Anyisha bua kulonga Dîyi dia Nzambi

Kudiku ditekemena bua bantu bakadi bafue anyi?

Tshiena-bualu etshi tshidi tshijula nkonko iukadi pamuapa mudiele ne tshileja muaba uudi mua kupetela mandamuna mu Bible webe. Bantemu ba Yehowa nebikale ne disanka dia kuyukila nebe pa mandamuna aa.

1. Bafue nebabikaku ku lufu anyi?

Pakafika Yezu mu Betania pabuipi ne Yelushalema, mulunda wende Lazalo ukavua mufue kukavua matuku anayi. Yezu wakaya mu nkita ne Mâta ne Mariya, bayayende wa mufue. Katantshi kakese, bantu ba bungi kukunguilabu muaba au. Anji fuanyikijabi disanka divua nadi Mâta ne Mariya pavua Yezu mubishe Lazalo ku lufu!​—Bala Yone 11:20-24, 38-44.

Mâta uvua muitabuja ne: bafue nebabike ku lufu. Batendeledi ba Yehowa ba lulamatu ba kale bavua bamanye ne: Yehowa neabishe bafue bua bikale kabidi ne muoyo pa buloba.​—Bala Yobo 14:14, 15.

2. Ntshinyi tshitu tshienzekela muntu padiye ufua?

Nansha mudi Mukanda wa Nzambi uleja ne: tuetu bantu ne nyama tudi ne bukole bua muoyo budi buenza bua tuikala ne muoyo anyi ‘mupuya’; mupuya eu ki nyuma peshi anyima udi ushala ne muoyo patudi tufua to. (Muambi 3:19; Genese 7:21, 22) Tudi bifukibua bia mashi ne mâyi, bienza ne dimfuenkenya dia buloba. (Genese 2:7; 3:19) Patudi tufua, buongo buetu budi bufua pabu ne meji atudi tuela adi ajimina. Nanku, pakabika Lazalo ku lufu, kavua muambe bualu nansha bumue bua ku bafue to, bualu bafue kabatu bamanye bualu nansha bumue to.​—Bala Musambu 146:4; Muambi 9:5, 10.

Mu bulelela, bafue kabatu bakenga to. Nanku dilongesha dia ne: Nzambi utu ukengesha bantu padibu bafua ndia dishima. Didi dinyangila Nzambi lumu. Kuamba ne: bantu batu bakengeshibua mu Iferno wa kapia kudi kunyingalaja Nzambi bikole.​—Bala Yelemiya 7:31.

  3. Tudiku mua kuyukila ne bafue anyi?

Bafue kabena mua kuakula to. (Musambu 115:17) Kadi patu bademon bayukila ne bantu, batu benza bua bantu bela meji ne: badibu bayukila nabu mmikishi ya bantu bakadi bafue. (2 Petelo 2:4) Yehowa mmukandike diteta kuyukila ne bafue.​—Bala Dutelonome 18:10, 11.

4. Mbanganyi babishabu ku lufu?

Mu bulongolodi bupiabupia bualua, nebabishe bantu miliyo ne miliyo ku lufu bua kuikalabu kabidi ne muoyo pa buloba. Nansha bantu bavua benze malu mabi bualu kabavua bamanye Yehowa nebabishibue pabu.​—Bala Luka 23:43; Bienzedi 24:15.

Bantu babishabu ku lufu nebalonge bulelela bua malu a Nzambi ne nebaleje mudibu bitabuje Yezu pikalabu bamutumikila. (Buakabuluibua 20:11-13) Bantu babishabu ku lufu bobu benza malu mimpe nebasombe pa buloba bua kashidi. Kadi bamue bantu babishabu nebatungunuke ne kuenza malu mabi. Dibishibua diabu nedikale ‘dibika dia dipila.’​—Bala Yone 5:28, 29.

5. Dibika dia bantu ku lufu didi ditulongesha tshinyi bua Yehowa?

Dibika dia bantu ku lufu nedienzeke bualu Nzambi uvua mutume Muanende bua kutufuila. Didi dileja mudi Yehowa muikale ne dinanga ne bulenga kutudi.​—Bala Yone 3:16; Lomo 6:23.

Bua kumanya malu makuabu, bala nshapita 6 ne wa 7 wa mukanda Bible utu ulongesha tshinyi menemene?, mupatula kudi Bantemu ba Yehowa.

[Tshimfuanyi mu dibeji 26]

Bakafuka Adama ne dimfuenkenya dia buloba