YOMARA kod owetene moko ariyo miluongo ni Marcelo kod Hiver odak e gweng’ moro matin e piny Guatemala. Yomara nochako puonjore Muma gi Joneno mag Jehova kae to bang’e owetenego bende nochako puonjore Muma. Kata kamano, ne gin gi chandruok moro. Giduto ne gin muofni, kendo ne ok ginyal somo braille. Omiyo, japuonjgi mar Muma e ma ne jasomonegi buk ma ne gipuonjore kod ndiko mag Muma sama ne gin e puonjruok.

Ne gin gi pek moro machielo. Ne ok ginyal dhi e chokruok ma ne itimo e Od Romo ka gin kendgi nikech mondo gichop e Od Romono kiwuok kama ne gidakie, ne kawo dakika 40. Kata kamano, owete ma ne nie kanyaklano nochano mondo gitergi e chokruoge duto. Ka ne gichako timo migepe e chokruok ma kor juma, owete nochano mondo okonygi mako gi wigi weche ma ne ginyalo tiyogo sama ne gitimo migepegi.

Ka nochopo Mei 2019, nochak tim chokruoge mag kanyakla e gweng’gi. Chop kindeno, ne nitie owadwa moro gi jaode ma ne gin jopainia mapile ma nosedar modhi e gweng’gino. Ne gichano mondo gipuonj Yomara kod owetenego ndiko braille kendo some kata obedo ni gin giwegi ne gikia somo braille kata ndike. Omiyo, ne gidhi e laibrari moro mondo gimany buge ma ne nyalo konyogi ng’eyo kaka ne ginyalo puonjo jomamoko somo braille kendo ndike.

Bang’ dweche moko matin, Yomara kod owetene koro ne nyalo somo braille e yo mayot, kendo mano nokonyogi timo dongruok e weche Nyasaye. a Sani Yomara, Marcelo, kod Hiver gin jopainia mapile. Marcelo en jakony-tich e kanyakla. Gidichga ahinya e tij Nyasaye juma ka juma. Kindagi jiwo jolendo mamoko ahinya, kendo jolendogo be dwaro timo mathoth e tij Jehova.

Yomara gi owetene mor ahinya gi kaka jo kanyakla osekonyogi. Yomara wacho kama: “Chakre ne wang’ere gi Joneno mag Jehova, gisenyisowa hera madier mar Jokristo.” Marcelo medo kama: “Wan gi osiepe mabeyo ahinya e kanyaklawa, kendo wan e riwruok mar owete gi nyimine e piny ngima moherore gadier.” Yomara gi owetene gombo ahinya neno kinde mibiro lok pinyni obed paradiso.​—Zab. 37:10, 11; Isa. 35:5.