NE ROWERE
10: Bedo Ng’at Minyalo Gen
TIEND WACHNO
Joma inyalo gen gin joma jonyuolgi, osiepegi, kata joma ondikogi tich ni gadier kuom gik ma giwacho kata ma gitimo. Gin joma luwo kaka ichikogi, ma chopo singogi, kendo ma wacho adier kinde duto.
GIMOMIYO EN GIMA DUONG’
Thothne, kisenyiso kuom kinde malach ni in ng’at minyalo gen, e ka inyalo miyi thuolo mar timo gik moko ma onge ng’ama chiki.
“Yo maber minyalo miyo jonyuolni ogenigo en kuom nyiso ni in ng’ama otegno e paro kendo ma kawo ting’ne mapek, ok mana sama in kodgi kende, to kata sama gionge.”—Sarahi.
PUONJ MA MUMA CHIWO: “Sikuru ka unyiso gadier gima un uwegi.”—2 Jo-Korintho 13:5.
GIMA INYALO TIMO
Timo gik ma luwogi nyalo miyo jonyuolni odhi nyime geni, kata gichak geni kendo.
Bed jaratiro. Gimoro achiel maduong’ ma biro miyo ji kik geni en bedo jamiriambo. Mopogore gi mano, ka in ng’at ma jaratiro kendo ma wacho adier, ahinya-ahinya sama itimo ketho moro, mano biro miyo jomamoko ogeni.
“En gima yot bedo jaratiro sama weche dhi maber. Kata kamano, sama ibedo jaratiro kata e gimoro ma nyalo miyo inenri ng’ama rach, ibiro miyo ji omed geni moloyo.”—Caiman.
PUONJ MA MUMA CHIWO: “Wadwaro bedo joratiro e gik moko duto.”—Jo-Hibrania 13:18.
Kik ibed ng’at ma nyaka parne gimoro e ka otim. Nonro moro ma notim e piny Amerka nyiso ni pasent 78 mar joma ndiko ji e tich nowacho ni achiel kuom gik ma ging’iyoga kuom ng’ato ka ng’ato ma gidwaro ndiko en ka be “en ng’at ma timo gik moko ma ok oparne.” Kipuonjori timo gik moko sani ka ok oparni, to mano biro konyi ka ibedo ng’ama duong’.
“Jonyuolna nyaloga fwenyo sama akawo ting’na mapek kendo timo tijega ma ok oparna. Kaka amedo nyiso chuny ma kamano, e kaka jonyuolna bende medo gena.”—Sarah.
PUONJ MA MUMA CHIWO: “An gadier ni ibiro timo kaka asayino, . . . ang’eyo ni ibiro timo kata mana mokalo gik ma asewachogo.”—Filemon 21.
Bed ng’at ma hore. En gima yot fwenyo ni ng’ato dongo kendo bedo ng’ama duong’ nikech en gima ji duto biro neno. Kata kamano, biro kawo kinde mondo ng’ato ofweny ni isetimo dongruok e yo mitimogo gik moko kata yo miparogo, to mano e momiyo onego ihori.
“Jonyuolni kata jomamoko ok bi geni mana nikech gimoro achiel maber ma itimo. Dwarore ni idhi nyime timo gik mabeyo kuom kinde, e ka ibiro geni.”—Brandon.
PUONJ MA MUMA CHIWO: “Rwakuru . . . horuok.”—Jo-Kolosai 3:12.
