DOREEN nobuok ahinya ka ne laktar onyisogi ni jaode ma jahigni 54 kende nigi tuwo moro marach e obwongone. * Nonyisgi ni jaode ne dhi mana dak kuom dweche manok kae to otho. Doreen wacho niya: “Wachno nobwoga ahinya kendo nawinjo ka anyosora kuom jumbe mogwaro. Ne chal mana ka gima gino ne otimore ne jomamoko to ok wan. Ne ok aikora kata matin.”

Gima lit en ji mang’eny bende bwokga mana kaka Doreen ne obwok sama wach ma kamano oyudogi. Tuoche ma ok thiedhre kendo ma neko mapiyo nyalo mako ng’ato ang’ata. Gima ber en ni thoth ji kawoga ting’ mar rito wedegi ma tuoche maricho kaka mago omako. Kata kamano, rito jatuo ma kamano ok en gima yot. Sama tuo ma kamano omako ng’ato e ot, jomamoko nyalo timo ang’o mondo gihoye kendo girite maber? En ang’o ma joma rito wedegi ma tuoche ma kamago omako nyalo timo mondo ginyagre gi nyosruok mar chuny ma ginyalo bedogo? Gin gik mage ma nyalo timore ne jatuono ka koro odong’ ndalo matin to otho? Mokwongo, we wanon ane gimomiyo rito joma oseng’ere ni dhi tho ok en gima yot.

Yore mag thieth ma josayans osefwenyo osemiyo ngima ng’at ma tuwo inyalo chor nyime ma ok otho piyo. Kuom higni mia achiel mokalo, dhano ne ok dag kuom higni mang’eny kata mana e pinje ma ne osedongore. Ji ne tho piyo nikech tuoche ma landore kata nikech aksident. Osiptende ne ni kuonde ma boyo kendo thoth joma ne tuore ne irito gi wedegi e dala ma chop kama ne githo.

E kindegi, dongruok ma osetim e weche thieth osemiyo lakteche kedo gi tuoche mondo gimi ji odag aming’a. Tuoche ma ne nyalo nego ji piyo e kinde machon tinde budho ka pok onego ng’ato. Kata obedo ni inyalo chwal ngima ng’ato mano ok  nyis ni koro ochango. Jotuo ma kamago tekogi dok chien kendo ok ginyal timo gik moko kendgi. Rito jotuo ma kamago nyalo bedo matek kendo nyalo kawo thuolo gi teko mang’eny.

Mano e momiyo tinde thoth ji tho e osiptal. Ji mang’eny e ndalogi ok ong’eyo kaka ng’ato tho, to bende pok gineno achiel kachiel ka ng’ato tho. Ng’eyo ni ng’at mihero dhi tho nyalo nyoso chuny ng’ato kata duoko chien kinda mar rite. Ang’o ma nyalo konyo ng’at ma rito watne ma chiegni tho?

Mana kaka waneno e ranyisi mar Doreen, ji mang’eny bwokga ahinya sama gifwenyo ni ng’atgi ma gihero nigi tuo ma dhi nege mapiyo. Kata bed ni wach ma kamano nyalo miyo ng’ato obed gi parruok, luoro, kod kuyo, ang’o ma nyalo konye mondo onyagre gi pek ma kamano? Jatich Jehova moro nolamo kowacho kama: “Puonjwa kwano ndalowa, mondo wayud chuny mariek.” (Zaburi 90:12) Kuom mano, lam gi chunyi duto mondo Jehova Nyasaye ‘opuonji kwano ndaloni’ e yo mariek mondo iti gi ndalo modong’ maber gi watni ma ihero ma koro chiegni tho.

Chanuru gik moko chon. Ka watnino pod nyalo wuoyo kendo oikore wuoyo e wi tuoneno, nyalo bedo maber ka openje ng’ama doher mondo owuo e loye ka koro ok onyal. Beduru thuolo penje ka doher mondo ochwal ngimane kitiyo gi masinde ma nyasani, otere e wod, kata kinyalo ti gi yore mamoko mag thieth e thiedhe. Mano nyalo konyo mondo kik ywaruok bedie e kind wedene sama ng’ato otimo yiero moro e lo jatuo ma oheworeno. Chano weche chon ka jatuo pok ohewore kendo e yo moyangore biro konyo wedene mondo ochiw kony e yo ma dwarore. Muma wacho niya: “Ka onge jong’ad rieko ji ok yud gi ma gidwaro.”—Ngeche 15:22.

Gima duong’ ma ng’at ma rito jatuo onego otim en hoye mondo obed gi chuny mokuwe. Ng’at ma tuo ma chiegni tho onego ong’e ni ohere kendo ok ojwang’e. Ere kaka inyalo timo kamano? Somne buk moting’o weche ma nyalo jiwe kata werne wende mohero ma nyalo hoyo chunye. Jotuo mang’eny winjoga maber sama achiel kuom joodgi ma rite omako lwete kendo owuoyo kode mamuol.

En gima ber konye mondo ong’e wendo moro amora ma obiro nene. Ripot moro wacho niya: “Kata obedo ni nyalo chopo kama ng’at ma tuono ok nyal timo gik mathoth, wach to pod onyalo winjo maler. Samoro nyalo nenore ni jatuono  nindo, kata kamano, wach to pod onyalo winjo awinja. Omiyo, kik iwach gima ok inyal nyise ka dine bed ni oneno.”

Ka nyalore, lemuru kanyachiel. Muma nyisowa ni nitie kinde moro ma jaote Paulo gi jowetene ne oromo gi chal moro matek ma ne ok gin gadier ka ne ginyalo tonyie. En kony mane ma ne gidwaro? Paulo nokwayo Jokristo wetene kama: “Un bende unyalo konyowa kuom sayonwa.” (2 Jo-Korintho 1:8-11) Lamo matut sama jatuo ohewore en gima nyalo konyo ahinya.

Paro aparo ni watni dhi tho en gima lit ahinya. Tho bwogowa ahinya. Ne ok ochuewa mondo watho omiyo ok wanyal ng’iyo gi tho. (Jo-Rumi 5:12) Mano e momiyo Wach Nyasaye luongo tho ni “jasigu.” (1 Jo-Korintho 15:26) Omiyo, paro ni wedewa ok bi tho ok en gima rach.

Kata kamano, ng’eyo ni ng’at ma tuono nyalo tho en gima konyo joot duto mondo kik gibed maluor mokalo tong’ kendo mondo giket pachgi e gik ma nyalo konyogi giduto. Gik ma samoro nyalo timore ne jatuo ka koro ochiegni tho oried e bwo wich ma wacho ni “ Gik ma Timorega Kodong’ Ndalo Matin to Ng’ato Tho.” En adier ni gik ma owachgo ok timre ne jotuo duto, to bende ok gitimre ka luwore gi kaka oriedgi e listno. Kata kamano, thoth gik ma okwan-go timorega ne jotuo mang’eny.

Bang’ ka watnino osetho, nyalo bedo maber ka iwuoyo gi osiepni ma ne oseyie motelo mar konyi. Joma ne rito jatuo kaachiel gi joodgi onego ojiw ka inyisogi ni watgi ma othono koro yueyo kendo ok osandre kamoro amora. Jachuechwa moherowa nyisowa ni “jo motho ok ging’eyo gi moro.”​—Eklesiastes 9:5.

Geno kuom kony ma Nyasaye chiwo en gima duong’ ahinya e kinde ma joot rito watgi matuo kod kinde ma gin gi kuyo nikech tho mar watgino. Nyasaye nyalo konyo joma kamago kokalo kuom jomamoko ma hoyogi kendo timonegi gik ma konyogi. Doreen wacho niya: “Ne ok atamora kony ma ng’ato ang’ata ne miya. Kiwacho adier, ji nokonyowa moloyo kaka ne waparo. An gi jaoda ne wang’eyo ma onge kiawa ni Jehova ne wachonwa ni, ‘An ka mondo akonyu e chandruok momakouni.’ Wiya ok bi wil gi gima ne anenono.”

Ee, Jehova Nyasaye e ma nyalo konyowa e chandruok duto momakowa. Nikech en e Jachuechwa, ong’eyo maber lit kod kuyo ma wabedogo. Oikore konyowa kendo jiwowa mondo wanyagre gi chandruok ma wan-go. Moloyo mano, osingo ni machiegnini obiro tieko tho chuth kendo obiro chiero jogo duto ma osetho. (Johana 5:28, 29; Fweny 21:3, 4) Gikone, waduto wabiro penjo mana kaka jaote Paulo nopenjo niya: “In tho, koro ere lochni? In tho, lit mikelo ni kanye?”​—1 Jo-Korintho 15:55, Luo New Testament, 2003.