Be Inyalo Paro?

Be isesomo adimba gocho mosekalo mag Ohinga mar Jarito? Ka en kamano, ne ane kabe inyalo dwoko penjo maluwogi:

• Gin weche mage adek madongo manyalo konyowa kwedo tem mar donjo e mibadhi?

Gin kaka: (1) Bedo gi luor mowinjore kuom Jehova Nyasaye. (1 Pet. 3:12) (2) Bedo gi chuny mosetieg gi Muma. (3) Temo matek bedo ng’at ma gik moko romo.—4/15, ite mag 6-7.

• Ere kaka wanyalo ng’eyo ni kawo tijwa ne Jehova gi pek duto mowinjore ok nyis ni wadag e ngima morid kata ni ok wanyal bedo gi kinde mag yueyo kod mor?

Wanyalo nono ranyisi mar Yesu. Ne obedo gi kinde mag mor kod yueyo kochiemo gi jomoko. Wang’eyo ni ne ok odak e ngima morid mokalo tong’. Jomamoko, kata mana nyithindo ne yudo ka yotnegi sudo ire.—4/15, ite mar 10.

• “Rawar” miwuoyoe e Ayub 33:24 (New World Translation) en ang’o, to ere kaka rawarno nokonyo Ayub?

Rawar motigo kanyo tiende en “umo.” Kuom Ayub, nyalo bedo ni rawarno ne en misango mar le, ma Nyasaye ne dhi yiego mondo oumgo ketho mar Ayub. Nenore ni Jehova norwako rawar ma ne ochiw e lo Ayub, moyie mondo rawarno oum richone kendo yawo yo mar Nyasaye change kendo gwedhe. (Ayub 1:5; 42:12-17)—7/1, ite mar 11.

• Tiend yadh zeituni miwuoyoe e Jo Rumi sula 11 en ang’o?

Yadh zeituni ochung’ne bat-matin mar koth Ibrahim, Israel mar roho. Jehova en kaka mise yadhno to Yesu ochung’ne kor yadh zeituni mar ranyisi. Kane thoth Jo-Yahudi otamore Yesu, jogo moa e Ogendini ma ne obedo Jokristo ne koro inyalo chom e yadhno, kendo mano ne dhi miyo kwan duto mar bat-matin mar koth Ibrahim ochopi.—5/15, ite mag 22-25.

• Ere kaka wanyalo ng’eyo ni Gehena ok en kar mach misandoe ji?

Paro apara mar wang’o ji ka gingima en gima Jehova osin-go ahinya. E wi mano, puonj mar sando jomotho e mach ok winjre kata matin gi kit Nyasaye ma jahera kendo mano kwedo puonj mar Muma moket maler ni jomotho ‘ok ging’eyo gimoro.’(Ekl. 9:5, 10)—7/1, ite mar 15.

• Ere kaka Jehova timo ne jogo ma “chunygi onyosore chuth” koda ‘ma chunygi otur’? (Zab. 34:18)

Mana kaka janyuol ma jahera ma mako kendo hoyo nyathi manie chandruok, Jehova chiegni gi joma lame, maywakne mondo okonygi. Oikore hoyo kendo duogo joma chunygi onyosore koda ma chunygi otur. Onyalo miyogi rieko kod teko madwarore mondo mi ginyagore gi chandruok moro amora mayudogi. (2 Kor. 4:7; Jak. 1:5)—7/1, ite mar 23.

• Jogo ma dine obedo koth Yesu dhano ma ne kare chuth, be gin bende ne inyalo ti kodgi e chiwo rawar?

Ooyo. Kata obedo ni Yesu ne nyalo nyuolo dhano makare chuth bilion mang’eny, joma kamago ne ok dhi tigo e chiwo rawar. Ngima makare chuth ma Yesu ne nigo ema ne oromre gi mar Adam. (1 Tim. 2:6, NW )—6/15, ite mar 13.

• Ere kaka Jokristo nyalo nyiso ni girwako siem michiwo e wi jopuonj mag miriambo miwuoyoe e Tich Joote 20:29, 30?

Ok girwak e utegi kata moso jopuonj mag miriambo. (Rumi 16:17; 2 Joh. 9-11) Jokristo ok som buge mag joma ong’anjo moweyo adiera, ok ging’i program maggi e televison, kata dhi e kuonde Intanet moting’o puonj maggi.—7/15, ite mag 15-16.

• Kaluwore gi weche manie Luka 10:40-42, gimaduong’ mamiyo wabedo kanyachiel gi Jokristo wetewa en ang’o?

Gimaduong’ mamiyo wabedo kanyachiel gi Jokristo wetewa, ok en ni mondo wabed gi chiemo mogundho, to en ni mondo wajiwre ng’ato gi ng’ato, ka wamiyore mich mag chuny. (Rumi 1:11, 12) Kata mana chiemo moro matin nyalo miyo romo ma wan-go obed ma gerowa maber.—7/1, ite mag 29, 30.