DAUDI e ma nowacho wechego ka nopwoyo dhako moro ma noromogo. Dhakono ne iluongo ni Abigail. Ang’o momiyo Daudi nopwoye, to wanyalo yudo puonj mane kuom nono ranyisi ma dhakono noketo?

Daudi ne oromo kode e kinde ma ne oringo Ruoth Saulo. Abigail ne en chi Nabal. Nabal ne en jamoko ma ne nigi jamni mang’eny kendo nokwayoga jambego e gode man yo milambo e piny Juda. Daudi kod chwo ma ne ni kode ‘nobedo rageng’’ ne jamni mag Nabal. Bang’e, Daudi nooro joote ir Nabal kokwaye mondo okonye gi chiemo matin. (1 Sa. 25:8, 15, 16) Mano ne ok en kwayo matek kopim gi kaka Daudi gi joge nokonyo Nabal.

Kata kamano, Nabal ma tiend nyinge en ng’at mofuwo notimo mana kaka luwore gi nyingeno. Nodwoko joote mag Daudi e yo mager mochwe oyanyogi. Omiyo, Daudi nowuok mar dhi monjo Nabal nikech fupe. Nabal kod joode duto ne dhi hinyore.—1 Sa. 25:2-13, 21, 22.

Ka ne Abigail ofwenyo hinyruok ma ne dhi yudogi nikech gima chwore notimo, nochoko chir ma odhi ir Daudi. Nowuoyo gi Daudi ka ohombe mondo kik otim gima ne dhi ketho winjruokne gi Jehova. E wi mano, nomiyo Daudi kod joge chiemo mang’eny nikech nong’eyo ni Daudi e ma ne dhi bedo ruoth. Daudi ne oyie ni Jehova notiyo gi Abigail mondo ogeng’e kik otim gima ne dhi kelone buch remo. Daudi nowacho ne Abigail niya: “Ogwedh riekoni, kendo ogwedhi in bende, nikech isegeng’a kawuono ni kik aketh remo.”—1 Sa. 25:18, 19, 23-35.

Nenore maler ni ok onego wabed kaka Nabal ma ne ok ogo erokamano kuom gima ber ma notimne. E wi mano, sama wafwenyo ni gimoro marach nyalo timore, onego wakaw okang’ mapiyo mondo walos weche ka pok gino otimore. Wan bende wanyalo wacho kaka jandik zaburi moro ma nowacho ne Nyasaye niya: “Puonja ng’ado weche maber, miya ng’eyo bende.”—Zab. 119:66.

Jomamoko nyalo neno rieko ma wan-go kaluwore gi gik ma watimo. Bed ni ginyisowa kata ooyo, ginyalo bedo gi paro ma Daudi ne nigo ka nowacho niya: “Ogwedh riekoni.”