Bible utu ushintulula bantu

NTSHINYI tshivua tshisake nsongakaji mukuabu bua kupingana ku malongesha a mu Bible avuaye mubenga? Suaku ubala tshidiye utuambila.

“Mpindieu ndi mumanye bua tshinyi ndi ne muoyo.”​—LISA ANDRÉ

MULELA MU: 1986

DITUNGA DIABU: LUXEMBOURG

TSHIVUAYE: MUANA MUPAMBUKE

KALE: Mvua mukolele mu Bertrange, tshimenga tshivua pabuipi ne Luxembourg; tshivua ne bubanji bua bungi ne mankenda, ne kamuvua buenzavi to. Kuetu mbatulela batanu, meme ke wa mukala. Baledi banyi m’Bantemu ba Yehowa. Bavua baditatshisha bikole bua kutulongesha meme ne batutuanyi ne bayayanyi mikenji ya bena Kristo.

Pankavua pa kukumbaja bidimu 13, ngakabanga kuelakana bikole bua malu avua Bantemu ba Yehowa balongesha. Kumpala mvua ndengulula bualu ebu, kadi ditabuja dianyi divua anu dienda dikepela. Baledi banyi bakenza muabu muonso bua kumpingaja mu njila muimpe, kadi ngakabenga bionso abi. Kabavua bamanye ne: mvua nsomba ne basonga bavua kabayi batamba kunemeka bantu bavua ne bukokeshi to. Mvua musue kuikala ne budikadidi anu muvua basonga abu bamueneka bu bavua nabu. Tuvua tuya mu ma fete; mvua ngenda masandi, nnua bintu bia lulengu ne maluvu makole. Kumpala bivua binsankisha bua kuikala mu dingomba dia bantu bavua benza vi muvuabu basue.

Kadi mu bulelela tshivua anu ne disanka to. Pamvua nsomba ne balunda banyi abu, tshivua anu ne nsombelu wa nsongo to, ne kakuvua muntu nansha umue wa kutudi uvua wela meji ku bualu bua mushinga. Kadi bivua bintonda bua malu mabi avua enzeka pa buloba bu mudi kasungasunga. Pavua matuku enda apita, bivua bintonda bikole menemene.

MUSHINDU UDI BIBLE MUNSHINTULULE: Mvua mubungame bikole dimue dituku pamvua ne bidimu 17. Pakamona mamu mumvua mubungame, wakandomba bua meme kulonga kabidi Bible. Yeye kungambila bua kukonkonona kabidi malongesha a mu Bible ne pashishe kudiangatshila dipangadika dia kutumikila anyi kubenga kutumikila malongesha adimu. Mushindu utuvua bayukila nende ne muoyo mujima dituku adi wakatuadija kunshintulula. Ngakitaba bua kulonga Bible ne yayanyi Caroline ne bayende Akif. Bayende Akif kavua muana wa Ntemu to, kadi wakalua Ntemu pakavuaye muntu mukole. Bilondeshile malu avua Akif muenze kumpala kua kuluaye Ntemu, ngakamona ne: mvua mua kumuambila malu onso patoke bualu uvua mua kungambuluisha.

 Mvua mumanye muvua nsombelu wanyi kayi ukumbana bua kuikala Ntemu wa Yehowa to, kadi ku ntuadijilu mvua mumone ne: malu amvua muenze avua antangila anu meme. Bu mumvua ndonga Bible, ngakamona ne: malu amvua ngenza avua anyingalaja Yehowa. (Musambu 78:40, 41; Nsumuinu 27:11) Meme kumone kabidi ne: malu aa avua anyingalaja bantu bakuabu.

Pamvua ngenda ndonga Bible, ngakamona ne: kudi bijadiki bilelela bia bungi bidi bitusaka bua kuitaba ne: Bible n’Dîyi dia Nzambi. Tshilejilu, mvua mumone muvua milayi ya tshiprofete ya bungi ya mu Bible mikumbane mu mushindu wa dikema. Dimanya edi divua dingambuluishe bua kulekela dielakana dimvua nadi kumpala.

Meme mumane kutuadija dilonga Bible kukavua bu tshidimu tshijima, ngakaya ne baledi banyi bua kumona tutu uvua wenza mudimu wa budisuile ku Betele wa Bantemu ba Yehowa wa mu Allemagne. Pangakamona muvua tutuanyi ne disanka, biakandenga ku muoyo bikole. Disanka divuaye nadi ke dimvua ngenda keba kuonso eku. Bivua binkemesha kabidi pangakamona muvua Bantemu bakuabu benza mudimu ku budisuile muaba eu. Bavua bashilangane bikole ne bantu bamvua nsomba nabu bavua kabayi ba kueyemena ne bavua bajinga anu kukumbaja majinga abu mabi. Matuku makese pashishe, ngakasambila Yehowa ne muoyo mujima, mmulaya bua kumuenzela mudimu matuku onso a muoyo wanyi. Pamvua mukumbaje bidimu 19, ngakatambula bua kuleja mumvua muditshipe.

MALU MIMPE ANGAKAPETA: Mpindieu ndi mumanye bua tshinyi ndi ne muoyo. Ndi mupete disanka dia bungi pandi ndongesha bakuabu Bible, mbambuluisha bua kulonga malu adi atangila Yehowa ne adiye mulaye. Mbiambuluishe kabidi bena mu dîku dietu, bualu tshitu mbasamisha kabidi mutu to.

Ndi mumanye bimpe malu mabi amvua muenze, kadi tshitu ngimanyinapu to. Ntu ngimanyina anu pa luse ludi Yehowa mumfuile ne dinanga didiye mundeje. Ndi ngitaba ne muoyo mujima mêyi a mu Nsumuinu 10:22 aa: ‘Disankisha didi difuma kudi Yehowa didi divuija bubanji, ne kena utenteka kanyinganyinga pa mutu padi.’

[Lungenyi lunene lua mu dibeji 10]

“Tuvua tuya mu ma fete; mvua ngenda masandi, nnua bintu bia lulengu ne maluvu makole”

[Lungenyi lunene lua mu dibeji 11]

“Ndi mumanye bimpe malu mabi amvua muenze, kadi tshitu ngimanyinapu to”