Bana betu basuibue,

Kutuadija ku Tshibumba tshia Nsentedi tshia bantu bonso tshia dia 1/1/2008, bakatuadija kutupatuila biena-bualu bimpe bia ne: “Widikije ditabuja diabu.” Katshia ku tshikondo atshi, tudi ne disanka dia kubala tshiena-bualu tshipiatshipia tshia nunku tshidi tshipatuka panyima pa ngondo isatu mu Tshibumba tshia Nsentedi tshia bantu bonso.

Bantu bakamba tshinyi bua biena-bualu ebi? Mamu mukuabu uvua mubale tshiena-bualu tshivua tshiakula bua Mata wakamba ne: “Mvua museke pamvua mubale tshiena-bualu etshi, bualu ndi anu bu Mata; ntu amu ne dijinga dia kuakidila bantu ne kuikala ne malu a bungi a kuenza, kadi imue misangu ndi mpua muoyo ne: bidi bikengela kulekela bindi ngenza bua kudisangisha ne balunda banyi.” Nsonga mukuabu uvua mubale muyuki wa Esetê wakamba mêyi mimpe aa: “Tudi mua kutuma meji etu onso ku dikeba dia bilamba nangananga bitshidi bifuminaku ku dipatuka. Kuvuala bimpe ki nkubi to; kadi katuena mua kujinga kuvuala mu mushindu wa batumone batuambe to.” Wakamba kabidi ne: “Yehowa udi umona tshitudi munda muetu.” Muanetu mukuabu wa bakaji wakamba ne disanka dionso bua tshiena-bualu tshikuabu tshivua tshiakula bua mupostolo Petelo ne: “Mvua mudibueje meme yonso mu muyuki eu pamvua ngubala. Mvua ndimona anu bu ne: mvuapu pavua bualu abu buenzeka! Mvua mudibueje mu muyuki bua kumvua muvua bantu badimu badiumvua.”

Babadi aba ne bakuabu ba bungi bavua batufundile bua kuleja muvuabu banyishe biena-bualu ebi, badi bajadika tshivua mupostolo Paulo mufunde kukadi bidimu bia bungi etshi: “Malu onso avuabu bafunde kale bavua baafunde bua kutulongesha.” (Lomo 15:4) Bulelela, Yehowa uvua mufundishe miyuki ya bantu aba mu Bible bua kutupesha malongesha mimpe. Nansha tuetu bamanye bulelela kukadi bidimu bia bungi, tuetu bonso, tudi mua kupeta malongesha kudibu.

Tudi tukukankamija ne muoyo mujima bua kubala mukanda eu paudi uupeta. Uwubueje mu programe wenu wa Ntendelelu wa mu Dîku, bana nebawunange. Panuatuadija kulonga mukanda eu mu Dilonga dia Bible dia Tshisumbu, kanupumbishi lumingu nansha lumue to. Uwubale ne lutulu luonso, kubadi malu adimu lubilu lubilu to. Enza mudimu ne lungenyi luebe; udifile ku malu audi ubala ne muoyo webe wonso. Teta mua kumvua muvua bantu ba mu Bible aba badiumvua, kumona malu muvuabu baamona. Teta kumona tshivuabu benza pavua malu kampanda abafikila, ne muudi pebe mua kubidikija.

Bidi bituenza disanka dia bungi bua kunupatuila mukanda eu. Wikale dibenesha kunudi ne kudi mêku enu. Tudi tunujingila malu onso malenga, tudi banunange bikole,

Kasumbu Kaludiki ka Bantemu ba Yehowa