“Apuoyo riwruok maru nikech gombo maduong’ ma un-go mar tiyo ne Pinyruodh Nyasaye. Wamor ahinya gi ng’wono kod chiwruok maru e konyo Joneno weteu gi jomamoko.”

Meya ma Atlanta, Georgia, U.S.A. miluongo ni Kasim Reed e ma nondiko wechego e barua ma nondiko. Baruano ne rwako Joneno mag Jehova e chokruoge adek madongo mane idhi tim kuno.

Bende, City Council ma Atlanta nochiwo barua ma rwako welo moa e pinje maoko e chokruok. Baruano nowacho kama: “Nitie Joneno mag Jehova madirom milion aboro ma wuok kuonde mopogore opogore kendo giwacho dhok mopogore opogore to pod uriworu e timo gimoro achiel. Udwaro miyo Jehova duong’ ma en Nyasaye ma muma wuoyoe kendo ma nochueyo gik moko duto.”

Chokruoge madongo adek ne otim kuno e dwe mar Julai gi Agost higa mar 2014. Ariyo kuomgi ne otim e dho Kisungu to machielo e dho Spanish. Welo nowuok e pinje madirom 28 kama, kendo programbe mag dho Kisungu ne olok e dho Russia gi Japan mondo welo moa kuondego bende opuonjre gimoro. Ji duto mane odhi e chokruogego ne gin 95,689.

E higa mar 2014, Joneno mag Jehova ne obedo gi chokruoge madongo 24 e pinje ochiko to 16 kuomgi ne otim e kuonde mopogore opogore e piny Amerka.