‘Nzambi wa mu diulu neajadike bukalenge bukuabu budi kabuyi bubutudibua tshiendelele. Bukokeshi buabu kabuena bupianyibua kudi bantu bakuabu, kadi nebutshibule makalenge aa onso bitupa bitupa, nebuabutule, ne buobu nebujalame tshiendelele.’​—Danyele 2:44.

Bukalenge bua Nzambi mbulamatadi wa mu diulu. Yezu Kristo Mulombodi udi Nzambi musungule neangate muaba wa makalenge a bantu ne neenze bua disua dia Nzambi dienzeke mu diulu ne pa buloba apa. (Matayi 6:9, 10) Kakuakuikala mbulamatadi wa bana ba bantu wapingana pa muaba wa mbulamatadi eu to, bualu mbukalenge “bua tshiendelele bua Mukalenge ne Musungidi wetu Yezu Kristo.” Nekuikale ditalala dia tshiendelele.​—2 Petelo 1:11.

“Satana muine udi udivuija bu muanjelu wa butoke. Nunku, ki mbualu bua kukema bikala bena mudimu bende badivuija pabu bu bena mudimu ba buakane. Kadi ndekelu wabu neikale bilondeshile malu adibu benza.”​—2 Kolinto 11:14, 15.

Bitendelelu bia dishima nebimanyike patoke mudibi bia Diabolo ne nebabibutule pa buloba apa. Malu mabi onso a kansungansunga a bitendelelu bia dishima ne diela dia mashi a bantu panshi nebijike. Bualu ebu nebuambuluishe bantu bonso badi banange “Nzambi mulelela wa muoyo” bua kumutendelela mu “ditabuja dimue” ne “mu nyuma ne mu bulelela.” Bulelela, ditalala ne buobumue nebikalaku!​—1 Tesalonike 1:9; Efeso 4:5; Yone 4:23.

“Nzambi muine neikale nabu. Yeye neakupule tshinsonji tshionso ku mêsu kuabu, ne lufu kaluakuikalaku kabidi, nansha madilu, nansha miadi, nansha bisama kabiakuikalaku kabidi. Malu a kale ajiminyi.”​—Buakabuluibua 21:3, 4.

Yehowa Nzambi neakumbeje bualu ebu ku diambuluisha dia Muanende Yezu, uvua mufile muoyo wende bua bantu. (Yone 3:16) Ku diambuluisha dia bulombodi bua Yezu, bantu nebalue bapuangane. Kakuakuikala kabidi makenga bualu “Nzambi muine  neikale nabu” ne neakupule “tshinsonji tshionso ku mêsu kuabu.” Dipanga bupuangane dia bantu ne makenga nebijike mu katupa kîpi emu; ‘bantu bakane nebapiane buloba, nebashikamemu tshiendelele.’​—Musambu 37:29.

Yezu “wakakuata dragon, nyoka wa kale au, udi Diabolo ne Satana, wakamusuika bua bidimu 1 000. Wakamuela mu tshina tshidi katshiyi ne ndekelu, kutshikanga, ne kutuapu tshitampi pa mutu pende, bua kapambuishi kabidi bisamba.”​—Buakabuluibua 20:2, 3.

Buenzeji buonso bua Satana nebujike pikalabu mua kumuisuika ne bademon bende ne kubelabu “mu tshina tshidi katshiyi ne ndekelu” muikalabu kabayi ne tshia kuenza. Kabakuikala kabidi ne buenzeji mu malu a bantu. Bantu nebikale ne disanka dia kuikala ne muoyo pa buloba budi kabuyi kabidi ku buenzeji bua Satana ne nyuma mibi!

“Dikenga dinene” divua Yezu muakuile nedifikishe “matuku a ku nshikidilu” ku ndekelu kuawu. Wakamba ne: “Bualu nekuikale dikenga dinene ditu kadiyi dianji kuenzeka katshia bafuka buloba too ne mpindieu, ne kadiakuenzeka kabidi to.”​—Matayi 24:21.

Dikenga nedikale dinene mu mushindu wa se: kakuvua dikenga dia mushindu eu dianji kuenzeka kumpala to. Dikenga edi nedifikishe “ku mvita ya dituku dinene dia Nzambi Wa Bukole Buonso,” idibu babikila ne: “Armagedone.”​—Buakabuluibua 16:14, 16.

Bantu ba miaba yonso badi banange malu makane mbindile ne muoyo kuulu kuulu nshikidilu wa ndongoluelu wa malu eu. Tangila masanka ikala bantu mua kupeta mu bukokeshi bua Bukalenge bua Nzambi.

“Musumba munene wa bantu” newikale ne muoyo mu buloba bupiabupia bua ditalala: Dîyi dia Nzambi didi diamba ne: “musumba munene wa bantu” badibu kabayi mua kubala nebafume “mu dikenga dinene” ne nebikale ne muoyo mu buloba bupiabupia bua buakane. (Buakabuluibua 7:9, 10, 14; 2 Petelo 3:13) Nebaleje ne: lupandu luabu mbalupetele kudi Yezu Kristo “Muana wa mukoko wa Nzambi udi umbusha mibi ya ba pa buloba!”​—Yone 1:29.

Masanka a bungi atuapeta ku diambuluisha dia malongesha a kudi Nzambi: Mu bulongolodi bupiabupia, ‘buloba nebuikale buule tente ne kumanya kua Yehowa.’ (Yeshaya 11:9) Mu malongesha a kudi Nzambi nemuikale mibelu ya mua kusomba mu ditalala ne bantu bonso ne kuikala mu buobumue ne bintu bionso. Nzambi mmulaye ne: ‘Meme ndi Yehowa Nzambi webe, udi ukuyisha bua wewe wikale ne diakalengele, udi ukulombola mu njila uudi ne bualu bua kuendelamu.’​—Yeshaya 48:17.

Nebajule bantu batudi banange ku lufu: Patshivua Yezu pa buloba, wakajula mulunda wende Lazalo ku lufu. (Yone 11:1, 5, 38-44) Mu bualu ebu uvua muleje muikalaye mua kujula bantu ba bungi ku lufu mu bukokeshi bua Bukalenge bua Nzambi.​—Yone 5:28, 29.

Ditalala ne buakane nebikalaku kashidi ne tshiendelele: Mu bukokeshi bua Kristo, dishipa dia mikenji kadiakuikalaku kabidi to. Mmunyi mutudi bamanye bualu ebu? Bu mudi Yezu ne bukokeshi bua kubala malu adi mu mioyo ya bantu, neenze mudimu ne bukokeshi ebu bua kulumbuluisha bantu bakane ne bantu babi. Bantu badi babenga bua kulekela njila yabu mibi kabakubanyishila bua kubuela mu bulongolodi bupiabupia bua Nzambi to.​—Musambu 37:9, 10; Yeshaya 11:3, 4; 65:20; Matayi 9:4.

Tudi bakonkonone anu milayi mikese ya mu Bible idi ileja bikondo bilenga bidi bituindile kumpala eku. Pikala Bukalenge bua Nzambi mua kutuadija kukokesha pa buloba, “ditalala dikumbane” nedikalaku bua kashidi. (Musambu 37:11, 29) Malu onso adi akebesha tunyinganyinga ne makenga avua matatshishe bantu kaakuikalaku kabidi to. Tudi tuitaba bualu ebu bualu Nzambi mmulaye ne: “Tangilayi! Ndi mvuija bintu bionso bipiabipia. . . . Mêyi aa nga kueyemena ne malelela.”​—Buakabuluibua 21:5.