Tuenze bu ne: muaba utudi eu mmu tshimenga tshia Yeliko. Tshimenga etshi tshidi mu ditunga dia Kanâna mudi bantu bonso kabayi bitabuja Yehowa to. Kadi muntu mukaji mukuabu mmusombelamu pende, diende Lahaba.

Patshivua Lahaba muana mutekete, wakumvua bakula bua mushindu uvua Mose mupandulule mâyi a Mbuu Mukunze, mupatule bena Isalele mu Ejipitu. Uvua mumvue kabidi lumu lua muvua Yehowa mubambuluishe bua kutshimuna mvita yabu ne baluishi babu. Mpindieu Lahaba mmumvue bamba ne: bena Isalele mbatudile pabuipi ne tshimenga tshia Yeliko!

Dilolo kampanda, bena Isalele babidi kuyabu ku Yeliko bua kutentekela tshimenga etshi. Kufikabu kua Lahaba. Lahaba kubabuejaye mu nzubu muende, bobu kulalamu. Butuku, mukalenge wa mu Yeliko kumvua ne: batentekedi mbafike mu tshimenga, ne mbabuele kua Lahaba. Ke mukalenge kutuma bantu bua kubakuata. Mpindieu Lahaba kusokokaye batentekedi babidi kulu ku tshisasa tshia nzubu wende, kadi kuambilaye bantu ba mukalenge abu ne: ‘Batentekedi abu bavua muaba eu, kadi bakadi bamane kupatuka mu tshimenga baye. Nuenu babalondakaje mpindieu nudi anu mua kubakuata!’ Udi mumanye tshidi Lahaba ubengela bua kabakuatshi batentekedi aba anyi?— Bualu udi ne ditabuja kudi Yehowa ne mmujadike ne: Yehowa neafile ditunga dia Kanâna kudi bena Isalele.

Kumpala kua batentekedi aba kumbuka kua Lahaba, badi bamulaya ne: pabutuka Yeliko, yeye ne dîku diabu kabakufua to. Udi mumanye tshidibu bamuambila bua kuenza anyi?— Badi bamuambila ne: ‘Kuata nshinga mukunze eu, wamulembeleja pambelu ku dididishi diebe. Wewe mumulembeleje nanku, muntu yonso wikala mu nzubu muebe neasungidibue.’ Lahaba kuenzaye menemene anu muvua batentekedi bamuambile bua kuenza. Udi mumanye tshivua tshilue kuenzeka anyi?—

Matuku makese apita, bena Isalele kubanga kutua ngendu benda banyunguluka tshimenga atshi bapuwe talalaa. Kunyungulukabu tshimenga atshi nanku mu matuku asambombo, musangu umue ku dituku dionso. Kadi dituku dia muanda-mutekete, kuendabu ngendu misangu muanda-mutekete benda banyunguluka tshimenga atshi. Pashishe kuluabu bonso kuela mbila mikole, nunku Yehowa kubumbula bimanu binene bia tshimenga atshi biobi kudibeta panshi. Kadi nzubu uvua ne nshinga mukunze mulembelele pambelu ku dididishi kushalaye yeye anu muimane tendee!  Udi mumumonaku mu tshimfuanyi emu anyi?— Lahaba ne dîku diabu mbapanduke!

Bualu bua Lahaba budi bukulongeshaku tshinyi?— Lahaba wakitabuja Yehowa bua malu ende a dikema avuaye mumanye. Si nguewe eu pebe wenda umanya malu a dikema a Yehowa. Udiku pebe ne ditabuja bu muvua Lahaba nadi anyi?— Tuetu tudi bajadike ne: udi nadi!