Malu adi Yezu utulongesha

Bua nsombelu wa bena mu dîku

Mmushindu kayi udi bantu ne bua kumona dibaka bua kuikalabu ne disanka mu mêku abu?

Dibaka ntshintu tshia tshijila. Pakebejabu Yezu bikala kushipa dibaka kuanyishibue, wakamba ne: ‘Nuenu kanuakabala ne: Ku tshibangidilu mufuki wakabafuka mulume ne mukaji, mufuki wakamba ne: Bua bualu ebu mulume neashiye tatuende ne mamuende, nealamate kudi mukajende; bubidi buabu nebalue mubidi umue anyi? Nunku kabena bantu babidi kabidi, badi mubidi umue. Bua bualu ebu muntu kapanduludi tshidi tshibumbakaja kudi Nzambi. Umusha mukajende kabuyi bua masandi, pabakaye mukaji mukuabu, yeye udi wenda masandi.’ (Matayo 19:4-6, 9) Padi mulume ne mukaji balonda mubelu wa Yezu eu, ne bashala balamatangane, nebikale ne nsombelu muimpe mu dibaka.

Bua tshinyi bena mu dîku badi bapeta disanka padibu banange Nzambi?

Yezu wakamba ne: ‘Sua Mukalenge Nzambi webe ne mutshima webe wonso ne muoyo webe wonso ne lungenyi luebe luonso. Ke mukenji munene, udi wa kumudilu.’ Mmukenji kayi muibidi udi munene? Yezu wakamba ne: ‘Sua mukuenu [pamue ne bena mu dîku diebe] bu muudi mudisue.’ (Matayo 22:37-39) Nunku bua bena mu dîku kusombabu bimpe, badi ne bua kunanga Nzambi bualu dinanga dia Nzambi didi dibasaka bua kunanganganabu.

 Mmushindu kayi udi mulume ne mukaji mua kuenzelangana malu adi abasankisha bonso?

Balume badi basankisha bakaji babu padibu balonda tshilejilu tshia Yezu. Yezu uvua munange ne muoyo mujima mukajende wa mu tshimfuanyi udi muikale tshisumbu, ne uvua udifila bikole bua bualu buatshi. (Efeso 5:25) Wakamba ne: “Muana wa muntu kakuluila bua bantu bamukuatshile mudimu, wakuluila bua kubakuatshila mudimu.” (Matayo 20:28) Yezu kavua wenzeja bantu bavua ku bukokeshi buende malu ku bukole to, kadi uvua ubambuluisha. (Matayo 11:28) Nunku, balume badi ne bua kukokesha mu mushindu muimpe udi wambuluisha bena mu dîku bonso.

Tshilejilu tshia Yezu tshidi kabidi mua kuambuluisha bakaji. Bible udi wamba ne: ‘Mutu wa Kristo udi Nzambi.’ Udi kabidi wamba ne: ‘Mutu wa mukaji yonso udi mulume.’ (1 Kolinto 11:3) Yezu kavua umona kukokela Nzambi kumutondesha nsombelu to. Uvua unemeka Tatuende bikole. Wakamba ne: “Matuku onso ntu ngenza malu adi amusankisha.” (Yone 8:29) Mukaji udi ukokela bumfumu bua bayende bualu mmunange Nzambi ne umunemeka, udi wambuluisha bua dîku kuikaladi ne disanka.

Ntshinyi tshidi baledi mua kulongela ku mushindu uvua Yezu umona bana?

Yezu uvua usomba ne bana ne uvua uditatshisha bua kumanya meji avuabu bela ne muvuabu badiumvua. Bible udi wamba ne: ‘Yezu wakababikila wakamba ne: Nuitabuje bua bana bakese kulua kundi.’ (Luka 18:15, 16) Dituku dikuabu, bantu bakakanyina bamue bana bavua bela mbila bua kuleja muvuabu bitabuja Yezu. Kadi Yezu wakela bana abu kalumbandi ne kuambila bavua babakanyina ne: ‘Nuenu kanuakubala dîyi ne: Wewe wakajadika butumbi buebe mukana mua bana bakese ne mua badi bamua mabele?’​—Matayo 21:15, 16.

Ntshinyi tshidi bana mua kulongela kudi Yezu?

Yezu mmushile bana tshilejilu tshimpe tshia mushindu wa kudifila mu malu a Nzambi. Pavuaye ne bidimu 12, bakamusangana ‘mu ntempelo, mushikame munkatshi mua bayishi, umvua mêyi abu, ubakonka malu.’ Ntshinyi tshiakenzeka? ‘Bantu bonso bakadi bumvua mêyi ende bakakema bualu bua lungenyi luende ne bualu bua mêyi akabandamunaye.’ (Luka 2:42, 46, 47) Tshidibi, dimanya divua nadi Yezu kadiakamusaka bua kudibandisha to, kadi diakamusaka bua kunemeka baledi bende. Bible udi wamba ne: ‘Wakadi utumikila mêyi abu.’​—Luka 2:51.

Bua kumanya malu makuabu, bala nshapita wa 14 wa mukanda wa Bible utu ulongesha tshinyi menemene? *

[Mêyi adi kuinshi]