E higa mar 2017 Joneno moko ma dirom 12 nochako kwang’o yie ka giwuok kamoro miluongo ni Mosquito (Miskito) e piny Nicaragua. Yiegino niluongo Sturi Yamni. Stephen ma ne en achiel kuom Jonenogo wacho kama: “Dwarowa maduong’ ne en jiwo Joneno ma nok modak e alwora ma nosokoreno, kendo konyogi lando wach maber e alworagi ma ne duong’no.”

 Joneno apar gariyogo nowuok Pearl Lagoon mi gidhi Río Grande de Matagalpa ma en wuodh kilomita 200. Ne ok ging’eyo ni nying yie ma ne gin-gono kolok e dho Miskito tiende en “Wach Maber” kendo ni ne odhi mulo chuny joma nodak e bath aorano. Bang’ kwang’ kuom seche ma dirom 12 (ka ok okwan seche ma ne gibuoroe kamoro gotieno) Jonenogo nochopo e gweng’ mar La Cruz de Río Grande, kuma ne gidhiye. Joneno mag Jehova auchiel modak e gweng’no norwako jowetegi ma nobirogo gi mor.

 Otienono kodh yamo mager nochue e gweng’ mar Río Grande de Matagalpa. Bang’ seche moko, aora ma gweng’no nopong’ kendo pi nomedore ameda kuom odiechienge ariyo ma noluwo. Pi nopong’o Od Romo kod ute mang’eny man La Cruz. Joneno ma nodhi lendo e alworano nokonyo Joneno wetegi daro gigegi, kendo kuom otieno ariyo moluwore, thothgi nobuoro e od gorofa moro mar Janeno moro ma bende nodak e alworano.

 E otieno mar adek, meya mar La Cruz nodhi ir Jonenogo mondo gikonye e yo moro. Nikech yie ma ne gin-go ma ne iluongo ni Sturi Yamni, e yie kende ma ne nyalo muomo aora ma nopong’no, meyano nokwayogi ka ne ginyalo kwang’o jochiw kony mondo gidhi gikony jomamoko ma nodak e gweng’no. Jonenogo noyie timo kamano.

 Kinyne gokinyi, Joneno moko adek nochako kwang’o yieno ka giting’o jochiw konygo. Stephen wacho kama: “Aorano nopong’ thich. Yiende madongo ma ne ohula osemuko ne lewo alewa e wi pi. Kuonde moko to pi ne lworore matek ahinya kendo aorano pige ne ringo kilomita mokalo 18 kuom sa achiel.” Kata obedo ni weche ne tek kamano, yiegino nomuomo ohulano motero kony e gwenge moko adek.

 Joneno adekgo notiyo gi thuolono e hoyo chuny joma nodak e gwengego. Ne gichiwo kopi mang’eny mag Amkeni! ma higa 2017 ma wiye ne wacho ni “Majanga Yanapotokea​—Unachoweza Kufanya Ili Uokoke.”

 Joma nodak e gwenge man machiegni gi aorano nogoyo erokamano ahinya kuom kony ma Jonenogo nochiwonegi, moriwo nyaka puonjogi Wach Nyasaye. Moko kuomgi nowacho kama: “Giikore konyowa kata e kinde matek ahinya.” Moko to nowacho niya: “Jonenogo ohero jowetegi gadier.” Bang’ neno kinda ma Jonenogo notimo e konyo Jokristo wetegi kaachiel gi jomamoko, thoth joma odak e gwengego oserwako wach maber ma wuok e Muma kendo ma hoyo chuny ji.