Utuku usambila misangu yonso anyi? Ke tshitu bantu ba bungi benza, nansha badi kabayi bitaba dikalaku dia Nzambi. Kadi bua tshinyi bantu batu basambila? Luapolo kampanda lua mu ditunga dia France ludi luleja ne: tshiabibidi tshia bena mu France badi basambila anyi belangana meji imue misangu “anu bua kudiumvua bimpe tshianana.” Anu bu bena ku Mputu ba bungi, kabena basambila bua kutendelela Nzambi to. Kadi, badi “basambila anu bua kupeta disulakana.” Ku lukuabu luseke, bamue bantu badi bakeba Nzambi anu padibu dijinga ne tshintu kampanda ne mbasue bua abandamune lukasa ku masambila abu.​—Yeshaya 26:16.

Netuambe tshinyi buebe wewe? Udi wela meji ne: disambila mmushindu udi ukuambuluisha bua kuela meji bimpe anyi? Biwikala udi witabuja Nzambi, udiku umona ne: masambila adi ne mushinga mu nsombelu webe anyi? Udiku umona ne: kabatu bandamuna masambila ebe anyi? Bible udi mua kukuambuluisha bua kumona ne: kusambila ki mmushindu wa kudiumvua bimpe patupu, kadi mmushindu muimpe wa wewe kusemena pabuipi ne Nzambi.