THOTH dinde mag miriambo maluongore ni Jokristo, oseweyo chuth tiyo gi nying Nyasaye. Kuom ranyisi, weche michakogo e Muma miluongo ni Revised Standard Version wacho ni “ok owinjore kata matin” mondo kanisa oluong Nyasaye gi nying moro amora.

² Joneno mag Jehova to mor tiyo gi nying Nyasaye kendo gimiyo nyingno duong’. (Som Zaburi 86:12; Isaiah 43:10.) E wi mano, wan joma ogwedhi ahinya kuom ng’eyo tiend nying Nyasaye kendo ng’eyo gimomiyo dwarore oket nyingno obed maler. (Math. 6:9) Mondo okonywa neno kaka en gweth maduong’ ng’eyo Jehova, weuru wanon ane penjo moko adek madongo. Tiend ng’eyo nying Nyasaye en ang’o? Jehova osenyiso nade ni owinjore mondo oluonge gi nyingno? To ere kaka wanyalo wuotho e nying Jehova?

³ Ng’eyo nying Nyasaye oriwo gik mang’eny moloyo mana ng’eyo ni iluonge ni Jehova. Ng’eyo nyingeno oriwo koda ng’eyo gik mabeyo mosetimo, kite, dwache, koda tijene kaka onyis e Muma to moloyo, kaka osebedo kotimo ne jotichne. Kaka Jehova medo chopo dwache, e kaka omedo elonwa mos mos ni en Nyasaye machalo nade. (Nge. 4:18) Jehova nohulo nyinge ne Adam gi Hawa, to mano emomiyo Hawa notiyo gi nyingno kane onyuolo Kain. (Chak. 4:1) Jotich Nyasaye machon kaka Noa, Ibrahim, Isaka, kod Jakobo nong’eyo nying Nyasaye. E wi mano, ne gimedo ng’eyo ni en Nyasaye machalo nade kane Jehova gwedhogi, ritogi kendo elonegi moko kuom gik ma nodwaro chopo. Bang’ kinde, Nyasaye noelo ne Musa  wach moro makende, motudore gi nying Nyasaye.

⁴ Som Wuok 3:10-15. Kane Musa ochopo higini 80, Nyasaye nomiye ote mapek ahinya. Nowachone ni odhi ogol “nyithind Israel oa e Misri.” Bang’ mano, Musa nopenjo Jehova penjo moro makende ahinya. Nopenje gi muolo kama: ‘Nyingi ng’a?’ Ka jotich Nyasaye noyudo oseng’eyo nyinge kuom higini mang’eny, kare ang’o momiyo Musa nopenjo penjono? Nenore maler ni ne odwaro ng’eyo mathoth ni Jehova en Nyasaye machalo nade, kendo nodwaro gima ne dhi konyo Jo-Israel ong’e ni Nyasaye ne dhi resogi gadier. Penjo ma Musa nopenjono ne ni kare nikech Jo-Israel nosebedo wasumbni kuom higini mogwaro. Nyalo bedo ni ne giparore kabe Nyasach kweregi ne nyalo resogi gadier. King’iyo maber, moko kuom Jo-Israel nosechako lamo nyiseche mag Jo-Misri.—Eze. 20:7, 8.

⁵ Jehova nodwoko nade penjo ma Musa nopenje? Nodwoke niya: “Kama e kaka iniwachi ni nyithind Israel, AN MANTIE oseora iru.” * Kae to nomedo jiwo ne Musa onyisgi ni: “Jehova, Nyasach kwereu . . . oseora iru.” Weche ma ne Nyasaye onyiso Musago, puonjowa gimoro maduong’ kuome. Onyalo bedo gimoro amora mowinjore obed kata onyalo timo gimoro amora mowinjore otim, mondo singo mage ochopi. Kendo en Nyasaye ma kinde duto chopo gima osesingo. Mano emomiyo Jehova wacho kuome owuon e kwan matindo 15 niya: “Ma e nyinga nyaka chieng’, kendo ma e raparna nyaka tienge duto.” Nyakabed ni wechego nomulo chuny Musa ahinya kendo notego yie mare!

⁶ Mapiyo bang’ oro Musa, Jehova nonyiso gadier ni ne ‘entie’ kane oreso Jo-Israel. Ne okwodo wi Jo-Misri kane ogoyogi gi masiche apar, kendo mano nonyiso ni nyiseche mag Jo-Misri moriwo nyaka Farao, ne onge teko moro amora. (Wuok 12:12) Kae to Jehova nobaro Nam Makwar, ma Jo-Israel okalo; bang’e noweyo mondo pi oum Farao gi jolweny mage. (Zab. 136:13-15) Kane gin e ‘thim maduong’ kendo malich,’ Jehova nonyiso ni en e Jarit mar ngima kane ochiwo chiemo kod pi ne joge ma  kwan-gi ne nyalo romo milion ariyo kata adek! Kendo ok noweyo mondo lepgi koda wuochegi obed moti ka gin e thim. (Rapar 1:19; 29:5) Kuom adier, onge gima nyalo tamo Jehova kik ochop singo moro amora kaluwore gima nyinge nyiso. Bang’ higini moko, nonyiso Isaiah kama: “An to, an ie Jehova; kendo onge jares moro mak mana an.”—Isa. 43:11.

⁷ Joshua ma nokawo kar Musa, bende noneno tije madongo miwuoro ma Jehova notimo e piny Misri koda e thim. Omiyo kane ochiegni tho, Joshua nonyiso Jo-Israel kama: “Ung’eyo e chunyu duto kendo e parou duto ni, gimoro ne ok orem kuom gik mabeyo duto ma ne Jehova Nyasachu owacho kuomu; duto osetimorenu, onge kata achiel kuomgi morem.” (Josh. 23:14) Kuom adier, Jehova notimo mana kaka nosesingore.

⁸ E kindegi bende, Jehova nyalo ‘bedo gimoro amora modwaro.’ Nokoro kokalo kuom wuode, ni e ndalo mag giko, wach Pinyruoth ne idhi landi “e pinje duto.” (Math. 24:14) Mana Jehova kende ema ne nyalo koro ni tich ma kama ne dhi timore, kendo ne odhi chiwo teko mar timo tijno, kotiyo gi joma thoth ma piny neno ni gin “jopoya gi jo makiya.” (Tich 4:13) Omiyo, seche ma watiyo tij lendo, wachopo wach ma ne okor e Muma. Wamiyo nying Wuonwa ma Jehova duong’ kendo nyiso ni kwayowa wuok e chunywa sama walamo ni: “Nyingi mondo obed maler. Pinyruodhi mondo obi, gi midwaro mondo otimre e piny kaka e polo.”—Math. 6:9, 10.

⁹ Mapiyo bang’ kane Jo-Israel osewuok Misri, Jehova nobedo gimachielo ne joge. Kokalo kuom singruok mar Chik, nobedonegi kaka ‘chuorgi,’ kendo ne oikore mar kawo ting’ duto ma ne otudore gi singruokno. (Yer. 3:14) Jo-Israel bende ne oyie bedone kaka chiege mar ranyisi, matiendeni joma iluongo gi nyinge. (Isa. 54:5, 6) Sama ne giluwo chikene, Jehova ne bedonegi ‘Dichwo’ makare chuth. Ne ogwedhogi, oritogi kendo omiyogi dak ma nigi kuwe. (Kwan 6:22-27) Mano ne miyo ogendini mamoko omi nying Jehova duong’. (Som Rapar mar Chik 4:5-8; Zaburi 86:7-10.) Ka kuom adier, ji mawuok e ogendini mamoko, nobiro e lamo madier. Ne chalo ka gima gin bende giwacho gima Ruth Nyar-Moab nonyiso Naomi niya: “Jogi nobed joga, kendo Nyasachi nobed Nyasacha.”—Ruth 1:16.

¹⁰ Kuom higini madirom 1,500, Jehova nonyiso ni en Nyasaye machalo nade kaluwore  gi kaka ne otimo ne Jo-Israel. Kata obedo ni Jo-Israel ne gin joma ketho chike Nyasaye kinde ka kinde, Jehova pod nonyiso ni en “Nyasaye man gi kech kod ng’wono,” kendo “ma ok tim mirima piyo.” Ne en Nyasaye mahore miwuoro kendo ma chunye ok jog piyo. (Wuok 34:5-7) Kata kamano horuok mar Jehova nochopo gikone kane oganda mar Jo-Yahudi okwedo Wuode, ma kendo ginege. (Math. 23:37, 38) Koro ogandano ne olalo thuolo majaber mar bedo joma iluongo gi nying Nyasaye. E wang’ Jehova, ne gichalo gi yien moner. (Luka 23:31) Bang’e Jo-Israel nobedo gi paro mane kuom nying Nyasaye?

¹¹ Bang’ kinde, Jo-Yahudi nochako bedo gi paro maok owinjore kuom nying Nyasaye. Ne giparo ni nying Nyasaye ler ahinya ma ng’ato ang’ata ok owinjore luongo nyingno. (Wuok 20:7) Nikech mano, mos mos, ne giweyo tiyo gi nying Nyasaye. Onge kiawa ni Jehova nowinjo malit, kane ogandano ochako chayo nyinge. (Zab. 78:40, 41) Jehova ohero nyingeno ahinya. Mano emomiyo Muma wacho ni en gi nyiego kuom nyingeno. To nikech Jo-Israel nochayo nyingno, koro ok nowinjore oluonggi gi nyingno. (Wuok 34:14) Wachni puonjowa ni onego wachiw luor matut ne nying Jachwechwa.

¹² Jehova nosingo kokalo kuom Jeremia ni ne odhi loso “singruok manyien” gi oganda manyien, matiende ni Israel mar Nyasaye. Jeremia nokoro ni kuom Israel manyienno duto, “jo matindo kod jo madongo,” ne dhi ‘ng’eyo Jehova.’ (Yer. 31:31, 33, 34) Nyasaye noloso singruok manyienno karang’o? Notimo kamano e Pentekost higa 33. To Nyasaye noloso singruokno gi ng’a? Ei Muma oganda manyienno iluongo ni “Israel mar Nyasaye,” kendo oriwo ji mowuok e ogendini duto. Jehova luongogi ni ‘oganda miluongo gi nyinga.’—Gal. 6:16; som Tich Joote 15:14-17; Mat. 21:43.

¹³ Ka gin ‘oganda miluongo gi nyinge,’ jokanyo mag Israel mar Nyasaye notiyo gi nyingno, sama gisomo ndiko mag dho-Hibrania. * Omiyo, kane jaote Petro twak gi oganda maduong’ mar Jo-Yahudi kod joma ne ok gin Jo-Yahudi to ne oyie kuom Nyasaye, notiyo gi nying Nyasaye nyadinwoya. (Tich 2:14, 20, 21, 25, 34) Jokristo mokwongo nomiyo nying Jehova duong’, omiyo nogwedho kinda ma ne gitimo e tij lendo. E kindewagi bende, Jehova gwedho tijwa mar lendo sama walando nyinge, kendo siemo ne ji nyingno e Muma maggi giwegi kanyalore. Kuom timo kamano, wakonyogi ng’eyo Nyasaye madier. Donge mano en migawo majaber! Mano nyalo konyo joma dwaro ng’eyo Nyasaye, ochak mako osiep gi Jehova, osiep mabiro bedo motegno kendo masiko nyakachieng’.

¹⁴ Bang’ ndalo kane joote osetho, jomoko ei kanyakla mar Jokristo, nochako ketho kanyakla gi puonj mag miriambo. (2 Thes. 2:3-7) Jopuonj mag miriambogi bende norwako paro mag Jo-Yahudi mar tamruok tiyo gi nying Nyasaye. Kata kamano, be Jehova ne dhi weyo mondo nyinge olal chuth? Ooyo ngang’! En adier ni ok wanyal ng’eyo kaka ne iluongo nyingno  chon, kata kamano nyingno pod nitie nyaka chil kawuono. Kuom higini miche gi miche, nying Nyasaye osebedo ka yudore e loko mang’eny mag Muma, koda e buge mamoko mag josomo ma nono Muma e yo matut. Kuom ranyisi, e higa mar 1757, Charles Peters nondiko ni “Jehova,” ma en nying Nyasaye ema “lero e yo makare chuth ni en Nyasaye machalo nade” moloyo nyinge moko mag telo ma ji osebedo kaluongego. E buk moro ma ne ogo e higa 1797, ma ne wuoyo e wi wach lamo Nyasaye, Hopton Haynes nondiko sula mar 7 kochako gi wechegi: “JEHOVA e nying NYASAYE ma oganda Jo-Yahudi ne lamo kende, kendo en e Nyasaye ma Kristo kod Jootene bende ne lamo.” Jal miluongo ni Henry Grew (1781-1862) notiyo gi nying Nyasaye, to e wi mano, nofwenyo ni nyingno ne owinjore oket obed maler nikech achaya ma noyudo oseket kuome. Kamano bende, jal miluongo ni George Storrs (1796-1879), ma ne en osiep Charles T. Russell, notiyo gi nying Nyasaye mana kaka Russell owuon ne tiyogo.

¹⁵ Higa mar 1931 ne en higa makende ahinya nikech e higano oganda Nyasaye nochako tiyo gi nying mar Joneno mag Jehova, ma en nying mawuok e Ndiko, mopogore gi kaka ne iluongogi chon ni Jopuonjre mag Muma. (Isa. 43:10-12) Ne ginyiso maler e piny ngima ni gimor bedo oganda ‘Jehova owuon,’ ka gipako nyinge. (Tich 15:14) Neno kaka Jehova oserito nyinge paronwa wechene mayudore e Malaki 1:11, mawacho kama: “Nyaka a kor wuok chieng’ nyaka chopi kor podhone nyinga oyudo duong’ e kind Ogendini.”

¹⁶ Janabi Mika nondiko niya: “Kendo ogendini duto nowuothi ng’ato ka ng’ato koluoro nying nyasache, to wan wanawuothi kwaluoro nying Jehova Nyasachwa ndalo duto nyaka chieng’.” (Mika 4:5) Luongo Jopuonjre mag Muma gi nying Jehova e kindeno, ne en gima ber miwuoro. Mano nomiyo Jopuonjrego obedo gadier ni Jehova ne oyie kodgi. (Som Malaki 3:16-18.) To nade in iwuon? Be itimo kinda mondo ‘iwuoth kiluoro nying Jehova’?

¹⁷ Mondo wawuoth ka waluoro nying Jehova, nyaka watim gik moko adek maluwogi. Mokwongo, nyaka walandne jomoko nyingno, ka wang’eyo maler ni mana ‘ng’ato ka ng’ato maluongo nying Jehova ema noresi.’ (Rumi 10:13) Mar ariyo, nyaka wanyag kido ma Jehova nigo, to ahinya wuon kido mar hera. To mar adek, wanyiso ni wawuotho ka wamiyo nying Jehova luor, ka waikore luwo chikene gi chunywa duto, kendo kik wami oyany nying Nyasaye maler. (1 Joh. 4:8; 5:3) Be ing’ado mar ‘wuotho kiluoro nying Jehova Nyasachwa nyaka chieng’’?

¹⁸ E kinde mokayo machiegni, jogo duto matamore luwo chike Nyasaye kata joma ng’anyo ne Jehova, biro chunogi ng’eyo ni en e Nyasaye madier. (Eze. 38:23) Mano oriwo jogo machalo gi Farao ma nowacho ka ng’ayo wach kama: “Jehova to ng’a, ma dawinj dwonde? ” Mapiyo nono ne ochuno Farao mondo ong’e ni Jehova e Nyasaye manyalo duto! (Wuok 5:1, 2; 9:16; 12:29) Wan to wayiero mar ng’eyo Jehova kendo bedo osiepene. Wamor ahinya rito chikene kendo bedo joma iluongo gi nyinge. Omiyo, wageno ahinya kindego ma weche mondiki e Zaburi 9:10 nochopi: ‘Kendo jogo mong’eyo nyingi ginigeni; nimar, in Jehova, ok isejwang’o jogo madwari.’