu wa mu dîku. Tuetu tuelangana meji bua masambila avua batendeledi ba Nzambi ba kale benze ne muoyo mujima, netulengeje masambila etu. Tshilejilu, longa disambila divua Yona muenze ne budipuekeshi pavuaye munda mu mushipa munene. (Yona 1:17–2:10) Konkonona disambila divua Solomo muenzele Yehowa ne muoyo mujima pavuabu babanjija ntempelo. (1 Bakelenge 8:22-53) Pashishe elangana meji bua disambila dia Yezu dia tshilejilu. (Matayi 6:9-13) Bualu bua mushinga mukole budi ne: tuikale ne tshibidilu tshia ‘kumanyisha Nzambi milombu yetu.’ Nunku, “ditalala dia Nzambi didi dipite dijingulula dionso dia malu nedilame mioyo yenu ne lungenyi luenu.” Dianyisha ditudi nadi bua dinanga dia Yehowa didi dishala kashidi neditungunuke anu ne kukola.​—Filipoyi 4:6, 7.

13. Tshia kupikula natshi tshidi tshipetesha bantu mpunga kayi?

¹³ Yehowa wakatupesha dipa dia tshia kupikula natshi bua “tupete muoyo.” (1 Yone 4:9) Mupostolo Paulo wakafunda bua mushindu muimpe uvua Nzambi muleje dinanga eu ne: “Kristo wakafua bua bantu babi mu tshikondo tshijadika. Mbualu bukole bua muntu kufuila muntu muakane; bulelela, imue misangu muntu udi mua kuitaba bua kufuila muntu muimpe. Kadi Nzambi wakaleja dinanga diende kutudi mu bualu ebu ne: patutshivua benji ba malu mabi Kristo wakafua bua bualu buetu.” (Lomo 5:6-8) Tshia kupikula natshi ntshilejilu tshitambe bunene tshia dinanga dia Nzambi ne tshidi tshipesha bantu mpunga wa kukoleshabu malanda abu nende.

14, 15. Tshia kupikula natshi tshidi ne mushinga kayi kudi a) bena Kristo bela manyi? b) bantu badi ne ditekemena dia kupeta muoyo pa buloba?

¹⁴ Bena Kristo ba mu kasumbu kakese badi bumvua mudi Yehowa ubaleja dinanga diende didi dishala kashidi mu mushindu wa pa buawu. (Yone 1:12, 13; 3:5-7) Nzambi mmubele manyi a nyuma muimpe, bua bualu ebu mbalue bana bende. (Lomo 8:15, 16) Bu mutshidi bamue ba kudibu pa buloba, bua tshinyi Paulo uvua muambe ne: bavua basombe “pamue mu miaba ya mu diulu mu buobumue ne Kristo Yezu”? (Efeso 2:6) Bualu Yehowa mmubapeshe ditekemena dia kupeta muoyo wa tshiendelele mu diulu.​—Efeso 1:13, 14; Kolosayi 1:5.

¹⁵ Bantu bonso badi kabayi bedibue manyi a nyuma muimpe badi mua kulua balunda ba Nzambi bobu baleje ditabuja mu tshia kupikula natshi. Badi pabu ne mushindu wa kuangatshibua bu bana ba Nzambi ne wa kusomba  tshiendelele mu mparadizu pa buloba. Tshia kupikula natshi tshidi tshileja mudi Yehowa munange bantu bonso. (Yone 3:16) Bidi bituenza disanka bua kumanya ne: tuetu benzele Nzambi mudimu ne lulamatu luonso, neatupeshe muoyo mutambe buimpe mu bulongolodi bupiabupia. Nunku tulejayi ne: tudi tuangata ne mushinga tshia kupikula natshi tshidi tshikale tshijadiki tshinene tshia dinanga dia Nzambi didi dishala kashidi kutudi.

16. Kuelangana meji bua dinanga dia Nzambi nekutusake bua kuenza tshinyi?

¹⁶ Katuena mua kukokesha bua kubala bungi bua mishindu idi Yehowa utuleja dinanga to. Mukalenge Davidi wakamba ne: ‘Nzambi, mona mudi meji ebe mikale a mushinga mukole kundi! Mona mudi bungi buawu bupite bunene! Bu meme muabale, akadi kupita lusenga bungi.’ (Musambu 139:17, 18) Kuelangana meji bua mishindu ya bungi idi Yehowa mutunange nekutusake bua tuetu kumunanga petu ne kumupesha bintu bitambe buimpe bitudi nabi.

17, 18. Ngimue mishindu kayi itudi mua kuleja mutudi banange Nzambi?

¹⁷ Kudi mishindu ya bungi ya kuleja mutudi banange Yehowa. Tshilejilu, tudi mua kuleja mutudi banange Yehowa patudi tuambila bakuabu lumu luimpe lua Bukalenge ne tshisumi. (Matayi 24:14; 28:19, 20) Tudi kabidi mua kuleja mutudi banange Nzambi patudi tutantamena ne lulamatu ntatu idi iteka ditabuja dietu mu diteta. (Bala Musambu wa 84:11; Yakobo 1:2-5.) Nansha ntatu yetu yoyi mikole menemene, tuikale batuishibue ne: Yehowa mmumone makenga etu ne neatuambuluishe bualu udi utuangata ne mushinga.​—Musambu 56:8.

¹⁸ Dinanga dietu bua Yehowa didi ditusaka bua kuelangana meji bua bintu bionso bimpe bidiye mufuke. Tudi tuleja mutudi banange Yehowa ne Dîyi diende pa kuikala balongi bimpe ba Bible. Tudi tusambila Yehowa pa tshibidilu bualu tudi bamunange ne bualu tudi basue kukolesha malanda etu nende. Patudi tuelangana meji bua dipa diende dia mushinga mukole dia tshia kupikula natshi, dinanga ditudi nadi kudiye didi dikola kabidi bikole. (1 Yone 2:1, 2) Eyi idi anu imue ya ku mishindu itudi tuleja Yehowa ne: tudi tuangata ne mushinga dinanga diende didi dishala kashidi.