1. Ang’o momiyo wamor gi Muma?

 WAMOR ahinya ni Jehova nomiyowa Muma ma en Wachne. Nyasaye miyowa paro moko mabeyo e Muma ma nyalo konyowa nyagore gi chandruoge ma waromogo e kindegi. Bende, omiyowa geno ma jaber mar kinde mabiro. To moloyo duto, osetiyo gi Muma mondo okonywa ng’eyo kido mabeyo ma en-go. Sama waparo matut kuom kido mabeyogo, chunywa pong’ga gi ilo kod mor kendo wabedo machiegni gi Nyasachwa kaka osiepene.​—Zab. 25:14.

2. Jehova osetiyo gi yore mage mondo omi ji ong’eye?

² Jehova dwaro ni ji ong’eye. E kinde machon, notiyo gi yore mopogore opogore mondo omi ji ong’eye. Notiyo gi lek, fweny, kod malaike. (Kwan 12:6; Tich 10:3, 4) Kata kamano, be ji ne nyalo puonjore kuom lek, fweny, kata ote ma nomiyo malaike ka po ni ne ok ondikgi kamoro? Mano e momiyo Jehova notiyo gi dhano mondo ‘ondik weche duto’ ma nodwaro ni wang’e “e buk.” (Jer. 30:2) Nikech “yor Nyasaye madier en yo makare chuth,” wanyalo bedo gadier ni joma ne Nyasaye otiyogo mondo ondik Muma, nondike e yo makare kendo ma nyalo konyowa.​—Zab. 18:30.

3. Ang’o ma Jehova notimo mondo orit Muma nyaka e kindewagi? (Isaya 40:8)

³ Som Isaya 40:8. Wach Nyasaye osebedo ka tayo jotich Nyasaye kuom higni mang’eny. Ere kaka mano nyalore? Weche ma nondik e Muma nondik chon ahinya e gik ma ne nyalo kethore kendo ma ne ok nyal chopo nyaka e kindewagi. Kata kamano, Jehova noneno ni olos kopi mang’eny mag weche manie Muma. Kata obedo ni joma nokopo Muma ne gin joma orem, ne gitang’ ahinya mondo kik gigol kata medo gimoro. Jasomo moro nondiko kama e wi Ndiko mag Dho-Hibrania: “Wan gadier ni onge buk moro  amora ma nokop e yo ma kare kaka nokop Ndiko mag Dho-Hibrania.” Omiyo, kata obedo ni kinde osekalo ahinya nyaka ne tiek ndik Muma, gik ma nondikee bende ne gin gik ma kethore piyo, kendo joma nokope ne gin joma orem, pod wanyalo bedo gadier ni weche ma wasomo e Muma ni kare kendo giting’o pach Nyasaye, ma e Wuon Muma.

4. Ang’o ma wadwaro nono e sulani?

⁴ Jehova e Wuon “mich mabeyo duto gi chiwo malong’o duto.” (Jak. 1:17) Muma en achiel kuom mich mabeyoe mogik ma Jehova osemiyowa. Sama ng’ato omiyowa mich, mano nyiso kaka ong’eyowa maber kod gik ma wachando. Mano be e gima timore gi jachiw mich mar Muma. Ka wanono michno, wanyalo puonjore mathoth e wi Jehova. Wabiro fwenyo kaka Jehova ong’eyowa e yo matut kaachiel gi gik ma wachando. E sulani, wabiro nono kaka Muma konyowa ng’eyo kido moko e wi Jehova, ma gin: Riekone, yo mong’adogo bura kare, kod herane. We wakwong gi nono yo ma Muma nyisowago rieko mar Nyasaye.

5. Yo achiel ma Muma nyisogo rieko mar Nyasaye en mane?

⁵ Jehova ong’eyo ni dwarore ni riekone otawa. Mich momiyowa mar Muma opong’ gi riekogo. Rieko ma yudore e Muma konyo ahinya. Riekono nyalo loko kit ngima ji. E kinde ma ne indiko buge mokwongo mag Muma, Musa nonyiso Jo-Israel ma ne gin jo Nyasaye ni weche manie Ndiko ne “ok gin weche manono,” to ne gin weche ma ne dhi reso ‘ngimagi.’ (Rap. 32:47) Joma ne winjo weche manie Ndiko ne nyalo dak maber kendo bedo gi mor madier. (Zab. 1:2, 3) Kata obedo ni kinde malach osekalo nyaka ne ndik Wach Nyasaye, pod en gi teko mar loko ngima ji obed maber. Kuom ranyisi, e jw.org, nitie sula moko mokalo 50 ma yudore e bwo wich ma wacho ni “Muma Loko Kit Ngima Ji,” ma nigi ranyisi mopogore opogore ma nyiso kaka teko mar Muma ‘tiyo kuom joma oyie kuome.’​—1 The. 2:13.

6. Ang’o momiyo wanyalo wacho ni Muma en buk ma ok nyal pim gi buk moro amora?

⁶ Onge buk moro amora minyalo pim gi Muma. Nikech ang’o? En nikech Wuon bugno en Jehova Nyasaye ma en Nyasaye Manyalo Duto, ma nyaka nene, kendo ma riekone oloyo rieko ji duto. Nitie buge mang’eny ma ji pod somoga kata obedo ni joma nondikogi to nosetho. Kata kamano, kaka kinde medo kalo, puonj manie igi ok konyga. Puonj mag Muma to osiko kendo gikonyo kinde duto. Sama wasomo Muma kendo paro matut kuom gik ma wasomo, waneno kaka Jehova ma e Wuon Muma tiyo gi rohone maler mondo okonyowa tiyo gi puonj mag Muma e ngimawa. (Zab. 119:27; Mal. 3:16; Hib. 4:12) Kuom adier, Jehova Nyasaye mangima ma e Wuon Muma gombo ahinya konyowa. Ng’eyo wachno jiwowa mondo wasom Muma pile ka pile!

7. Ere kaka Muma nomiyo jo Nyasaye obedo gi winjruok e kinde machon?

⁷ Yo moro machielo maduong’ ma Muma nyisogo rieko mar Nyasaye en kaka omiyo jo Nyasaye bedo gi winjruok e kindgi. Ka ne Jo-Israel ochopo e Piny Manosingi, ne gidak kuonde mopogore opogore e pinyno. Jomoko nobedo jolupo, jopith, kata jopur. Jo-Israel ma nodak kamoro achiel ne nyalo chako jwang’o Jo-Israel wetegi ma ne ni mabor kodgi. Kata  kamano, Jehova nochiko Jo-Israel duto ni girom kinde ka kinde mondo giwinj kisomonegi Wachne kendo kileronegi weche manie iye. (Rap. 31:10-13; Neh. 8:2, 8, 18) Temie paro kaka Ja-Israel ne nyalo winjo kochopo Jerusalem kendo neno Jo-Israel wetene tara gi tara! Kuom timo kamano, Jehova nokonyo joge mondo gisik ka gin gi winjruok maber e kindgi. Bang’e ka nochak kanyakla mag Jokristo, kanyaklago noting’o chwo kod mon ma ne wacho dhok mopogore opogore, ma ne a e anyuola mopogore opogore, kendo ma nopon e yore mopogore opogore. To nikech ne gihero Wach Nyasaye, mano nomiyo gilamo Nyasaye ka gin gi winjruok. Joma nobedo Jokristo madier ne nyalo winjo tiend Wach Nyasaye ka Jokristo wetegi leronegi sama gigoyo mbaka kata sama gin e chokruok.​—Tich 2:42; 8:30, 31.

8. Ere kaka Muma osekonyo jotich Jehova mondo gibed gi winjruok e kindegi?

⁸ Jehova ma en Nyasachwa mariek pod dhi nyime tiyo gi Muma e puonjo joge kendo konyogi mondo gibed gi winjruok. Muma en chiemb chuny ma wamor ahinya bedogo e kindegi. Wadhiga e chokruogewa mag kanyakla, mag alwora, kod mag ndalo adek mondo wawinj kisomonwa Wach Nyasaye kendo kileronwago. Kuom mano, Muma konyo e chopo dwach Jehova ma en ni jotichne ‘otine ka gin gi winjruok e kindgi.’​—Zef. 3:9.

9. En kido mane ma dwarore ahinya ni wabedgo mondo wawinj tiend weche manie Muma? (Luka 10:21)

 ⁹ Wane ane yo machielo ma Muma nyisogo rieko mar Jehova. Thoth weche manie Muma nondik e yo ma joma obolore kende e ma nyalo winjo tiendgi. (Som Luka 10:21.) Ji modak kuonde mopogore opogore e piny ngima nyalo somo Muma. Mana kaka jasomo moro nowacho, “Muma e buk ma ji mang’eny osesomo adimba e piny mangima moloyo buk moro amora.” Kata kamano, joma obolore kende e ma nyalo winjo tiend puonj manie Muma kendo tiyo gi puonjgo.​—2 Kor. 3:15, 16.

10. En yo mane machielo ma Muma nyisogo rieko mar Jehova?

¹⁰ Nitie yo moro machielo bende ma Muma nyisowago rieko mar Jehova. Jehova ok ti gi Muma mondo opuonjwa mana kaka kanyakla, to otiyo kode mondo opuonj ng’ato ka ng’ato kuomwa kendo ohowa. Waduto wanyalo neno kaka Jehova dewowa sama wasomo Muma. (Isa. 30:21) Sama in gi chandruok moro, en nyadidi misesomoga ndiko moro e Muma ma muli achiel kachiel? To e ma pod gima iwuoro en ni Muma nyalo mulo chuny ji tara gi tara! Kata obedo ni Muma nondik chon, ang’o momiyo pod en gi weche ma mulo ngimani achiel kachiel? Mano nyalore nikech Jehova Nyasaye ma e Wuon Muma riek moloyo ji duto.​—2 Tim. 3:16, 17.

11. Ere kaka dhok ma notigo kindiko Muma nyiso ni Nyasaye ok buon ng’ato ang’ata?

¹¹ Kido machielo ma Jehova nigo en ni ong’ado bura kare. (Rap. 32:4) Jehova en Nyasaye ma ng’ado bura kare nikech ok obuon ng’ato ang’ata. (Tich 10:34, 35; Rumi 2:11) Nikech Nyasaye ok buon ji, mano e momiyo noyie mondo ondik Muma kitiyo gi dhok mopogore opogore. Buge 39 mokwongo mag Muma nondik e Dho-Hibrania, ma en dhok ma jotich Nyasaye ne winjo maber e kindego. Kata kamano, e kinde Jokristo mokwongo, Dho-Grik e dhok ma ne ihinyo tigo, omiyo, buge 27 mogik mag Muma nondik e dhokno. Jehova ne ok oyiero tiyo gi dhok achiel kende e ndiko Muma. E kindegi, chiegni ji bilion aboro manie piny ngima wacho dhok mopogore opogore. Ere kaka ji mathoth kamano kendo ma wacho dhok mopogore opogore, ne nyalo puonjore e wi Jehova?

12. Yo achiel ma weche ma yudore e Daniel 12:4 osechopogo e kinde mag gikogi en mane?

¹² Kokalo kuom janabi Daniel, Jehova nosingo ni e kinde giko, “rieko madier” ma yudore e Muma ne dhi bedo “mogundho.” Ji mang’eny ne dhi winjo tiend adierago. (Som Daniel 12:4.) Achiel kuom yore ma rieko madier osebedogo mogundho en kokalo kuom tij loko Muma e dhok mamoko kod buge ma lero Muma, goyogi, kendo pogogi ne ji. Muma e buk moselok e dhok mang’eny moloyo buk moro amora, kendo en e buk mosepog ne ji mathoth moloyo e piny mangima. Muma migoyo gi kembe mag johala iuso e nengo ma malo ahinya. Jotich Jehova to oseloko Muma oduto kata buge moko mag Muma e dhok mokalo 240, kendo ng’ato ang’ata nyalo yude ma onge chudo. Mano osemiyo ji duto ma ae ogendni mopogore opogore owinjo “wach maber mar Pinyruoth” ka giko pok ochopo. (Mat. 24:14) Nyasachwa ma ng’ado bura  kare dwaro ni ji mang’eny kaka nyalore osom Wachne mondo ging’eye. Otimo kamano nikech oherowa waduto.

13. Ang’o momiyo wanyalo wacho ni Muma nyiso hera mar Jehova? (Johana 21:25)

¹³ Muma nyisowa kido maduong’ ma Jehova nigo, ma en hera. (1 Joh. 4:8) Ne ane weche ma ne Jehova ong’ado ni ondiki kod ma nong’ado ni owe oko. Noneno ni ondik weche ma ne nyalo konyowa bedo gi winjruok maber kode, ma nyalo konyowa dak e ngima mopong’ gi mor madier, kendo ma nyalo miyowa ngima ma nyaka chieng’. To nikech Jehova oherowa, ne ok oketo weche mang’eny e Muma ma ok wanyal winjo tiendgi.​—Som Johana 21:25.

14. En yo mane machielo ma Muma nyisogo hera mar Nyasaye?

¹⁴ Jehova osenyiso bende ni oherowa kuom wuoyo kodwa e Muma e yo ma miyowa luor. Ok oketo chike mang’eny matindo tindo ma chiko gimoro amora e ngimawa. Kar mano, otiyo gi ranyisi mag jotichne, weche ma nokor, kaachiel gi paro mabeyo mochiwonwa mondo okonywa timo yiero mabeyo. Yorego miyo Wach Nyasaye konyowa hero Jehova koa e chunywa kendo winje.

15. (a) Ere kaka Jehova osenyiso ni odewo joma somo Wachne? (b) Mana kaka onyis e picha, gin jotich Jehova mage ma nyako matin, owadwa ma hike nie diere, kod nyaminwa ma hike oniang’ paro matut kuomgi? (Cha. 39:1, 10-12; 2 Ru. 5:1-3; Luka 2:25-38)

¹⁵ Muma konyowa ng’eyo ni Jehova dewowa ahinya. E yo mane? Muma nigi  ranyisi mang’eny ma nyiso kaka dhano winjoga e chunye. Wanyalo winjo e chunywa kaka joma iwuoyoe e Muma nowinjo e chunygi nikech ne gin “mana dhano kaka wan.” (Jak. 5:17) Maduong’ie moloyo, sama wasomo kaka Jehova nokecho joma ne gin mana dhano kaka wan kendo guedhogi, mano konyowa ng’eyo ni “Jehova ogundho gi hera matut kendo okecho ji.”​—Jak. 5:11.

16. Ang’o ma wapuonjore e wi Jehova sama wasomo e Muma kaka noweyo ne jomoko kethogi? (Isaya 55:7)

¹⁶ Muma konyowa ng’eyo hera mar Jehova e yo moro machielo. Muma nyisowa ni Jehova Nyasachwa ok bi jwang’owa sama watimo richo. Jo-Israel noketho ne Jehova nyading’eny, kata kamano, ka ne giloko chunygi gadier, nong’wononegi. (Som Isaya 55:7.) Jokristo mokwongo bende nong’eyo ni Jehova noherogi ahinya. Ka ne Jakristo moro ma nosebedo ka timo richo moro maduong’ oloko chunye, Jehova notayo jaote Paulo gi roho maler mondo onyis Jokristo wetene ni ‘giwene kethone e yo mang’won kendo gihoye.’ (2 Kor. 2:6, 7; 1 Kor. 5:1-5) Donge en gima jiwowa ng’eyo ni Jehova ne ok ojwang’o jotichne mana nikech ne gikethone, to kar mano, norieyogi kendo nokonyogi mondo giduog ire? Mano be e gima Jehova singo ni obiro timo ne joma oloko chunygi gadier e kindegi.​—Jak. 4:8-10.

17. Ang’o momiyo Muma en mich maber ahinya?

¹⁷ Jehova osemiyowa mich ma jaber ahinya. Ang’o momiyo Muma en mich maber ahinya? Mana kaka waseneno, Muma nyisowa rieko mar Nyasaye, kaka ong’ado bura kare, kendo onyisowa herane. Bugno miyo wabedo gadier ni Jehova dwaro ni wang’eye. Odwaro ni wabed osiepene.

18. Ere kaka wanyalo nyiso ni wamor gi Muma ma en ‘mich maber’ ma Jehova osemiyowa?

¹⁸ Onego wakaw mapek ‘mich maber’ mar Wach Nyasaye. (Jak. 1:17) Omiyo, wadhiuru nyime nyiso ni wamor gi michno. Wanyalo timo kamano kuom somo weche manie iye kendo paro matut kuomgi. Ka watimo kamano, to wanyalo bedo gadier ni Jehova ma e Wuon Muma biro guedho kindawa, kendo wabiro yudo “rieko ming’eyogo Nyasaye.”​—Nge. 2:5.