CHIENG’ Wuok Tich Septemba tarik 1 higa mar 1919, piny noru ka chieng’ rieny bang’ odiechienge mag koth gi yamo. Ka nochopo odiechieng’, ji matin ma kwan-gi ok rom 1,000 nobet kama ji 2,500 ne nyalo betie, mondo giwinj program mokwongo e chokruok maduong’ ma ne otim Cedar Point, Ohio, e piny Amerka. Ka nochopo godhiambo, ji 2,000 nomedore. Moko kuomgi nobiro koidho yie, mtokni matindo, kod geche reru madongo. Chieng’ Tich Ariyo, ji nobedo mang’eny ahinya ma nochuno ni program ma nodong’ otim oko e tie yiende.

Ler mar chieng’ ma ne kalo e dier oboke e tipo ka ma ji nobetie ne menyo kode chwo kendo loso tipo machal gi les kata law motuch otuch. Yamo mokuwe ma ne kutho kowuok e Nam Erie ne kwadho ugute ma nyimine norwako. Owadwa moro wacho gima notimore niya: “Pap motimo yiende kendo mokuwe ma ne wantiereno, ne bor ahinya gi kuonde ma ji ne goyoe koko, kendo kanyo ne chalo mana gi paradiso.”

Mor ma ne nie wenge joma nochokore kanyo ne ng’eny ma ok nyal pim gi alwora maberno. Gaset moro nondiko niya: “Jogo duto ne gin joma nenore ni ochiwore ne lamo adier, ne gimor kendo ne giherore mokalo.” Kuom Jopuonjre mag Muma, chokruok kanyachiel gi Jokristo wetegi ne bernegi ahinya nikech noyudo e ka higini matin osekalo bang’ wuok e sand mager. Noyudo gisekalo e akwede mager e kinde lweny. E wi mano, akwede ne ng’eny e kanyakla mathoth, kendo Bethel ma Brooklyn ne olor. Bende, owete gi nyimine ma ne lando wach Pinyruoth ne otwe, moriwo nyaka owete aboro ma ne tayo oganda Jehova. Owete aborogo ne ong’adnegi buch tuech mar higni 20. *

Moko kuom Jopuonjre mag Muma chunygi nonyosore kendo piny nochamogi ahinya. Mano ne en nikech ngima noridore ahinya e hignigo ma omiyo giweyo chiwo neno. Thothgi to notimo duto ma ne ginyalo mondo gichung’ motegno kata bed ni sirkal ne oridonegi ngima. E kindego, jatim nonro moro nowacho ni kata e kinde ma ne omi Jopuonjre mag Muma siem mager, moko ma  nowuoyogo noramo ni gin ne gidhi “medo lando wach Nyasaye nyaka giko.”

Kuom kinde duto ma tem ne gerieno, Jopuonjre mag Muma nosiko ka “weyo mondo Ruoth otelnegi, . . . ka gikwayo mondo Wuon-gi otagi.” Koro ne giriwore kanyachiel kendo e chokruok ma ne otim Cedar Point. Nyaminwa moro ma bende ne nie chokruogno, nowacho kaka thothgi ne wuoro kaka ne gidhi chako “tiyo tij lendo gi kinda kendo.” Chunygi ne gombo ahinya chako tijno kendo.

Kuom juma achiel ma ji nochokoree, ne giwuoro ahinya tiend nyukta mag “GA” ma nondik e otas mar program, kad mar gwelo ji, kod e alwora mar kama ne gichokoreno. Chieng’ Tich Abich, Joseph F. Rutherford nolero ne ji 6,000 tiend nyukta mag “GA.” Nyuktago nochung’ne nying gaset manyien mar lendo miluongo gi dho Kisungu ni The Golden Age. *

Kowuoyo e wi Jokristo wetene mowal, Owadwa Rutherford nowacho niya: ‘Kata bed ni ne gin e chandruok kamano, yie ma ne gin-go ne miyo gineno kinde ma ngima ne dhi bedo maber e bwo loch Mesia. Ne gikwano ni lando ne piny duto biro mar loch mar Mesia en gueth makende. Mano ne en achiel kuom migawo ma Nyasaye nomiyogi.’

The Golden Age ne en gaset moting’o adiera kod geno madier ma ne idhi tigo e yawo yo machielo mar lando adiera. Yorno ne en kampen mitimo e ot ka ot. Kane openjgi ni ng’a gini ma ne gombo tiyo tijno, giduto ne giyie gi wachno ka gimor. Kae to ne giwero wer moro e dho Kisungu niya; “with a zest and zeal known only by those who follow in the footsteps of Jesus. Send out thy light and truth, O Lord.” Owadwa J. M. Norris paro kindego kowacho niya: “Wiya ok nowil gi kaka yiende ne yiengni sama wawer.”

Bang’ programbno, owete gi nyimine noriedo kuom seche mang’eny mondo gindik nyinggi kaka joma okwongo ma biroga yudo gasedno dwe ka dwe. Thothgi ne winjo kaka Mabel Philbrick ma nowacho kama: “Mano kaka ne wamor ng’eyo ni koro kendo ne wan gi tich monego watim!”

Chiegni Jopuonjre mag Muma 7,000 noikore ne tij lendo. Kalatas matin ma niluongo ni Organization Method kod buk matin ma niluongo ni To Whom the Work Is Entrusted (Ne Joma Tijno Oket e Lwetgi) noting’o weche ma luwogi: Migawo Mochung’ne Tij Lendo e ofis maduong’ biro chiko kaka itiyo tijno. Onego olos Komiti Mochung’ne Tij Lendo e kanyakla kendo oyier owadwa mabiroga lero kaka onego otim tijni. Onego ochan mondo alwora milendoe obed gi ute chakre 150 nyaka 200. Chokruok mar Tijwa onego otim chieng’ Tich Ang’wen godhiambo mondo omi owete thuolo mar wuoyo kanyachiel e wi gik ma ne gineno e tij lendo kendo chiwo ripot.

Herman Philbrick wacho kama: “Bang’ dok e miechwa, ne wachako kampen mar manyo joma ne nyalo timo chenro mondo giyudga gasedno dwe ka dwe.” Kamoro amora ma ne gidhiye ne giyudo joma ne dwaro timo kamano. Beulah Covey wacho niya: “Bang’ lweny kod chandruok mang’eny, chal kama ng’ato ka ng’ato ne gombo bedo gi ngima maber e bwo loch Mesia.” Arthur Claus bende nondiko niya: “Kanyakla mangima nowuoro ahinya kaka ji mathoth noyie timo chenro mondo giyud gasedno.” E dweche ariyo bang’ gasedno wuok, chiegni kopi nus milion mag The Golden Age ne omi ji, to ne ochak or gasedno ne ji 50,000 dwe ka dwe.

Sula ma ne yudore e The Watch Tower mar Julai 1 1920 ma wiye ne wacho ni “Gospel of the Kingdom,” e ma A. H. Macmillan bang’e nowuoyo kuome kowacho ni “sulani ema okwongo wuoyo e wi tij lando wach maber e piny mangima mana kaka itimo e kindegi.” Sulano ne jiwo Jokristo duto mowal mondo “gichiw neno e piny duto ni pinyruodh polo osekayo machiegni.” E kindegi, owete Kristo “ma tijno oket e lwetgi” iriwo lwedo gi jomamoko ma kwan-gi chopo milionde, ma lando wachno gi kinda sama girito ngima maber e bwo loch Mesia.