Nyasaye nosingo ne janabi Ibrahim ni achiel kuom nyikwaye ne dhi kelo gueth ne “ogendni duto mag piny.” (Chakruok 22:18) Nyakwareno ne dhi bedo ng’a?

Chiegni higni 2,000 mokalo, Nyasaye nomiyo Yesu ma en nyakwar Ibrahim teko mar timo honni madongo. Honnigo nonyiso ni gima Nyasaye nosingo ne Ibrahim ne dhi timore ne ogendni kokalo kuom Yesu.​—Jo-Galatia 3:14.

Honni ma Yesu notimogo nonyiso ni en e ma Nyasaye noyiere mondo oguedh ogendni, kendo ne ginyiso kaka Nyasaye biro tiyo kode e kelo ne dhano gueth mochwere. Ne ane kaka honni ma Yesu notimo nonyiso kido mabeyo ma en-go.

Bedo mang’won​—Yesu nochango jotuo.

Nitie chieng’ ma jadhoho moro nokwayo Yesu mondo ochange. Yesu nomule monyise ni nodwaro change. Gikanyono, dhoho noa kuome.​—Mariko 1:40-42.

Jachiwo​—Yesu nopidho ji.

Yesu ne ok dwar gonyo ji kech. Nyadiriyo kama, nopidho ji alufe gi alufe e yor hono mana gi makate manok kod rech manok. (Mathayo 14:17-21; 15:32-38) Bang’ chiemo ma giyieng’, pod chiemo nodong’ modhuro.

Kecho ji​—Yesu nochiero jomotho.

Yesu ‘ne okecho’ chi liel moro ma wuode achiel kende notho mi odong’ ma onge ng’ama ne nyalo rite. Omiyo, nochiero wuodeno.​—Luka 7:12-15.