Nsumuinu 16:1-33
16 Muntu udi ulongolola ngenyi ya mu muoyo* wende,Kadi diandamuna didiye ufila* didi difumina kudi Yehowa.+
2 Njila yonso ya muntu idi imueneka miakane* kudiye,+Kadi Yehowa udi ukonkonona malu adi mu meji.*+
3 Teka tshionso tshiudi wenza* kudi Yehowa,+Ne malu audi mulongolole neakumbane.
4 Yehowa mmuenze tshintu tshionso bua kukumbaja disua diende,Too ne bantu babi bua dituku dia dikenga.+
5 Muntu yonso udi ne lutambishi mu muoyo udi tshintu tshibi kumpala kua Yehowa.+
Ikala mushindike* ne: yeye kakupanga kupeta dinyoka to.
6 Ku dinanga dia lulamatu ne lulamatu, tshilema tshidi tshibuikidibua,+Ne bua ditshina dia Yehowa muntu udi umbuka ku malu mabi.+
7 Padi Yehowa usanka bua njila ya muntu,Udi ufikisha too ne bena lukuna bende ku dikala nende mu ditalala.+
8 Mbimpe kuikala ne bintu bikese mu buakane+Pamutu pa kuikala ne lupetu lua bungi kakuyi kulumbuluisha kuakane.+
9 Muntu udi mua kupangadija njila wende mu muoyo wende,Kadi Yehowa ke udi ulombola biendedi biende.+
10 Dipangadika diangata ku nyuma* didi ne bua kuikala pa mishiku ya mukalenge;+Kena ne bua kunyanga kulumbuluisha kuakane nansha.+
11 Bipiminu ne bidikijilu bia bujitu bimpe bidi bifumina kudi Yehowa;Bintu bionso bia bujitu bia kupima nabi bujitu bidi mu tshibombi mbintu bidiye muenze.+
12 Bienzedi bibi bidi tshintu tshibi ku mêsu kua bakalenge,+Bualu nkuasa wa bukalenge mmujadika bikole kudi buakane.+
13 Ngakuilu muakane mbualu budi busankisha bakalenge,
Mbanange muntu udi wamba bulelela.+
14 Tshiji tshia mukalenge tshidi bu mutuadi wa mukenji wa lufu,+Kadi muena meji udi utshituyisha.*+
15 Mu bukenka bua mpala wa mukalenge mudi muoyo;Luse luende ludi bu ditutu dia mvula mu muvu wa luya.*+
16 Kupeta meji nkutambe buimpe kupita kupeta or.+
Mbimpe kusungula bua kupeta dijingulula dia malu pamutu pa arjan.+
17 Tshibeba tshia bantu bakane tshidi tshiepuka malu adi mabi.
Muntu udi ulama njila wende udi ulama muoyo* wende.+
18 Lutambishi ludi lulua kumpala kua dibutuka,Ne lungenyi lua didibandisha ludi lulua kumpala kua dikuluka.+
19 Mbimpe kuikala muena budipuekeshi* munkatshi mua bena bupuekele+Pamutu pa kuabanyangana bintu binyenga bia bena didibandisha.
20 Muntu udi uleja busunguluji mu tshilumbu neapete diakalenga,*Ne muntu wa diakalenga ngudi weyemena Yehowa.
21 Muntu udi ne meji mu muoyo nebamubikile ne: mujinguludi wa malu,+Ne muntu udi ne ngakuilu muimpe* udi usakidila bukole bua kuitabijijangana nabu malu.+
22 Busunguluji budi mpokolo wa muoyo kudi badi nabu,Kadi batshimbakane badi banyokibua kudi butshimbakane buabu.
23 Muoyo wa muena meji udi upesha mukana muende busunguluji+Ne usakidila bukole bua kuitabijijangana nabu malu ku mêyi ende.
24 Mêyi mimpe adi bu dipula* dia buitshi,Mashême bua anyima* ne luondapu bua mifuba.+
25 Kudi njila udi umueneka muakane ku mêsu kua muntu,Kadi ku ndekelu udi ufikisha ku lufu.+
26 Dijinga dia kudia* dia muenji wa mudimu didi dimuenzeja mudimu mukoleBualu nzala* yende idi imusonsola.+
27 Muntu tshianana udi umbula malu mabi;+Mêyi ende adi bu kapia kadi kosha.+
28 Muena tshimvundu* udi ujudija matandu,+Ne mushiminyinyanganyi wa malu udi utapulula balunda ba pa muoyo.+
29 Muena tshikisu udi ulobesha muinendeNe udi umufikisha mu njila mubi.
30 Udi uvinya dîsu diende padiye uluka meji a kuenzelangana bibi.
Udi usumakaja mishiku yende padiye ukumbaja bualu bubi.
31 Nsuki mitoke idi tshifulu tshia butumbi tshia bulengele*+Padiyi mipeta mu njila wa buakane.+
32 Muntu udi kayi ukuata tshiji lubilu+ mmupite tshilobo,Ne muntu udi ukanda tshilunji tshiende* mmupite muntu udi utshimuna tshimenga.+
33 Badi belela nshobo pa bibelu,+Kadi dipangadika dionso dia kudiyi didi difumina kudi Yehowa.+
Note
^ Anyi “diandamuna diakane.” Ku mua.: “diandamuna dia ludimi.”
^ Ku mua.: “Malu adi malongolola mu muoyo nga muntu.”
^ Ku mua.: “mikezuke.”
^ Ku mua.: “nyuma.”
^ Ku mua.: “Bungulujila Yehowa midimu yebe.”
^ Ku mua.: “Tshianza ku tshianza.”
^ Anyi “dia kua Nzambi.”
^ Anyi “utshiepuka.”
^ Anyi “printemps.”
^ Anyi “anyima.”
^ Ku mua.: “meji mapuekele.”
^ Ku mua.: “malu mimpe.”
^ Anyi “Ne ngakuilu udi usankisha.” Ku mua.: “Ne bushême bua mishiku.”
^ Anyi “dikatshi.”
^ Ku mua.: “mukana.”
^ Anyi “Anyima.”
^ Anyi “Udi uluka meji mabi.”
^ Anyi “butumbi.”
^ Ku mua.: “ukokesha lungenyi luende.”
