Yeshaya 6:1-13
6 Mu tshidimu tshiakafua mukalenge Uziya,+ ngakamona Yehowa musombe mu nkuasa wa bukalenge mutumbuke ne mubandishibue muulu,+ ne tshitupa tshia kuinshi tshia muzabi wende tshivua tshiuwuje ntempelo.
2 Baselafima bavua bimane pa mutu pende; yonso wa kudibu uvua ne mapuapua asambombo. Yonso* uvua mubuikile ku mêsu kuende ne mapuapua abidi ne mubuikile makasa ende ne makuabu abidi, ne yonso wa kudibu uvua upapala ne mapuapua makuabu abidi.
3 Ne eu uvua wela mukuabu dîyi ne:
“Wa tshijila, wa tshijila, wa tshijila udi Yehowa wa biluilu.+
Buloba bujima mbuwule tente ne butumbi buende.”
4 Binyungulukilu bia tshiibi bia ku mushiku wa mbelu biakakanka bua tshiona tshia lubila,* ne nzubu wakuwula tente ne muishi.+
5 Ke meme kuamba ne: “Diakabi dianyi!
Nkadi anu mumane kufua,*Bualu ndi muntu udi ne mishiku kayiyi mikezuke,Ne ndi musombele munkatshi mua bantu badi ne mishiku kayiyi mikezuke;+Bualu mêsu anyi mmamone Mukalenge, Yehowa wa biluilu muine!”
6 Nunku umue wa ku baselafima wakabuuka kuluaye kundi, ne mu tshianza tshiende muvua dikala ditema+ divuaye muangate ne tshikuatshilu ku tshioshelu.+
7 Yeye kulenga mukana muanyi, kuambaye ne:
“Mona! Tshintu etshi ntshilenge mishiku yebe.
Tshibawu tshiebe ntshiumbushibue,Ne mpekatu webe mmubuikidibue.”
8 Pashishe ngakumvua dîyi dia Yehowa diamba ne: “Nentume nganyi, ne nnganyi watuyila?”+ Ke meme kuamba ne: “Mmeme eu! Untume!”+
9 Yeye kuandamuna ne: “Ndaku, wambile bantu aba ne:
‘Nenuteleje misangu ne misangu,Kadi kanuakujingulula bualu to;Nenumone misangu ne misangu,Kadi kanuakupeta dimanya nansha.’+
10 Vuija muoyo wa bantu aba mupape,+Vuija matshi abu mapape,+Ne kanga ne mêsu abu,Bua kabamonyi ne mêsu abu
Ne kabumvu ne matshi abu,Bua muoyo wabu kawujinguludi bualuNe kabalu kupingana ne kuondopibua.”+
11 Ke meme kuamba ne: “Too ne dîba kayi, Yehowa?” Ke yeye kuamba ne:
“Too ne padi bimenga bibutuka kamutshiyi muntu musombelamuNe nzubu kayitshiyi ne bantuNe padi buloba bubutuka, bulua tshipela;+
12 Too ne padi Yehowa umbusha bantu ubatuma kule+Ne dishala dia buloba munda mutupu dialabala bikole menemene.
13 “Kadi tshia dikumi netshishale anu muomu, ne nebatshioshe kabidi, bu mutshi munene ne bu mutshi wa lusanga idi ishiya tshikuku pakadibu bayikose; dimiinu dia* tshijila nedikale tshikuku tshiabu.”
Note
^ Ku mua.: “Yeye.”
^ Ku mua.: “dîyi dia uvua ubikila.”
^ Ku mua.: “Mbampuwishe.”
^ Anyi “ndelanganyi ya.”
