MUMANYI wa malu a kale muena Greke diende Herodotus uvua ne muoyo kukadi bidimu 2 500, wakakula bua bena Ejipitu ba mu matuku ende wamba ne: “Mu didia dia bantu babanji, bobu bamane kudia, muntu kampanda uvua wambula lupingu lua tshitalu tshia muntu luikale mu mushete, lupempa ne lulengeja bimpe menemene, luikale bule bua santimetre mitue ku makumi anayi ne itanu anyi mipite apu. Uvua uleja bantu bonso bavua muaba au ubambila ne: ‘Nuayi ne nusanke, kadi tangilayi tshintu etshi, bualu panuafua nenuikale bu tshintu etshi tshidi katshiyi ne muoyo.’”

Mmuenenu wa nunku bua muoyo ne lufu kavua anu kudi bena Ejipitu nkayabu to. Lelu eu bantu badi batamba kuakula bua “kudia, kunua ne kusanka.” Bikala muoyo wa muntu ushikila padiye ufua, bua tshinyi katuena mua kusanka patudi ne mushindu? Bua tshinyi kuditatshisha bua kuenza malu makane? Bikala lufu ndekelu wa bionso, kusanka mu tshikondo etshi kudi kuimpe be. Mupostolo Paulo uvua muakule bua bualu ebu. Uvua muleje mmuenenu udi nende bantu badi kabayi bitabuja dibika dia bantu ku lufu wamba ne: “Bikala bafue kabayi babishibua, ‘tudiayi, tunuayi, bualu malaba netufue.’”​—1 Kolinto 15:32.

Bushuwa, Paulo uvua mutuishibue ne: kabakupua bafue muoyo kashidi to. Uvua mumanye ne: bafue nebapetulule kabidi muoyo bua kubenga kufua nansha kakese. Dituishibua edi divua dimanyine pa bualu bua mushinga mukole budi muntu kayi mua kuela mpata, mbuena kuamba ne: dibishibua dia Kristo Yezu ku lufu. * Dibishibua edi divua bualu bunene buvua bukolesha ditabuja dia bayidi ba mu bidimu lukama bia kumpala.

Dibishibua dia Yezu ku lufu didi ne mushinga kayi kutudi? Ntshinyi tshidi tshitujadikila ne: divua dienzeke bulelela? Tukonkononayi muvua Paulo muele meji mu bualu ebu pavuaye mufundile bena Kristo ba mu Kolinto.

Bamue bena Kristo ba mu Kolinto wa kale bavua ne tshibuejakaji mu bualu ebu, ne bakuabu kabavua bitaba dibishibua dia bantu ku lufu to. Mu mukanda wa kumpala uvua Paulo mutumine bena Kristo bavua mu Kolinto, uvua muleje bipeta bibi bivua mua kumueneka bu dibishibua dia bantu ku lufu kadiyiku. Wakafunda ne: “Bulelela, bikala dibika dia bafue kadiyiku, nunku nansha Kristo ki mmubishibue ku lufu to. Kadi bikala Kristo kayi mubishibue ku lufu, bulelela diyisha dietu didi patupu ne ditabuja dietu didi tshianana. Dîba adi badi batusangana bantemu ba Nzambi ba dishima. . . . Ditabuja dienu kadiena ne mushinga; nudi bashale mu mibi yenu. Nunku, bantu badi balale tulu mu lufu mu buobumue ne Kristo mbajimine pabu.”​—1 Kolinto 15:13-18.

“Wakamuenekela bana betu bapite pa 500 musangu umue . . . Kuluaye kumuenekela Yakobo, pashishe bapostolo bonso; ndekelu wa bionso, wakammuenekela meme panyi.”​—1 Kolinto 15:6-8

Paulo uvua mutuadije ne tshiambilu tshidi muntu kayi mua kuela mpata to. Uvua muambe ne: Bikala bafue kabayi mua kubishibua, nunku Kristo uvua mufue kavua mua kubishibua to. Tuanji kufuanyikija ne: Kristo ki mmubishibue ku lufu, ntshinyi tshivua mua kuenzeka? Diyisha dia lumu luimpe divua mua kuikala mudimu wa tshianana ne wa dishima. Kabidi, dibishibua dia Kristo divua bualu bunene buvua buambuluishe bena Kristo bua kuikala ne ditabuja ne kuitaba amue malongesha manene a mu Bible adi atangila bumfumu butambe bunene bua Nzambi, dîna diende, Bukalenge buende ne lupandu luetu. Bu dibishibua dia bantu ku lufu kadiyiku, mukenji uvua Paulo ne bakuabu bapostolo bayisha uvua mua kuikala wa tshianana kawuyi ne mushinga.

Bipeta bibi bikuabu bivua mua kulonda. Bu Kristo kayi mubishibue ku lufu, malongesha a bena Kristo avua mua kuikala a tshianana ne mashindamene pa dishama. Bualu bukuabu, Paulo ne bakuabu bapostolo bavua mua kuikala bayishe malu a dishima bua dibishibua dia Yezu ku lufu ne bua Yehowa Nzambi uvuabu bamba ne: uvua mubishe Yezu ku lufu. Lungenyi lua ne: Kristo uvua “mufue bua mibi yetu” luvua mua kuikala palu lua dishima bualu bu Musungidi kayi mubishibue ku lufu, kavua mua kubisha bakuabu to. (1 Kolinto 15:3) Bivua kabidi mua kumvuija ne: bena Kristo bavua bafue bua ditabuja diabu, bavua bafue ne ditekemena dia dishima dia ne: nebabishibue ku lufu.

Paulo udi ukomesha wamba ne: “Bituikala batekemene Kristo anu mu muoyo eu, tudi bantu ba kumvuila luse kupita bakuabu bonso.” (1 Kolinto 15:19) Anu bu bena Kristo bakuabu, Paulo uvua mutate bikole, mukengeshibue, mutantamene ntatu ne mutuilangane ne lufu ne malu onso aa avua mamufikile bualu uvua witabuja ne: dibishibua dia bafue didiku. Bionso ebi kabivua mua kuikala ne mushinga bu dibishibua dia bantu ku lufu tshikale bualu bua tshianana ne bua dishima!

Paulo kavua muanji kuela meji ne: malu avua bena Kristo bitabuja avua mimanyine pa dishima to. Uvua mumanye ne: Yezu uvua mubishibue ku lufu ne uvua mufile bijadiki bua bena Kristo bu mudi bualu ebu: “Kristo wakafua bua mibi yetu bu muvua Mifundu minsantu miambe; bavua bamujike, bamubishe ku lufu dituku disatu muvua Mifundu minsantu miambe; wakamuenekela Kefa, pashishe bapostolo dikumi ne babidi.” * Paulo udi wamba kabidi ne: “Pashishe wakamuenekela bana betu bapite pa 500 musangu umue; ba bungi ba kudibu batshidi munkatshi muetu, nansha mudi bakuabu bamane kulala tulu mu lufu. Kuluaye kumuenekela Yakobo, pashishe bapostolo bonso; ndekelu wa bionso, wakammuenekela meme panyi.”​—1 Kolinto 15:3-8.

Paulo wakatuadija ne dishindika edi: Kristo wakafua bua mibi yetu, wakajikibua ne bakamujula ku  lufu. Ntshinyi tshivua tshijadikile Paulo bualu ebu? Bualu bua kumpala, bantu ba bungi bavua bamone bualu ebu bavua bajadike. Yezu mumane kubishibua uvua mumuenekele bamue bantu (ne Paulo pende), mumuenekele kasumbu kakese ka bantu ne musumba wa bantu 500 ne ba bungi ba kudibu bavua mua kuikala ne mpata pavuabu bumvue ne: Yezu mmubishibue ku lufu! (Luka 24:1-11) Bu muvua bantu ba bungi bavua bamone bualu ebu batshivua ne muoyo mu matuku a Paulo ne muntu yonso uvua musue kujadika uvua mua kuya kubebeja. (1 Kolinto 15:6) Mbipepele bua kusokoka bujadiki bua mumonyi umue anyi babidi, kadi mbikole bua kusokoka bujadiki bua bantu 500 anyi bapite apu.

Paulo uvua kabidi muleje ne: lufu, dijika ne dibishibua dia Yezu bivua bienzeke bilondeshile “muvua Mifundu minsantu miambe.” Malu aa avua maleje ne: milayi ya tshiprofete idi mu Mifundu ya tshiena Ebelu idi itangila Masiya mmilelela, ne bivua kabidi bileja ne: Yezu ke uvua Masiya uvuabu balaye.

Nansha muvua bantu bavua bamone malu aa bajadike, ne Bible pende mujadike ne: avua menzeke, kuvua anu bantu bavua babenga ne: Yezu uvua mubishibue ku lufu. Bamue bantu badi bamba ne: bayidi bende mbavua bibe tshitalu tshiende pashishe balue kuamba ne: bavua bamumone muvuaye mubike ku lufu. Kadi bayidi aba kabavua ne bukole anyi mushindu wa kupita basalayi ba bena Lomo bavua balame lukina to. Bakuabu badi bamba ne: dimueneka dia Yezu pavuaye mubishibue ku lufu mmalu mafuikakaja mu mutu. Lungenyi elu ndua dishima, bualu Yezu uvua mumuenekele bantu ba bungi mu mêba mashilangane. Ne kabidi, bidiku biumvuika bua kuitaba ne: muntu mufuikakaja uvua mua kulamba mishipa ne kuyipesha bantu, muvua Yezu uvua mubishibue ku lufu muenze mu Galela anyi? (Yone 21:9-14) Muntu mufuikakaja uvuaku mua kubikila bantu bavua bamubandila bua kulengabu mubidi wende anyi?​—Luka 24:36-39.

 Nansha nanku, bantu bakuabu badi bamba ne: tshilumbu tshia ne: Yezu uvua mubishibue ku lufu mbualu bua dishima bufuikakaja kudi bayidi bende. Kadi bavua mua kuenza bualu bua buena ebu bua kupeta tshinyi? Kumanyisha dibishibua dia Yezu ku lufu kuvua kukebele bayidi bende ntatu bu mudi: dipuekeshibua milongo, dikengeshibua ne lufu. Bua tshinyi bavua mua kuteka mioyo yabu mu njiwu bua kuimanyina bualu bua dishima bua mushindu eu? Bakatuadija kujadika bualu ebu mu Yelushalema, kumpala kua baluishi babu bavua bakeba bua kubakuata ne kubashipa.

Dibishibua ku lufu divua bualu bua mushinga mukole buvua bupesha bayidi ba Yezu dikima dia kumanyisha bantu malu a Mukalenge wabu nansha muvuabu babakengesha bikole. Dibishibua dia Yezu ku lufu diakalua bualu bunene buvua bukolesha ditabuja dia bena Kristo. Bena Kristo ba kumpala kabavua bateke muoyo wabu mu njiwu patupu bua kumanyisha bantu malu adi atangila mulongeshi wa meji uvuabu bashipe to. Bavua bateke muoyo wabu mu njiwu bua kumanyisha bantu dibishibua dia Yezu ku lufu bualu bavua ne bijadiki bia ne: yeye uvua Kristo, Muana wa Nzambi, udi ne bukole ne muoyo, ne yeye ke uvua ubambuluisha ne ubalombola. Dibishibua diende divua dileja ne: bobu pabu bavua ne bua kubishibua ku lufu. Bushuwa, bu Yezu kayi mubishibue ku lufu, buena Kristo kabuvua mua kuikalaku to. Bu Yezu kayi mubishibue ku lufu, katuvua nansha mua kumvua bakula bualu buende to.

Dibishibua dia Yezu ku lufu didi ne mushinga kayi kutudi lelu eu?