SEMENA PABUIPI NE NZAMBI
“Udi Nzambi wa badi ne muoyo”
Lufu ndupite Nzambi bukole anyi? Tòo. Mmunyi mudi lufu anyi muluishi mukuabu mua kuikala ne bukole bupite bua “Nzambi wa Bukole buonso?” (1 Kolinto 15:26; Ekesode 6:3) Nzambi udi ne bukole bua kumbusha lufu ku diambuluisha dia dibishibua, mmulongolole bua kuenza bualu ebu mu bulongolodi buende bupiabupia. * Mulayi eu udi utukolesha, ki mmuomu anyi? Yezu Muana wa Nzambi, udi utuambila mêyi adi uwuja mioyo yetu ne ditekemena.—Bala Matayi 22:31, 32.
Pavua Yezu uyukila ne Basadoke bavua kabayi bitaba ne: dibika dia bantu ku lufu didiku, wakamba ne: “Bua dibishibua dia bantu ku lufu, kanuvua babale tshivua Nzambi munuambile, pakambaye ne: ‘Ndi Nzambi wa Abalahama, Nzambi wa Izaka ne Nzambi wa Yakoba’ anyi? Yeye kena Nzambi wa bafue, kadi udi Nzambi wa badi ne muoyo.” Muaba eu Yezu uvua muakule bua muyuki uvua muenzeke pankatshi pa Nzambi ne Mose ku tshipuka tshia kapia bu mu tshidimu tshia 1514 kumpala kua bikondo bietu ebi. (Ekesode 3:1-6) Bilondeshile Yezu, mêyi avua Yehowa muambile Mose a ne: “Ndi Nzambi wa Abalahama, Nzambi wa Izaka ne Nzambi wa Yakoba” adi aleja ne: mulayi wa dibishibua dia bantu ku lufu mmulelela ne neukumbane. Mushindu kayi?
Tukonkonone bualu bua kumpala ebu. Tshikondo tshivua Yehowa uyukila ne Mose, Abalahama, Izaka, ne Yakoba bakavua bafue kukavua bidimu bia bungi. Abalahama ukavua mufue bidimu 329, Izaka bidimu 224, ne Yakoba bidimu 197. Kadi Yehowa wakamba ne: “Ndi” Nzambi wabu pamutu pa kuamba ne: “Mvua” Nzambi wabu. Yehowa uvua wakula bua bantu basatu bakavua bafue abu bu ne: batshivua ne muoyo. Bua tshinyi?
Yezu wakumvuija ne: “Nzambi kena wa bafue, udi wa badi ne muoyo.” Elabi meji bua tshidi mêyi aa umvuija. Koku kakuyi dibishibua dia bantu ku lufu, nunku Abalahama, Izaka ne Yakoba nebashale kashidi ne tshiendelele ku lufu kabayi bapeta muoyo to. Bu biobi nanku, Yehowa udi ulua Nzambi wa bafue. Dîba adi, bidi mua kumueneka ne: lufu ndupite Yehowa bukole bikalaye kayi ne bukole bua kujula basadidi bende ba lulamatu ku lufu.
Ntshinyi tshitudi mua kuamba ndekelu wa bionso bua Abalahama, Izaka, Yakoba ne bua basadidi bonso ba lulamatu ba Yehowa bakadi bafue? Yezu wakamba mêyi adi akolesha aa: “Buonso buabu badi ne muoyo ku mêsu kuende.” (Luka 20:38) Bushuwa, mulayi wa Yehowa wa kubisha bantu badi bamuenzela mudimu ne lulamatu ku lufu bakadi bafue mmulelela, ke bualu kayi udi wakula bua bualu buabu bu badi ne muoyo. (Lomo 4:16, 17) Yehowa nealame bantu bonso aba mu meji ende adi kayi ne mikalu too ne pakumbana tshikondo tshia kubapeshulula muoyo.
Yehowa mmupite lufu bukole kule ne kule
Ditekemena dia kupetangana kabidi ne munangibue webe didiku dikusankisha anyi? Biobi nunku, vuluka ne: Yehowa mmupite lufu bukole kule ne kule. Kakuena tshintu tshidi mua kumupangisha bua kukumbaja mulayi wende wa kubisha bantu ku lufu. Kuenaku mua kulonga malu a bungi bua mulayi wa dibishibua dia bantu ku lufu ne bua Nzambi wikala mua kukumbaja bualu ebu anyi? Kuenza nunku, nekukuambuluishe kakuyi mpata bua kusemena pabuipi ne Yehowa “Nzambi wa badi ne muoyo.”
Mvese ya mu Bible iudi mua kubala mu ngondo muibidi
^ tshik. 1 Bua kumanya malu a bungi pa bidi bitangila mulayi wa Nzambi wa kubisha bantu ku lufu mu bulongolodi bupiabupia bua buakane, bala nshapita 7 wa mu mukanda wa Bible utu ulongesha tshinyi menemene? mupatula kudi Bantemu ba Yehowa.
