1, 2. Ere kaka jaote Paulo nonyiso ni ogoyo erokamano nikech ng’wono mogundho ma ne Nyasaye onyise?

JAOTE Paulo nowacho gi chuny maler niya: ‘Ng’wono mogundho ma Nyasaye nonyisa ok nobedo kayiem nono.’ (Som 1 Jo-Korintho 15:9, 10.) Paulo nong’eyo maler ni ne ok owinjore yudo ng’wono mar Nyasaye nikech ne osebedo ka osando Jokristo e kinde mokalo.

² Ka ne Paulo chiegni tho, nondiko ne Timotheo niya: “Agoyo erokamano ne Kristo Yesu Ruodhwa ma nomiya teko, nikech nokwana kaka ng’at migeno kuom miya migawo e tij Nyasaye.” (1 Tim. 1:12-14) Migawo ma ne omiye e tij Nyasaye ne en mane? Paulo nochiwo dwoko mar penjono e barua ma ne ondiko ne jodong-kanyakla ma Efeso kowachonegi niya: “Ok akwan ngimana ka gimoro maduong’ ahinya, to adwaro mana ni atiek ng’weya kod tich ma Ruoth Yesu ne omiya, ni mondo achiw neno e okang’ malong’o chuth e wi wach maber mar ng’wono mogundho mar Nyasaye.”—Tich 20:24.

3. En tich mane makende ma ne omi Paulo? (Ne picha manie chak sulani.)

 ³ En wach mane maber ma Paulo nolando ma ne nyiso ni Jehova en Nyasaye ma opong’ gi ng’wono mogundho? Nonyiso Jokristo ma Efeso kama: “Usewinjo wach ting’ ma ne omiya mar bedo jarit mar ng’wono mogundho mar Nyasaye mondo uyud ber.” (Efe. 3:1, 2) Ne omi Paulo tich mar lando wach maber ne joma ok Jo-Yahudi ni gin bende inyalo migi thuolo mar bedo joma biro locho gi Kristo e Pinyruodh Mesia. (Som Jo-Efeso 3:5-8.) Paulo noketo ne Jokristo ma kindegi ranyisi maber kuom bedo gi kinda e tij lendo, konyisogo ni ng’wono mogundho ma Nyasaye nonyise ne ok obedo “kayiem nono.”

4, 5. Ang’o momiyo wanyalo wacho ni ‘wach maber mar Pinyruoth’ bende inyalo luong ni “wach maber mar ng’wono mogundho mar Nyasaye”?

⁴ E ndalo mag gikogi, jotich Jehova duto osemi chik mar lando ‘wach maber mar Pinyruoth mondo ochiw neno ne ogendni duto.’ (Mat. 24:14) Wach ma walando bende iluongo ni “wach maber mar ng’wono mogundho mar Nyasaye,” nikech gueth duto ma wageno yudo e bwo loch mar Pinyruodh Nyasaye, wabiro yudo nikech ng’wonone monyisowa kokalo kuom Kristo. (Efe. 1:3) Be walendo gi kinda kaka Paulo mondo wanyisgo ni wagone Jehova erokamano kuom ng’wonone mogundho?—Som Jo-Rumi 1:14-16.

⁵ E sula mokalo, ne wapuonjore ni kata obedo ni wan joricho, pod wayudo gueth mang’eny nikech ng’wono mogundho mar Jehova. Kuom mano, waduto wan gi ting’ mar nyiso ji duto kaka Jehova ohero dhano kod kaka ginyalo yudo gueth nikech hera mar Jehova. Gin yore mage ma Nyasaye nyisogo ng’wonone mogundho ma onego wanyis jomoko?

6, 7. Ang’o momiyo wanyalo wacho ni walando ne ji wach maber mar ng’wono mogundho mar Nyasaye sama waleronegi tiend rawar?

⁶ E kindegi, ji mang’eny ong’iyo gi timo richo kendo chunygi ok chandgi, omiyo, ok ging’eyo gimomiyo onego owar dhano e richo. To bende, ji mang’eny osefwenyo ni timo atima richo kaka gihero ok kel mor madier. Ji mang’eny ok ong’eyo ni richo en ang’o, kaka richo hinyo dhano, kod gima dwarore ni watim mondo oreswa a e richo. Ging’eyoga wechego mana bang’ wuoyo gi Joneno mag Jehova. Joma dwaro ng’eyo Jehova gadier bedoga mamor bang’ ng’eyo ni hera kod ng’wono mogundho e ma nomiyo Jehova ooro Wuode e piny mondo obi oreswa kogolowa e richo kod tho.—1 Joh. 4:9, 10.

⁷ Paulo nondiko kama kowuoyo kuom Yesu: “Kokalo kuom remb jalo, rawar nogonyowa, ee, ne owenwa kethowa nikech ng’wono mogundho mar Nyasaye.” (Efe. 1:7) Misango mar rawar mar Kristo e yo maduong’ie mogik ma Nyasaye nyisogo kaka oherowa kod kaka opong’ gi ng’wono mogundho. Wamor ng’eyo ni ka waketo yie kuom remb Yesu ma nochuer, inyalo wenwa richowa kendo wanyalo bedo gi chuny maler e nyim Nyasaye. (Hib. 9:14) Mano en wach maber ma onego waland ne ji duto.

8. Ang’o momiyo dwarore ni olos winjruok e kind dhano ma joricho kod Nyasaye?

⁸ Wan gi ting’ mar nyiso dhano wetewa ni ginyalo bedo gi winjruok maber gi Jachuechgi. Nyasaye neno dhano kaka wasike sama pok giketo yie margi kuom misango mar Kristo. Jaote Johana nondiko kama: “Ng’at ma nyiso yie kuom Wuod Nyasaye nigi ngima ma nyaka chieng’; to ng’at ma ok winj Wuowi ok none ngima, to mirimb Nyasaye siko kuome.” (Joh. 3:36) Gima ber en ni misango mar Kristo miyo wanyalo bedo gi winjruok maber gi Nyasaye. Paulo nowacho niya: “Un ma chon ne un mabor kendo ne un wasigu nikech pachu ne ni kuom timbe maricho, koro sani oseloso winjruok e kindu kode kokalo kuom thone.”—Kol. 1:21, 22.

9, 10. (a) En tich mane ma Kristo ne omiyo Jokristo mowal? (b) Ere kaka “rombe mamoko” riwo lwedo Jokristo mowal?

⁹ Paulo nowacho ni Kristo osemiyo owetene mowal ma pod ni e piny “tich mar konyo ji olos winjruok” gi Nyasaye. Paulo nolero wachni ka nondiko ne joma owal ma ne ni e kanyakla mar Jokristo mokwongo niya: “Gik moko duto a kuom Nyasaye ma ne oloso winjruok maber e kindwa kode kokalo kuom Kristo, kendo nomiyowa tich mar konyo ji olos winjruok kode, tiende ni kokalo kuom Kristo, Nyasaye ne loso winjruok gi piny duto, ma ok okwan kethogi e wigi kendo, to wan nomiyowa tij lando wach winjruogno. Kuom mano, wan joma oor ma tiyo e lo Kristo mana ka gima Nyasaye hombo ji kokalo kuomwa. Kaka joma tiyo e lo Kristo, wasayo kama: ‘Losuru winjruok maber gi Nyasaye.’ ”—2 Kor. 5:18-20.

¹⁰ “Rombe mamoko” neno ni en gueth makende riwo lwedo Jokristo mowal e tij konyo ji mondo obed gi winjruok maber gi Nyasaye. (Joh. 10:16) Rombe mamoko tiyo kaka joma Kristo ooro mondo gipuonj ji mathoth kaka nyalore ong’e adiera kendo konyogi mondo gibed gi winjruok maber gi Jehova. Ma en achiel kuom yo maduong’ ma gichiwogo neno malong’o chuth e wi wach maber mar ng’wono mogundho mar Nyasaye.

11, 12. Ang’o momiyo puonjo ji ni ginyalo wuoyo gi Jehova e lamo en wach maber?

¹¹ Ji mang’eny lemo mana nikech mano miyo giwinjo maber bang’ lemo, to ok ni nikech Nyasaye winjo lamogi. Onego ging’e ni Jehova “winjo kwayo mar ji.” Daudi nowacho niya: ‘A in ma winjo kwayo mar ji, ji duto nobi iri. Tim mamono oloya: to timwa mwabayogo inipwodhgi chuth.’—Zab. 65:2, 3.

¹² Yesu nowacho ne jopuonjrene niya: “Ka ukwayo gimoro amora e nyinga, abiro timonugo.” (Joh. 14:14) Gimoro amora ma ndikoni wuoye nyaka bed gima luwore gi dwach Jehova. Johana singonwa kama: “Adier ma wan-go kuom Nyasaye e ma, ni gimoro amora ma wakwaye ka luwore gi dwache, owinjowa.” (1 Joh. 5:14) Donge en gima ber ka wapuonjo ji ni lamo en yo ma wadhigo “e nyim kom-loch mar ng’wono mogundho mar Nyasaye,” to ok ni en mana gima miyo wawinjo maber? (Hib. 4:16) Ka wapuonjogi kaka onego gilem, ng’at monego giwuogo e lamo, kendo e wi gik mowinjore gikwa, wakonyogi sudo machiegni gi Jehova, to mano  hoyogi e kinde mag chandruok.—Zab. 4:1; 145:18.

13, 14. (a) Gin gueth mage ma Jokristo mowal biro yudo e kinde mabiro? (b) En tich mane maber ma Jokristo mowal biro timo ne dhano?

¹³ Jehova biro dhi nyime nyiso ji ng’wono mogundho nyaka e piny manyien. Paulo nowuoyo e wi gueth makende ma Nyasaye osemiyo Jokristo 144,000, ma biro locho gi Kristo e Pinyruodh polo ka ne owacho niya: “Nyasaye mogundho gi kech, kendo nikech hera maduong’ ma noherowago, nomiyo wadoko mangima kanyachiel gi Kristo kata kane wasetho nikech kethowa—oseresu kokalo kuom ng’wono mogundho mar Nyasaye. E wi mano, nochierowa kanyachiel kode, mi noketowa kanyachiel e polo e winjruok achiel gi Kristo Yesu, mondo e ndalo ma biro, onyis kaka ng’wonone mogundho ng’eny gilala kokalo kuom kech monyisowa e winjruok achiel gi Kristo Yesu.”—Efe. 2:4-7.

¹⁴ Gueth ma Jokristo mowal biro yudo ka gilocho gi Kristo e polo thoth ma ok wanyal pimo. (Luka 22:28-30; Fil. 3:20, 21; 1 Joh. 3:2) Jehova biro nyisogi “kaka ng’wonone mogundho ng’eny gilala.” Gin e ma gibiro bedo “Jerusalem Manyien,” tiende ni miaha mar Kristo. (Fwe. 3:12; 17:14; 21:2, 9, 10) Gibiro tiyo kanyachiel gi Yesu e “chango ogendni” duto ma winjo Nyasaye mondo gibed thuolo koa e bwo loch mar richo kod tho, kendo konyogi mondo gibed joma kare.—Som Fweny 22:1, 2, 17.

15, 16. Ere kaka Jehova biro nyiso “rombe mamoko” ng’wonone mogundho e kinde mabiro?

¹⁵ Ndiko mar Jo-Efeso 2:7, wacho ni Nyasaye biro dhi nyime nyiso ng’wonone mogundho nyaka e “ndalo ma biro.” E kindeno, ji duto ma biro dak e piny manyien biro neno kaka ng’wono mogundho mar Jehova ng’eny gilala. (Luka 18:29, 30) Achiel kuom yore madongo ma Jehova biro nyisogo ng’wonone e piny en chiero jomotho manie liete. (Ayub 14:13-15; Joh. 5:28, 29) Jotich Nyasaye duto ma notho ka ne Kristo pok ochiwo ngimane kaka misango, kaachiel gi “rombe mamoko” ma otho ka tiyo ne Jehova e ndalo mag gikogi, ibiro chier mondo odhi nyime tiyo ne Jehova.

¹⁶ Ji mathoth ma notho ka pok ong’eyo Nyasaye bende ibiro chier. Ibiro migi thuolo mar nyiso ka be giyie ni Jehova e ma obed jalochgi. Johana nondiko niya: “Ne aneno joma otho, madongo gi matindo, kochung’ e nyim kom-lojno, kendo ne oyaw buge modol. To ne oyaw buk machielo; en buk mar ngima. Ne ong’ad ne joma otho bura koa e weche mondik ei bugego ka luwore gi timbegi. To nam nogolo joma otho manie iye, kendo tho gi Liel nogolo joma otho manie igi, eka ne ong’adnegi bura ng’ato ka ng’ato ka luwore gi timbene.” (Fwe. 20:12, 13) Jogo duto mibiro chier pod nyaka bi puonjre kaka ginyalo tiyo gi puonj manie Muma. Bende, gibiro puonjore chike ma biro yudore e “buge modol” malero gik ma Jehova dwaro ni jogo modak e piny manyien oluw. Yo machielo ma Jehova biro nyisowago ng’wonone mogundho, en konyowa ng’eyo weche manie buge modolgo.

17. Ang’o monego waket e paro sama walendo?

¹⁷ Kaka giko medo kayo machiegni, dwarowa maduong’ en ni wamed lando wach maber mar Pinyruoth moloyo kinde moro amora. (Mar. 13:10) Wach maber mwalando konyo ji ng’eyo ng’wono mogundho ma Jehova nigo. Ma en gima onego wapar kinde duto ka walendo. Gima duong’ momiyo walendo en nikech wadwaro miyo Jehova duong’. Wanyalo timo kamano kuom konyo joma walendonegi mondo ong’e ni gueth mwageno yudo e piny manyien biro betie nikech ng’wono mar Jehova.

18, 19. Ere kaka wamiyo ji ng’eyo ng’wono mogundho mar Jehova?

¹⁸ Sama walendo, onego wanyis ji ni e bwo loch mar Kristo, dhano biro yudo gueth duto nikech misango mar rawar kendo mos mos gibiro bedo joma kare chuth. Muma wacho kama: “Chuech bende [ibiro gony] oa e tuech mar tow, eka giyud thuolo ma nigi duong’ mar bedo nyithind Nyasaye.” (Rumi 8:21) Mano biro nyalore mana nikech ng’wono mogundho mar Jehova.

¹⁹ Wan gi thuolo majaber mar nyiso ji duto moyie chiko itgi gueth duto manie ndiko mar Fweny 21:4, 5 ma wacho niya: ‘Nyasaye biro yweyo pi wang’ duto oa e wengegi, mi tho ok nobedie kendo, kata kuyo, kata nduru, kata rem ok nobedie kendo. Gik machon osekadho.’ Kendo Jehova ma e jal mobet e kom-loch, wacho kama: “Neuru! Aloso gik moko duto obed manyien.” Bende owacho niya: “Ndik, nikech wechegi gin migeno kendo madier.” Sama walando ne ji wach maber gi kinda, wamiyo ji ng’eyo ng’wono mogundho mar Jehova.