Ka Yesu ni Kapernaum e sunagogi, opuonjo ji ni en e makate madier moa e polo. Wechenego medo lero matut gima ne owacho ne oganda ma ne oduogo koa yo wuok-chieng’ mar Nam Galili, ma e oganda ma nochamo makate kod rech ma nochiwo kuno.

Yesu dhi nyime gi mbakano kowacho niya: “Kwereu nochamo manna e thim to e ma pod ne githo.” Yesu koro leronegi pogruok mantie kowacho kama: “An e makate ma ne olor koa e polo. Ka ng’ato ochamo makateno, obiro dak nyaka chieng’; to kuom adier makate ma abiro chiwo mondo piny obed gi ngima, en ringra.”​—Johana 6:48-51.

E dwe mar Mach kata April kama e higa mar 30, Yesu nowacho ne Nikodemo ni Nyasaye nohero piny ahinya mi nochiwo Wuode mondo obed Jawar. Yesu koro jiwo gimomiyo dwarore ni ji ocham ringrene. Nyaka gitim kamano kuom nyiso yie e misango mobiro chiwo. Mano e yo kende ma ginyalo yudogo ngima ma nyaka chieng’.

Kata kamano, jogo chwanyore nikech weche ma Yesu owachogo. Gipenje kama: “Ere kaka ng’atni nyalo miyowa ringrene mondo wacham?” (Johana 6:52) Yesu dwaro ni ging’e ni gima owachono en ngero. Wechene ma luwogi nyiso tiend gima owuoyoe.

Yesu wachonegi kama: “Ka ok uchamo ringre Wuod dhano kendo ka ok umadho rembe, uonge ngima kuomu uwegi. Ng’ato ang’ata ma chamo ringra kendo ma madho remba nigi ngima ma nyaka chieng’, . . . nikech ringra en chiemo madier kendo remba en math madier. Ng’at ma chamo ringra kendo ma madho remba, osiko e winjruok achiel koda, kendo asiko e winjruok achiel kode.”​—Johana 6:53-56.

Par ane kaka mano en tim ma kwero e wang’ Jo-Yahudi ma winje! Ginyalo paro ni Yesu wachonegi ni gicham ringre dhano kata madho remo ma en gima chik Nyasaye kwedo. (Chakruok 9:4; Tim Jo-Lawi 17:10, 11) Kata kamano, gima Yesu wuoyoe ok en chamo ringrene kata madho rembe e yo ma sie. Otemo nyiso ni jogo duto ma dwaro yudo ngima ma nyaka chieng’ nyaka nyis yie kuom misango mobiro chiwo ka oneg ringrene ma onge richo kendo ochuer rembe. To kata mana thoth jopuonjrene pod ok winj tiend puonjno. Moko kuomgi wacho kama: “Wechego bwogo ji; en ng’a ma nyalo winjogi?”​—Johana 6:60.

Yesu fwenyo ni moko kuom jopuonjrene bende ng’ur, omiyo openjogi niya: “Be dibed ni wachno chwanyou? To kare, biro bet nade ka uneno Wuod dhano ka idho nyaka kama ne entieree motelo? . . . Weche ma asewachonu gin moa kuom roho maler kendo gikelo ngima. To nitie jomoko kuomu ma onge yie.” Gikanyono, thoth jopuonjrene weye kendo koro ok gidhi nyime luwe.​—Johana 6:61-64.

Omiyo, Yesu penjo jootene 12 niya: “Un bende udwaro dhi, koso?” Petro dwoko kama: “Ruoth, en ng’a ma dwadhi ire? In gi weche mag ngima ma nyaka chieng’. Wasenyiso yie, kendo waseng’eyo ni in e Ng’at Maler mar Nyasaye.” (Johana 6:67-69) Mano kaka Petro gi joote mamoko nyiso ni gin gi yie motegno kata obedo ni gie sani to pod ok ging’eyo tiend puonjno maber chuth!

Kata obedo ni Yesu mor gi dwoko ma Petro ochiwono, owachonegi kama: “Donge nayierou ji apar gariyo, koso? To achiel kuomu en jaketh-nying.” (Johana 6:70) Yesu wuoyo e wi Judas Iskariot. Nyalo bedo ni nyaka chop sani Yesu osefwenyo ni Judas osechako timo gik ma nyiso ni en gi gombo morochore.

Kata kamano, nyaka bed ni Yesu mor kuom ng’eyo ni Petro kod joote mamoko luwe ma ok giwe kendo gidhi nyime tiyo kode tich ma otimo sani mar reso ngima ji.