Be Bedo Ng’ama Ber Biro Miyo Idag Maber e Kinde Mabiro?
Kuom higni mang’eny, ji mathoth oseparo ni bedo ng’ama ber nyalo miyo gidag maber e kinde mabiro. Kuom ranyisi, ji mathoth modak e pinje mag Asia oyie gi weche moko ma ja histori moro miluongo ni Confucius ma nodak e kind higni mag 551-479 K.K.P. nowacho. Nowacho kama: “Gima ok diher ni otimni, in bende kik itim ne ng’ato.” *
YIERO MA JI MANG’ENY TIMOGA
Ji mang’eny pod paroga ni ka gibedo joma beyo, to gibiro dak maber. Gitemoga matek mondo gimi jomamoko luor, gibed joma beyo, kendo gikony jomamoko kuonde ma gidakie. Miyo moro miluongo ni Linh ma a Vietnam wacho kama: “Naparoga ni ka abedo jaratiro kendo awacho adier, nadhi yudo gueth mang’eny.”
Jomoko be timoga gik mabeyo nikech dindegi chwalogiga mondo gitim kamano. Dichwo moro miluongo ni Hsu-Yun modak Taiwan wacho kama: “Nopuonja ni timbe ma ng’ato nigo ka pod ongima e ma biro miyo bang’ ka osetho, oyud gueth mochwere kata wang’e e mach.”
BE BEDO NG’AMA BER OSEKELO NE JI BER?
En adier ni ka watimo ne jomamoko gik mabeyo to wayudoga ber mathoth. Kata kamano, thoth joma timoga gik mabeyo ne jomamoko, weche ok dhinegiga maber kaka ne giparo. Miyo moro miluongo ni Shiu Ping modak Hong Kong wacho kama: “An awuon nafwenyo ni joma timoga matek mondo gitim gik mabeyo, ok timnegiga gik mabeyo. Natemo matek mondo arit jooda kendo atimnegi gik mabeyo. Kata kamano, kendna nokethore kendo chwora nojwang’owa gi wuoda.”
Ji mathoth oseneno ni din pok omiyo ji obedo gi ngima maber. Miyo moro miluongo ni Etsuko modak Japan wacho kama: “Nadonjo e din moro kendo nabedo jatelo mar rowere manie kanisano. Dhoga nomoko ka nafwenyo kaka jo kanisano ne nigi timbe maricho, ne gilaro telo, kendo ne ok gin joratiro e weche mag pesa.”
“Natemo matek mondo arit jooda kendo atimnegi gik mabeyo. Kata kamano, kendna nokethore kendo chwora nojwang’owa gi wuoda.”—SHIU PING, HONG KONG
Nitie joma osechiwore ne weche mag din, kata kamano, chunygi osenyosore nikech gik ma ne gitimo ka giparo ni nyalo miyo giyud gueth, pok omiyogi gueth moro amora. Kamano e kaka miyo moro miluongo ni Van, ma a Vietnam nowinjo. Owacho kama: “Pile ka pile, nang’iewoga olembe, maua, kod chiemo kae to aketogi e wi liete mag kwerena ma nosetho ka aparo ni mano ne nyalo miyo abed gi ngima maber e kinde mabiro. Kata obedo ni natemo timo gik mabeyo kendo makora gi weche mag din, pod tuo moro marach nogoyo jaoda. Nyara bende notho ka pod otin e kinde ma nosomo loka.”
Ka bedo ng’at maber ok nyis ni ng’ato biro dak maber e kinde mabiro, to kare ang’o ma nyalo miyo wadag maber e kinde mabiro? Mondo wayud dwoko mar penjono, dwarore ni wayud gimoro minyalo gen ma nyalo tayowa kodwoko penjo ma wan-go kendo konyowa ng’eyo kaka wanyalo dak maber e kinde mabiro. En ang’o ma nyalo tayowa maber kamano?
^ par. 2 Mondo iyud weche momedore e wi puonj mar Confucius, ne paragraf mar 31-35, e sula mar 7 e bug Jitihada ya Ainabinadamu ya Kutafuta Mungu mogo gi Joneno mag Jehova. Oyudore bende e websaitwa mar www.ps8318.com/sw.
Samoro Inyalo Hero Magi Bende
NENURU!
Gimomiyo Dwarore ni Gibed gi Timbe Mabeyo
Kipuonjo nyithindi timbe mabeyo, mano biro konyogi ka gisebedo joma dongo.
OHINGA MAR JARITO
Gik Maricho Timore ne Joma Beyo—Ang’o Momiyo?
Muma fwenyonwa gik moko adek madongo ma kelo ne dhano chandruok.
