Chieng’ moro ka ne piny ng’ich ahinya, Bob ne riembo mtoke e taon mar Alberta e piny Canada e spid mar kilomita 100 e sa achiel. Tielo machien mar mtoke noyiech. Mokwongo okwongo, Bob ne ok ofwenyo gima notimoreno, omiyo, nodhi mana nyime riembo kochomo ode ma ne ni kilomita abich kama.

 Bang’e, Bob nondiko barua ne Od Romo mar Joneno mag Jehova ma ni e alworagi kolero gimoro makende ma notimore e wuodheno. Nowacho niya: “Rowere moko abich ma ne ni e mtoka moro nosudo machiegni gi mtokana, kae to giyawo kio mar dirisagi. Ne ginyisa ni achiel kuom tielo machien mag mtokana noyiech. Ne gichungo mtoka e bath ndara, kae to gikonya loko tielono. Ne ok an gadier ka be ne an gi tielo ma nanyalo wilo, kod jek ma nanyalo thulogo mtoka. Ka ne abet e bath ndara e wheelchair, ne gilak mi gidonjo e bwo mtokana ma giyudo tielo ma spare gi jek, kendo ne giwilona tielono. Piny ne ng’ich ahinya, kendo pe matindo tindo ne lwar. Bende, kata obedo ni rowerego ne orwakore maler, mano ne ok omonogi lokona tielono. Bang’ mano, nadhi nyime gi wuodha. Kuom adier, di ne ok aloko tielono kenda.

 “Agoyo erokamano mathoth ne rowere abich ma Jonenogo kuom konya. Noyudo gin e tijgi mar yalo wach Nyasaye e alworano. Rowerego nonyiso maler ni yalo ok en mana wuoyo gi ji, to oriwo nyaka timo ne ji gik ma giyalogo. Ka di ne ok gikonya, di ne ayudora e chal matek ahinya. Agoyonegi erokamano mathoth. Ne ok ang’eyo ni ne adhi yudo malaike kaka mago e ndarano!”