Mvua mukolele mu Rmaysh, ku mikalu idi pankatshi pa Isalele ne Lebanona mu bikondo bia mvita. Ndi mvuluka muvua bingoma binene bitayike, kukosabi bantu bavua kabayi ne tshilumbu bimue bitupa bia mubidi. Nsombelu uvua mukole, ne malu a tshikisu ne buntomboji biakavulangana.

Dîku dietu divua mu tshimue tshia ku bitendelelu bia Katolike bivua ku Est tshivuabu babikila ne: Maronite. Papa uvua wenza mudimu bikole bua kuambuluisha dîku dietu divua ne bantu 12, kadi Maman ku luende luseke, uvua wenza muende muonso bua yonso wa kutudi ikala uya mu mese. Kadi mu kupita kua matuku, ngakatuadija kumona ne: anu bu bantu bonso mu tshibungi, tshitendelelu tshietu katshivua tshiambuluisha batekete to.

Pamvua ne bidimu dikumi ne bia mu njila, ngakatuadija kulonga karaté ka kung fu. Bu mumvua mudifile bikole mu dilonga dia Karaté, ngakalua muedi wa mbata ne miseba wa kalanda musenga, ne muluanganyi wa mvita mupiluke ne biamu bishilashilangane. Mvua ngela meji ne: ‘nansha mundi tshiyi mua kujikija mvita, ndi mua kuteta kulekelesha benji ba malu a tshikisu tshikisu.’ Dîba dionso dimvua mmona bantu babidi baluangana, mvua nya kudibuejamu diakamue. Bu mumvua muena biji, kabivua binenga bua meme kukuata tshiji to. Bu mumvua nduangana mvita bua kujikija malu mabi ne a tshikisu, bantu ba ku Est wa Lebanona bavua bantshina bikole.

Mu 1980, ngakabuela mu dingumba dia bena Karaté ka kung fu divua mu Beirut. Nansha muvua bingoma binene bikuluka kuntuaku, mvua anu nya kulonga kung fu. Tshimvua meme mumanye tshivua anu kudia, kulala ne kuikala ne nsombelu wa buena wa Bruce Lee, muluanganyi wa mvita munene wa bena Chine udi musombe mu Amerike, ne kulua shampion mu kung fu. Mvua mumutentule mu malu bu mudi: nkoseshelu wa nsuki, luendu ne muvuaye wela mbila pavuaye wenza kung fu. Tshivua nseka nansha kakese.

Kipatshila kanyi kavua ka kulua mukumianganyi wa miseba ne mbata wa kalanda musenga mu Chine. Dilolo dikuabu, pamvua ndibidija bua  kuenza luendu ku Chine, ngakumvua bakokola ku tshiibi tshianyi. Mulunda wanyi ke uvua mulue ne Bantemu babidi kuanyi. Meme kupatuka muluate bilamba bia mvita bifike ne bisululu pambidi, kubambila ne: “Tshiena mumanye tshintu nansha tshimue tshidi tshitangila Bible to.” Tshivua mumanye ne: anu dîba adi ke divua nsombelu wanyi ne bua kushintuluka to.

Bantemu bakandeja mu Bible mudi bantu kabayi ne bukokeshi bua kujikija malu mabi ne a tshikisu nkayabu. Bobu kungumvuija mudi Satana Diabolo muikale mukebeshi munene wa malu mabi onso aa. (Buakabuluibua 12:12) Bivua binkemeshe bua kumona lutulu ne dituishibua bivua nabi Bantemu. Bivua bindenge ku muoyo pavuabu bandongeshe ne: Nzambi uvua ne dîna. (Musambu 83:18) Bakandeja kabidi 1 Timote 4:8 udi wamba ne: “Dibidija dia mubidi didi ne mushinga mu malu makese; kadi dilamata Nzambi didi ne mushinga mu malu onso, bualu didi ne mulayi wa muoyo wa mpindieu ne utshilualua.” Mêyi aa avua ne buenzeji bua bungi mu nsombelu wanyi.

Bu muvua bena mu dîku dianyi bambile Bantemu abu bua kabalu kabidi, diakamue, tshivua kabidi ne mushindu wa kumonangana ne Bantemu to. Nansha nanku, mvua mupete lungenyi lua kulekela Karaté ne kutuadija kulonga Bible. Bana betu ba balume kabavua basue bua meme kulekela Karaté to, kadi mvua mudisuike bua kupetangana kabidi ne Bantemu ba Yehowa bua kutuadija kulonga nabu Bible.

Mvua mutungunuke ne kukeba Bantemu kadi tshivua mua kubapeta to. Mu tshipolo atshi mvua ne dibungama dikole bua lufu lua papa, ne bua malu makuabu avua enzeka mu dîku. Ngakatuadija kuenza mudimu mu tshiapu kampanda tshia luibaku, dimue dituku muena mudimu nanyi mukuabu diende Adel kungimanyika bua kungebeja bua tshinyi mvua mmueneka mubungame. Wakatuadija kungambila ditekemena didi Bible ufila dia dibishibua dia bantu ku lufu. Ngondo muanda mutekete ya kalonda, Ntemu eu wakatuadija kulonga nanyi Bible ne lutulu luonso. Uvua ne dinanga ne muoyo muimpe.

Pavua dilonga dienda ditungunuka, ngakumvua dijinga dia kuenza mashintuluka manene mu nsombelu wanyi. Kadi kabivua bipepele to. Mvua muena biji ne muena bilumbu. Kadi dilonga dia Bible diakangambuluisha bua kuikala muena bupole ne kubenga kukuata tshiji mu bualu buonso. Tshilejilu, mu Matayi 5:44 Yezu uvua mufile mubelu wamba ne: “Nangayi baluishi benu, nusambile bua badi banukengesha.” Lomo 12:19 udi udimuija ne: “Bana betu bananga, kanudisombuedi, . . . bualu mbafunde ne: ‘Yehowa udi wamba ne: Disombuela ndianyi; meme nemfute.’” Mvese eyi ne mikuabu ivua mingambuluishe ku kakese ku kakese bua kuikala ne ditalala munda muanyi.

Nansha muvua bena mu dîku dietu babenge kumpala dipangadika dianyi dia kulonga ne Bantemu ba Yehowa, bakafika ku dinemeka Bantemu. Umue wa ku bana betu ba balume mmutuadije pende kutendelela Yehowa, ne maman udi utuakuila kudi bantu bakuabu bua banemeke dipangadika dietu.

Yehowa mmumbeneshe kabidi pa kumpesha mukaji muimpe, wa lulamatu Anita utudi tuenza nende mudimu wa diyisha, wa ku dîba ne ku dîba. Katshia ku 2000, meme ne Anita tudi basombele mu Eskilstuna, mu ditunga dia Suède, mutudi tulonga Bible ne bantu badi bakula tshiena Arabe.

Mutshima wanyi utshidi anu unyingalala bua bantu badi bakenga bua malu a tshikisu. Kadi kumanya bua tshinyi malu aa adi enzeka, ne kumanya ne: mu katupa kîpi emu Nzambi neajikije malu aa, kudi kumpesha disanka dilelela ne ditalala.​—Musambu 37:29.