Yezu ne bantu bavuaye wenza nabu luendu bakafika ku Yeliko uvua mu bule bua luendu lua dituku dimue kumbukila mu Yelushalema. Mu mushindu kampanda, Yeliko uvua ne bimenga bibidi, tshimenga tshia kale tshivua mu kilometre umue ne tshitupa kumbukila ku tshimenga tshia bena Lomo tshipiatshipia. Padi Yezu ne musumba wa bantu uvuaye nawu umbuka mu tshimue tshia ku bimenga ebi ne benda basemena pabuipi ne tshikuabu, bampofu babidi balombi ba ka pa luse badi bumvua mitoyi yabu. Umue dîna diende divua Bâtimayo.

Padi Bâtimayo ne mpofu mukuabu bumvua ne: Yezu uvua upitshila muaba au, badi batuadija kuela mbila ne: “Mukalenge, Muana wa Davidi, tumvuilaku luse!” (Matayi 20:30) Bamue bantu ba mu musumba badi babatandisha bua kupuwa, kadi bampofu babidi aba badi babandisha too ne mêyi bikole. Padi Yezu umvua mutoyi eu, udi wimana. Udi wambila bantu badiye nabu bua kubikila aba bavua bela mbila. Bantu badi baya kudi balombi ba ka pa luse, bambila umue wa kudibu ne: “Kolesha muoyo! Juka; udi ukubikila.” (Mâko 10:49) Mpofu eu udi wimansha tshilamba tshiende tshia pa mutu, utupika ne uya kudi Yezu ne disanka dionso.

Yezu wakebeja ne: “Nudi basue nnuenzele tshinyi?” Bampofu bonso babidi bakamusengelela ne: “Mukalenge, mêsu etu atabale.” (Matayi 20:32, 33) Yezu wakabumvuila luse, ke yeye kulenga mêsu abu ne kuambilaye umue wa kudibu ne: “Ndaku. Ditabuja diebe ndikuondope.” (Mâko 10:52) Bampofu babidi balombi ba ka pa luse aba, bakatuadija kumona, ne kakuyi mpata buonso buabu babidi bakatumbisha Nzambi. Pakamona bantu tshivua tshienzeke, bakatumbisha pabu Nzambi. Bantu bavua bampofu kumpala mpindieu badi batuadija kulonda Yezu.

Padi Yezu upita mu Yeliko kudi musumba wa bantu ba bungi udi mumunyunguluke. Muntu yonso mmusue kumona muntu uvua mutabeje bampofu. Bantu badi bafumina ku nseke yonso baya kudi Yezu, bamue kabena ne mushindu wa kumumona to. Zakayi pende kavua mua kumumona to. Uvua mfumu wa balambuishi ba bitadi mu Yeliko muonso. Bu muvuaye wa tshitupa, kavua mua kumona tshivua tshienzeka to. Nunku Zakayi wakanyema lubilu kumpala kuabu ne kubandaye ku mutshi wa tshikuyi (anyi mutshi wa mfigi wa tshisuku) mu njila uvua Yezu uyila. Bu muvuaye mubande kuulu, wakatuadija kumona bimpe bionso bivua bienzeka. Bu muvua Yezu wenda usemena wakamona Zakayi kuulu kua mutshi, kumuambilaye ne: “Zakayi, tuluka lukasa, bualu lelu ndi ne bua kutudila mu nzubu muebe.” (Luka 19:5) Zakayi wakatuluka ne kuyaye kuende lukasa bua kuakidila muenyi wa pa buende eu.

Pakamona bantu tshivua tshienzeke, bakatuadija kudiabakena. Bakamona ne: kabivua bimpe bua Yezu kuikala mubikidibue wa muntu uvuabu bamona bu muena mpekatu to. Bu muvua Zakayi mulambuishi wa bitadi, wakalua mubanji bua bintu bipetela mu njila mubi.

Pavua Yezu mubuele mu nzubu mua Zakayi, bantu bakadiabakena bamba ne: “Mmuye kuenda  buenyi kumbelu kua muenji wa mpekatu.” Kadi Yezu uvua mumone ne: Zakayi uvua ne mushindu wa kunyingalala bua mpekatu yende. Nunku kavua muele Yezu mâyi ku makasa to. Zakayi wakajuka ne kumuambila ne: “Tangila! Mukalenge, ndi mpesha bapele tshia bibidi tshia bintu bianyi, ne tshintu tshionso tshimvua munyenge muntu, ndi ntshipingaja misangu inayi.”​—Luka 19:7, 8.

Eu uvua mushindu muimpe uvua Zakayi muleje muvuaye munyingalale mu bulelela bua mpekatu yende. Uvua pamuapa mua kubala bungi bua bintu bivuaye mupetele kudi bena Yuda bashilashilangane ne kulaya bua kubipingaja misangu inayi. Bualu ebu buvua bupite too ne pa tshivua mikenji ya Nzambi ilomba. (Ekesode 22:1; Lewitiki 6:2-5) Bualu bukuabu, Zakayi wakalaya bua kupesha bapele tshia bibidi tshia bintu biende.

Yezu wakasanka bua muvua Zakayi muleje muvuaye munyingalale bua mpekatu yende, wakamuambila ne: “Lelu eu lupandu ndulue mu nzubu emu, bualu yeye pende mmuana wa Abalahama. Bualu Muana wa muntu uvua mulue kukeba tshivua tshijimine ne kutshipandisha.”​—Luka 19:9, 10.

Katupa kakese kumpala, Yezu uvua muakule bua nsombelu wa ‘muntu mujimine’ mu lusumuinu luende lua muana mujimine. (Luka 15:11-24) Muaba eu uvua mufile tshilejilu tshia bualu bulelela bua mu nsombelu wa muntu kampanda uvua mujimine kadi uvuabu balue kupeta. Bamfumu ba bitendelelu ne bena kuitabuja babu bavua mua kuikala badiabakena bua Yezu ne bavua bamupetule bua muvuaye mutabalele muntu bu Zakayi. Nansha nanku Yezu wakatungunuka ne kukeba ne kupingaja bana ba Abalahama aba bavua bajimine.