Be Inyalo Paro?

Be gik ma isesomo e gocho mosekalo mag Ohinga mar Jarito osemori? Ne ane kabe inyalo dwoko penjo maluwogi:

• Ang’o momiyo Mesia nyaka ne tho?

Tho mar Yesu nonyiso ni dhano maonge richo nyalo rito chiwruok mare ne Nyasaye kata mana e bwo tembe mager. Bende, nochulo kar richo ma Adam nokelo ne kothe, ka mano chiwo thuolo mar yudo ngima mochwere.—12/1, ite mar 22.

• Ang’o manyalo konyo ng’ato kik ti gi kong’o e yo marach?

Lamo kod puonjruok Muma nyalo konyo. Nyago kido mar ritruok, makruok gi gima ng’ato oseng’ado mar timo, kod yiero osiepe mabeyo gin gik madwarore. Ng’ama oyiero mar madho kong’o onego oket tong’ moyangore, kopuonjore ng’eyo sama onego okwer.—1/1-SW, ite mag 7-9.

• Wuoyo gi nyithindo e yo makonyo oriwo timo ang’o?

Wuoyo gi nyithindo ok en mana goyo mbaka, to oriwo nyaka penjogi penjo kendo rito dwoko ma gichiwo. Joma thoth oseyudo ni sa chiemo miyogi thuolo maber mar wuoyo.—1/15, ite mag 18-19.

• Jehova en ng’a makare chuth, omiyo ere kaka onyalo loko chunye?

Seche moko, Nyasaye loko pache kuom ji. Kuom ranyisi, mokalo dichiel, Jo-Israel machon noweyo Jehova ma giluwo nyiseche mamoko. Kindeno, Jehova noweyo ritogi. Kata kamano, kane jogo olokore kuom richogi ma gikwayo Nyasaye kony, Nyasaye ne loko pache kuom kaka nonenogi, kata ‘chunye nolokore.’ (Bura 2:18)—2/1-SW, ite mar 21.

• Ang’o manyalo miyo obatis ng’ato mar ariyo?

Mano nyalore ka sama ne ibatiso ng’ato, noyudo ka odak e ngima moro maok kare kata timo gik moko maling’ling’ ma kapo ni dine oyudo ni osebatise, dine ogole oko mar kanyakla.—2/15, ite mar 22.

• Gin paro mage maok kare ma jomoko chiwo mondo gitim gik moko e yor mibadhi?

Jomoko paro ni onego gikwel nikech gin jodhier. Jomoko wacho ni, “Donge ji duto timo kamano.” Jomoko bende ma osekwanyo gik moko kendo kanogi ka giwacho ni, “gimiyudo ikano.” Muma ok riw parogo duto lwedo.—3/1-SW, ite mag 12-14.

• E ngech Yesu mar ngano kod ogolo, chwoyo kata pidho kodhi maber, ochung’ ne ang’o?

Yesu, ma e Wuod dhano, noiko puoth chwoyo e kinde tije mar lendo e piny. Chakre Pentekost 33 E Ndalowa ka dhi nyime, ne ochwo kodhi maber e kinde ma ne owal Jokristo kaka nyithind Nyasaye, nyithind Pinyruoth.—3/15, ite mar 20.

• Ere kaka ikano ngano mar ranyisi e dech Jehova kaluwore gi ngech Yesu? (Math. 13:30)

Wechego osebedo ka dhi nyime chopo e kinde mar ndalo mag giko. Ngano mar ranyisi, mochung’ne yawuot Pinyruoth mowal kuom roho, ikano e dech Jehova sama irwakogi e kanyakla mar Jokristo ma ne oduoki kendo, kata sama giyudo pokgi mar polo.—3/15, ite mar 22.

• Ng’ano ma noyiero buge mayudore e Ndiko mag Dho-Grik mag Jokristo?

Ne ok gin joma owuok e kanisa moro kata jatend din moro. Kar mano, Jokristo madier, ma ne itayo gi roho maler mar Nyasaye, nofwenyo gadier weche ma ne okudhi gi much Nyasaye. Mani winjore, nikech achiel kuom mich mag roho ma ne ichiwo e yor hono ne kanyakla mar Jokristo mokwongo ne en “pogo weche mokudhi.” (1 Kor. 12:4, 10, New World Translation of the Holy Scriptures)—4/1, ite mar 28.