KINDE mang’eny thoth ji dwaroga ng’eyo gima jomoko paro kuomgi. Kata kamano, wan kaka Jokristo donge onego wadew ahinya kaka Jehova nenowa? Ka kuom adier, en e Jal Maduong’ie moloyo ng’ato ang’ata e wi polo gi piny kendo Muma wacho ni ‘soko mar ngima ni kode.’—Zab. 36:9.

² Jaote Petro nolero ni mondo Jehova oyie kodwa, ‘onego ngimawa obed maler kendo waluor Nyasaye.’ (Som 2 Petro 3:11.) Mondo Nyasaye oyie kodwa, ‘ngimawa’ nyaka bed maler. Mano oriwo timbewa, pachwa, koda winjruokwa gi Nyasaye. E wi mano, dwarore ni timbewa onyis ni ‘waluoro Nyasaye.’ Kuom mano, Nyasaye ok non mana timbewa kende, to onono koda dhano ma iye. To nikech Jehova “nono chuny,” ong’eyo kabe timbewa ler gadier kendo ong’eyo kabe wachiworene gi chunywa duto.—1 Weche 29:17, The Bible in Luo, 1976.

³ Satan Jachien ok dwar mondo wabed gi winjruok maber gi Nyasaye. Mano e momiyo otimo duto monyalo mondo omi waketh winjruokwa gi Jehova. Otiyo gi miriambo koda riekni mag wuond mondo opogwa gi Nyasaye ma walamo. (Joh. 8:44; 2 Kor. 11:13-15) Kuom mano ber mondo wapenjre niya: ‘Satan tiyo gi riekni mage e wuondo ji? To, anyalo timo ang’o mondo arit winjruokna gi Jehova?’

⁴ Jakobo ma ne en japuonjre Yesu nondiko kama:  “Ng’ato ka ng’ato itemo ka gombone otere, kendo oyondhe. Eka gombo kosemako ich onywolo richo, to richo kosedongo ogik, onywolo tho.” (Jak. 1:14, 15) Kinde duto ka Satan dwaro ketho winjruokwa gi Nyasaye, omulo kama gombo magwa chakoree ma en chunywa.

⁵ Satan tiyo gi yore mage mondo oyondhgo chunywa? Muma wacho niya: “Piny duto obedo e teko mar Ng’a Marachno.” (1 Joh. 5:19) Riekni ma Satan tiyogo oriwo “gik manie piny.” (Som 1 Johana 2:15, 16.) Kuom higini alufe mang’eny, Jachien oseiko pinyni e yo mariek mondo otigo e wuondo dhano. To nikech wadak e pinyni, dwarore ni watang’ gi riekni mopondo motiyogo.—Joh. 17:15.

⁶ Satan tiyo gi yore mopondo molos e yo mariek mondo oyondhgo gombo mag chunywa. Jaote Johana nyisowa yore adek ma Satan ohero tiyogo: (1) “gombo mar ringruok” (2) “gombo mar wang’,” kod (3) “sunga mar ngima.” Satan notiyo gi yoregi mondo otem Yesu kane Yesu nie thim. To nikech Satan osetiyo gi yoregi kuom higini mang’eny, en gi lony mamalo e tiyo kodgi, kendo ong’eyo ni mane monyalo tiyogo maber kuom ng’ato ka ng’ato. Kapok wang’iyo kaka wanyalo ritore kuom riekni mag Satan, we wanon ane kaka Jachien notiyo gi moko kuom rieknigo e wuondo Hawa, to Wuod Nyasaye to notame wuondo.

⁷ Dhano duto dwarore ni ochiem eka mondo gibed mangima. Jachwech noloso piny mondo onyag chiemo mathoth. Satan nyalo temo tiyo gi gombo ma wan-go mar dwaro chiemo mondo oywawa kik watim dwaro mar Nyasaye. We wane ane kaka notiyo gi yorno mondo owuond Hawa. (Som Chakruok 3:1-6.) Satan nonyiso Hawa ni ne onyalo chamo olemo manie “yath makelo ng’eyo ber gi rach” maok otho, kowacho ne Hawa ni chieng’ mochamogo to obiro bedo kaka Nyasaye. (Chak. 2:9) Jachien ne temo wacho ni onge tiende mondo Hawa owinj dwond Nyasaye ni eka mondo odhi nyime bedo mangima. To mano kaka ne en miriambo maduong’! Bang’ keto wachno e pach Hawa, koro Hawa ne nyalo timo gik moko ariyo: Nonyalo kwedo parono, kata nonyalo siko koparo wachno, komiyo gombo mar chamo olemono omed dongo e chunye. Kata obedo ni ne onyalo chamo olemo mane nie yiende mamoko, en ne oyiero keto pache mana kuom  gima Satan nowachone e wi olemo ma ne nie dier puodho omiyo ‘nokawo olemono mochamo.’ Noyudo Satan osepidho e chuny Hawa gombo mar yudo gimoro ma Jachwech nosekwero.

⁸ Satan notiyo gi yorno bende mondo otemgo Yesu e thim. Bang’ kane Yesu osetueyo kuom ndalo 40 odiechieng’ gotieno, Satan notemo tiyo gi gombo mar chiemo mondo oyondhgo Yesu. Nowachone Yesu niya: “Ka in e Wuod Nyasaye, to chik kidini mondo odok kuon.” (Luka 4:1-3) Yesu ne nyalo timo gik moko ariyo: Nonyalo yiero tiyo gi teko ma en-go mar timo hono mondo otiekgo kech, kata nonyalo yiero mar weyo timo kamano. Yesu nong’eyo ni ok onego oti gi teko machalo kamano e timo dwache owuon. Kata obedo ni kech ne kaye, kech ok nomiyo oketho winjruok mare gi Jehova. Yesu nodwoko Satan niya: “Nondiki niya, ‘Dhano ok nobed mangima gi kuon kende, to gi weche duto mowuok e dho Nyasaye.’”—Math. 4:4.

⁹ Johana bende nowuoyo e wi “gombo mar wang’” kaka achiel kuom obadho ma Satan tiyogo. Ng’ato nyalo chako gombo gimoro ahinya mana nikech ong’iyo gino. Kaluwore gi wach Hawa, Satan noyondho gombo mar Hawa kuom wachone niya: “Wang’u noyepi.” Kaka Hawa ne medo rango olemono, e kaka nomedo gombo chamo olemo ma ne okwerno. Hawa noneno ni yadhno ‘miyo wang’ mor.’

¹⁰ To Satan notiyo gi “gombo mar wang’” e yo mane mondo otemgo Yesu? Satan “notere malo, monyise pinjeruodhi duto mag piny ka diemo wang’. Eka nowachone ni, ‘Tekoni duto namiyi, gi duong’gi.’” (Luka 4:5, 6) Ok en ni Yesu noneno apoya pinjeruodhigi duto gi wang’e sie, to noneno e fweny duong’ ma pinjeruodhigo miyo ng’ato. Nyaka bed ni Satan ne paro ni Yesu ne dhi lwar e tem kaluwore gi gima ne oneno gi wang’e. Nowacho ne Yesu kama: “Ka nigo chongi piny milama, duto nodok mari.” (Luka 4:7) Yesu ne ok dwar kata matin duong’ ma Satan ne dwaro ni mondo obedgono. Nodwoko Satan gi kanyono niya: “Nondiki ni, ‘Ruoth Nyasachi ema nilam, to en kende ema nitine.’”—Luka 4:8.

¹¹ To mogik, Johana wuoyo kuom “sunga mar ngima.” Kane Adam gi Hawa ne  pod gin mana ji ariyo kendgi e piny, ne onge joma ne ginyalo sungonegi gik ma gin-go. Kata kamano pod ne gin gi sunga kata ng’ayi. Satan nomiyo Hawa obedo gi paro ni nitie gimoro maber ma ne onego giyudi to Nyasaye ne ok dwar miyogi. Jachien nonyise ni e chieng’no ma nocham olemb “yath makelo ng’eyo ber gi rach,” wang’e ne ‘dhi yepo mobed ka Nyasaye, kong’eyo mabeyo gi maricho.’ (Chak. 2:17; 3:5) Kuom mano, Satan nomiyo Hawa oparo ni nonyalo dak kata ka ok ochike gi Jehova. Nyaka bed ni ng’ayi ne en achiel kuom kido ma nomiyo Hawa oyie gi miriambono. Nochamo olemo ma ne okwerno koparo ni ne ok odhi tho. To mano kaka ne owuonde!

¹² Mopogore gi Hawa, Yesu to noketo ranyisi maber miwuoro kuom wach bedo gi bolruok! Satan notemo wuondo Yesu mondo otim gimoro ma ne nyalo moro jomoko, ka komachielo oketo Nyasaye e tem. Mano ne dhi bedo ng’awruok! Kar timo mano, Yesu nochiwo dwoko maler niya: “Ne owachi niya, ‘Kik item Ruoth Nyasachi.’”—Som Luka 4:9-12.

¹³ E kindegi, Satan tiyo gi gik manyalo ywayowa machalo gi ma notiyogo kuom Hawa gi Yesu. Jachien tiyo gi “gombo mar ringruok” mondo orwakgo dhano e timbe mag terruok, kata miyo gidonj e timbe mag chiemo koda metho mokalo tong’. Kotiyo gi piche mag ponografi, to ahinya wuon mayudore e Intanet, onyalo mako pach jomoko maok otang’ kendo rwakogi e “gombo mar wang’.” Satan bende tiyo gi “sunga mar ngima” mondo omi ji obed joma sungore, joma manyo huma kendo manyo mwandu kinde duto, mondo gibed gi loch e wi jomoko.

¹⁴ “Gik manie piny” chalo gi oniambo ma jalupo keto e dho olow mondo omakgo rech. Oniambogo lombo wang’, kata kamano, moro kamoro opando dho olow. Satan tiyoga gi gik ma ji neno ni gin gik mapile mondo omi gibed gi gombo mar ketho chike Nyasaye. Kata kamano, riekni mopondo kamago olos mondo oyondhwa mondo wachop gombo maricho manie chunywa. Gin gik mamiyo wabedo gi  paro ni chopo dwachwa wawegi kaachiel gi gik mamiyowa mor ema onego obed mokwongo e ngimawa moloyo timo dwach Nyasaye. Be ibiro yie mondo Satan owuondi?

¹⁵ Hawa ne olwar e tembe mag Satan, Yesu to ne okwedo tembego. Kinde duto kane Satan temo Yesu, Yesu ne dwoke kotiyo gi Ndiko niya: “Nondiki” kata ni, “Ne owachi.” Ka wapuonjore Muma gi kinda, wabiro ng’eyo Ndiko e yo maber, kendo bedo gi nyalo mar paro ndiko manyalo konyowa sama waromo gi tembe. (Zab. 1:1, 2) Paro ranyisi mayudore e Muma mag joma nochung’ motegno komakore gi Nyasaye, biro konyowa luwo ranyisi maggi. (Rumi 15:4) Miyo Jehova luor matut, tiende ni hero gik mohero kendo sin gi gik mosin-go, biro konyowa mondo wachung’ motegno.—Zab. 97:10.

¹⁶ Jaote Paulo jiwowa mondo wati gi ‘pachwa’ mondo wabed joma neno gik moko kaka Jehova nenogi, to ok neno gik moko kaka jopiny nenogi. (Rumi 12:1, 2) Kojiwo gimomiyo dwarore ni waritre ne gik mwarwako e pachwa, Paulo nowacho niya: “Kwaketho mbaka kod gik moko ma ting’ore malo ma mon kod ng’eyo Nyasaye, kendo kwakelo paro duto e tuech mondo owinj Kristo.” (2 Kor. 10:5) Pachwa ema nigi teko ahinya mar chiko kitwa, omiyo kinde duto onego waket pachwa kuom gik mamoro Nyasaye.—Fili. 4:8.

¹⁷ Ok wanyal bedo joma ler kapo ni wapong’o pachwa gi paro koda gombo maricho. Nyaka waher Jehova ka wan gi “chuny maler.” (1 Tim. 1:5) Kata kamano, chuny dhano opong’ gi wuond mang’eny, kendo ok wanyal ng’eyo ni “gik manie piny” chiko chunywa e okang’ maromo nade. (Yer. 17:9) Kuom mano, owinjore kinde ka kinde ‘wanonre wawegi mondo wane kabe pod wawuotho e yie.’ Wanyalo timo kamano ka ng’ato ka ng’ato nonore owuon kaluwore gi weche ma wapuonjore e Muma.—2 Kor. 13:5.

¹⁸ Gimachielo manyalo konyowa kwedo “gik manie piny” en ka waketo e paro weche ma Johana nondikogi: “Piny kadho, gi gombone: to ng’a ma timo gi ma Nyasaye dwaro osiko nyaka chieng’.” (1 Joh. 2:17) Nyalo nenore ka gima piny Satanni biro siko nyakachieng’. Kata kamano, chieng’ moro gikone nochopi. Gimoro amora ma Satan nyalo miyowa e pinyni ok bi siko. Keto wachno e paro biro konyowa mondo kik walwar e tembe mag Jachien.

¹⁹ Jaote Petro jiwowa mondo wabed joma Nyasaye oyiego kapod ‘warito kendo dwaro ni chieng’no mar Nyasaye orure, nikech en chieng’ ma nomi polo wang’ kendo oleny nono, kendo gik moko duto noleny nono.’ (2 Pet. 3:12) Ndalo okayo machiegni ma Jehova biro kethoe gimoro amora maloso piny Satanni. Kapok kindeno ochopo, Satan pod biro dhi nyime tiyo gi “gik manie piny” mondo otemwago mana kaka notemo Hawa koda Yesu. Nyaka watem ahinya kik wabed kaka Hawa ka wamanyo mana kaka wanyalo chopo gombowa wawegi. Timo kamano biro chalo ka gima Satan e nyasachwa. Dwarore ni wabed kaka Yesu ma nokwedo tembe mag Satan, katabed ni gik ma Satan temowago lombo wang’ maromo nade. Mad waduto wang’ad e chunywa mar bedo joma Nyasaye oyiego.