WACH MADUONG’ MA GASET WUOYOE | SAMA NG’AT MWAHERO OTHO
Be Kuyo Rach?
Be tuwo moro osegagoie matek kuom kinde? Nyalo bedo ni ok inyal paro kindeno nikech ne ichango mapiyo. Kata kamano, kuyo sama ng’at mwahero otho kawoga kinde mang’eny moloyo. Laktar moro miluongo ni Alan Wolfelt, nondiko e buk moro miluongo ni Healing a Spouse’s Grieving Heart niya: “Onge ng’ama nyalo wacho ni ‘oseloyo’ kuyo.” Kata kamano, omedo wacho niya: “Kokalo kuom kony ma jomoko chiwo, lit ma ng’ato nigo bang’ lalo ng’ate mogeno e tho dokga piny kaka kinde medo kalo.”
Kuom ranyisi, par ane gima jatich Nyasaye miluongo ni Ibrahim notimo ka ne jaode otho. Muma wacho ni, “Ibrahim [nochako] dengo nikech Sara, kendo mondo oyuage.” Wach motigo kanyo ni “nochako” nyalo nyiso ni en gima nokawo kinde ka pod onyagore gi kuyo mar lalo jaode. * Ranyisi machielo en mar Jakobo ma ne owuond ni ondiek marach osenego wuode ma Josef. Noywago wuode kuom “ndalo momedore,” ma kata joode duto ne ok nyal hoye. Higni mang’eny bang’e, pod chunye ne lit ahinya koparo tho Josef.—Chakruok 23:2; 37:34, 35; 42:36; 45:28.
Ibrahim noywago Sara jaode ma nohero
Mano bende e gima jatimre ndalogi sama ng’ato olalo ng’at mohero e tho. Par ane ranyisi ariyo ma luwogi.
-
‘Robert chwora ne otho tarik 9 dwe mar Julai, 2008. E odiechieng’ ma notho e masira mar ndarano, gik moko ne chal mana kaka odiechienge mamoko mapile. Ne wamadho chai kanyachiel, kae to ogoyona oriti konyisa ni “aheri jaoda.” Sani koro higni auchiel osekalo, to pod awinjo malit ahinya e chunya. Ok apar ni kuyo ma an-go nikech tho mar Robert chieng’ norum.’—Gail ma sani jahigni 60.
-
“Kata obedo ni chiega notho higni 18 mosekalo, pod akuyoga ahinya ka apare. Samoro amora ma aneno gimoro ma lombo wang’a, gima kwongoga biro e pacha en kaka jaoda dine omor ka en bende oneno gino.”—Etienne ma sani jahigni 84.
Kuom mano, nenore maler ni kuyo mosiko mwabedogago sama ng’at mwageno otho en gima timorega ne dhano duto. Ng’ato ka ng’ato nigi yo mokuyogo, omiyo ok owinjore wang’ad ne ng’ato ang’ata bura kuom yo ma okuyogo sama ng’ate otho. E wi mano, ok onego chunywa oketnwa bura ni yo ma wanyisogo ni wakuyo okalo tong’. Ere kaka wanyalo nyagore gi kuyo?
^ par. 4 Wuod Ibrahim ma Isaka, bende nokuyo kuom ndalo mathoth bang’ lalo min-gi e tho. Mana kaka oler e sula ma wiye wacho ni “Luw Yie Margi” e gasedni, Isaka pod ne ywago Sara higni adek bang’ thone.—Chakruok 24:67.
Samoro Inyalo Hero Magi Bende
NENURU!
Kuyo—Pek Minyalo Romogo Sama Watni Kata Osiepni Moro Otho
Gin pek mage ma ng’ato nyalo romogo ka watne kata osiepne moro otho?
