Angela, * en nyaminwa ma jahigni 30 gi wiye. Owinjo koluor matin nikech jodong-kanyakla biro lime. Oparore niya, ‘Ang’o ma jodongogo diher wachona? Ang’eyo ni asebara e chokruoge moko nikech atiyo odiechieng’ mangima e kama iritoe joma oti ma ka adok pacho, to aol mokalo.’ E wi mano, chuny Angela chandore nikech min mare bende tuwore.

Kapo ni in achiel kuom jodongo monego olim Angela, inyalo timo ang’o mondo ijiw Angela ma “chunye ool”? (Yer. 31:25) Mokwongo, gin ikruok mage minyalo timo mondo itim limbe mabiro jiwe?

Waduto seche moko wajobedo mool nikech tije ma watiyo kata nikech migepe ma wan-go e kanyakla. Kuom ranyisi, janabi Daniel nowinjo ka ‘chunye ool’ kane oyudo fweny ma ok nonyal winjo tiende. (Dan. 8:27, The Bible in Luo, 1976) Ang’o ma nokonye? Nyasaye nooro malaika Gabriel mondo olerne tiend fwenyno kendo onyise ni Jehova nowinjo lamone. Malaikano bende nonyise ni ne en “ng’a moher ahinya.” (Dan. 9:21-23) Bang’ ndalo, malaika machielo nojiwo Daniel gi weche moyier maber kaka mago.—Dan. 10:19.

Kamano bende, kapok ilimo Jakristo ma chunye ool kata ma chunye onyosore, kaw kinde ipar matut chal mare. Gin chandruoge mage monyagorego? Chandruogegi nyalo bedo ni nyoso chunye e okang’ maromo nade? Gin kido mage mabeyo ma en-go? Richard, mosebedo jaduong’-kanyakla kuom higni mokalo 20 wacho kama:  “Ajaketo pacha ahinya kuom kido mabeyo mag owetena.” Omedo wacho niya: “Kuom nono chal mar owete gi nyiminena kapok alimogi miyo ang’eyo kaka anyalo jiwogi kaluwore gi dwaro maggi.” Kapo ni jaduong’ machielo biro dhi kodi e limbeno, donge ber mondo unon kanyachiel chal mar owadu kata nyaminu kapok ulime?

Ok en gima yot mondo owadwa kata nyaminwa owuo gi jaduong’ ka en thuolo e wi gik machande. Kuom ranyisi: Owadwa kata nyaminwa nyalo yudo ka tekne yawo chunye ne jodongo molime. Ka en kamano, inyalo konye nade mondo oyaw chunye? Nyalo bedo maber kibwonjo kode kendo wacho weche moko manyiso ni idewe mana seche ma idonjeno. Michael, mosebedo jaduong’-kanyakla kuom higni mokalo 40 jachako mbaka kowacho niya sama otimo limbe: “Achiel kuom migepe mabeyo ma jaduong’-kanyakla nigo en limo owete gi nyimine e miechgi mondo gimed ng’ere maber. Omiyo asebedo ka agombo ahinya mondo abi alimi.”

Kihero, inyalo chako limbeni gi lemo. E lamonino, inyalo mulo kido mabeyo ma owadwa kata nyaminwano nigo kaka yie mare, hera, kata mana sinani ma en-go. Mano e gima jaote Paulo notimo kane olemo ne owetene. (1 Thes. 1:2, 3) Ka ulemo kanyachiel gi jal ma ulimono e yo machalo kamano, mano miyo pachu ikore e yo makare ne limbeno. Kuom timo kamano, ubiro bedo gi mbaka magerou. Lamonino bende nyalo hoyo chuny owadwa kata nyaminwano. Ray, ma en jaduong’ molony wacho kama: “Seche moko waduto wiwa jowil neno gik mabeyo ma watimo e tij Nyasaye. Omiyo sama ng’ato oparonwa gik mabeyogo, mano duogo chunywa.”

Mana kaka Paulo, in bende inyalo chiwo “mich moro mar chuny” kuom nono kanyachiel Ndiko moro kata ka en mana achiel. (Rumi 1:11) Kuom ranyisi, owadwa ma  chunye onyosore nyalo neno ni en ng’at manono ahinya mana kaka jandik-zaburi ma ne winjo e chunye ni onyosore mana ka “pien mikanoe divai molier e yiro.” (Zab. 119:83, 176) Bang’ lero tiend ndikono e yo machuok, inyalo wacho kaka imor kendo in gadier ni owadwano wiye pok “owil” gi chike Nyasaye.

Ere kaka inyalo tiyo gi Muma mondo ijiwgo nyaminwa modok chien moweyo tij lendo kata ma kinda mare osedok chien e tiyo ne Nyasaye? Samoro, ngero ma Yesu nogoyo mar fedha achiel molal nyalo jiwe. (Luka 15:8-10) Fedhano ne nyalo bedo achiel kuom fedha mathoth ma ne olosgo tigo. Ka uwuoyo e wi ngerono, mano nyalo konye neno kaka kanyakla mar Jokristo ogene ahinya. Bang’ wuoyo e wi ngerono, inyalo nyise kaka Jehova dewe ahinya nikech en achiel kuom rombene matindo.

Owete gi nyiminewa ohero ahinya wuoyo e wi ndiko ma gisesomo e Muma. Kuom mano, kik ibed ni in ema iwuoyo moloye! Bang’ somo ndiko moro motudore gi chandruok ma owadwa kata nyaminwa nigo, inyalo yiero wach moro mamule kae to ikwaye mondo uwuoye. Kuom ranyisi, bang’ somo 2 Jo Korintho 4:16, jaduong’ nyalo penjo kama, “Be in iwuon iseneno yore ma Jehova miyigo teko?” Penjo machalo kamano nyalo miyo ‘ujiwru e yieu.’—Rumi 1:12.

Inyalo duogo chuny Jakristo wadu kuom wuoyo bende e wi sigand ng’at moro mayudore e Muma ma Jakristono bende ong’eyo. Ng’at ma chunye onyosore nyalo chalo gi Hanna kata Epafrodito ma kinde moko chunygi ne ool, to kata kamano Nyasaye ne pod ogenogi ahinya. (1 Sam. 1:9-11, 20; Fili. 2:25-30) Nitie ranyisi mathoth kendo mabeyo mayudore e Muma ma unyalo jiworugo.

Inyalo nyiso ni idewo gadier owete gi nyimineni ei kanyakla kuom dwaro ng’eyo ni gidhi nade nyaka ne ilimgi. (Tich 15:36) Seche ma itieko limbeni, inyalo timo chenro mondo ibi ilend gi owadwa kata nyaminwano. Sama Bernard, ma en jaduong’-kanyakla molony, oromo gi owadwa kata nyaminwa moro ma nyocha otimone limbe, ojapenje gi rieko e wi paro moro ma nokonyego kopenjo kama, “Nyisa kabe parocha nyocha okonyi maber?” Kuom nyiso ni idewe kamano, inyalo fwenyo kapo ni pod nitie kony monego imiye.

Gima duong’ moloyo en ni owete gi nyimine onego owinj e chunygi ni odewgi kendo ohergi. (1 Thes. 5:11) Omiyo, kapok itimo limbe, kaw kinde mondo ipar matut kuom chal mar owadwa kata nyaminwa midwaro dhi limo. Ket wachno e lamo. Yier ndiko mowinjore. Kitimo mago duto, ibiro yudo weche makare mibiro duogogo ‘chuny joma ool’!