1. En chokruok mane ma jotich Nyasaye nobedogo ma wabiro nono, to mano miyo wabedo gi penjo mage?

“CHUNGURU udend Jehova Nyasachu ndalo duto ma nyaka chieng’.” Mago e weche ma Jo-Lawi nowacho ka gijiwo jotich Nyasaye mondo ochokre kanyachiel mondo gilem. Mani en achiel kuom lamo maboyo ahinya mayudore e Muma. (Neh. 9:​4, 5) Chokruogno ne otim Jerusalem e higa mar 455 Ka Ndalowa Podi e odiechieng’ mar 24, e dwe mar abiriyo ma Jo-Yahudi luongo ni Tishri. Seche ma wanono matut gik ma nomiyo otim chokruogno, inyalo penjori kama: ‘Gin gik mage mabeyo ma notimore ma nomiyo chokruogno obedo maber? Gin puonj mage manyalo yudo kuom lamo ma ne oik maber kamano? ’​—⁠Zab. 141:2.

2. En ranyisi mane maber ma Jo-Israel noketonwa kane gin e chokruok?

² Kodong’ dwe achiel to itimo chokruogno, noyudo Jo-Yahudi osetieko gero ohinga mag Jerusalem. (Neh. 6:​15) Ne gigero ohingago duto mana kuom odiechienge 52 kae to bang’ mano e odiechieng’ mokwongo e dwe mar Tishri, ne gichokore kanyachiel mondo Ezra kod Jo-Lawi mamoko osom kendo olernegi Chike mag Nyasaye. “Ji duto ma ne nigi rieko mar winjo,” nochung’ kendo nochiko itgi “nyaka a ru piny nyaka odiechieng’ tir.” Jo-Israelgo noketonwa ranyisi maber ahinya. Kata obedo ni samoro wachokore e Ute Romo molos mabeyo, seche moko pachwa nyalo galore ka wan e chokruok ma wachak paro gik mamoko maok otudore gi lamo. Kapo ni gima kamano jatimoreni, ber mondo inon ranyisi mar Jo-Israel ma ne ochiko itgi malong’o, morwako weche ma ne giwinjo kendo ywak bang’ fwenyo ni ne ok giluw Chike Nyasaye.​—⁠Neh. 8:​1-9.

3. En chik mane ma Jo-Israel noluwo?

 ³ Kata kamano, mano ok ne en thuolo ma Jo-Israel nonego ohulgo richogi. Nikech ne en odiechieng nyasi, nonego gibed mamor e lamo Jehova. (Kwan 29:1) Omiyo Nehemia nonyiso ji niya: ‘Dhiuru ucham gi machwe, umadh gik mamit, kendo uor migepe ni jalo ma pok oikne gimoro: nikech tinendeni en ndalo maler ni Jehova marwa: chunyu kik bed malit, niwira mor mar Jehova obedo tekou.’ Ji norwako wachno mi odiechiengno ne gibedo gi “mor maduong’.”​—⁠Neh. 8:​10-​12.

4. Jo-Israel ma ne gin wiye udi notimo ang’o, to ang’o ma ne gifwenyo ni nonego gitim e odiechieng’ kodiechieng’ mar Sap Kiche?

⁴ E odiechieng’ ma ne luwo, wiye udi duto nochokore mondo gine ane kaka Jo-Israel ne nyalo medo luwo Chike Nyasaye kaka dwarore. Kane ginono Ndiko, ne gifwenyo ni ogandano duto nonego otim Sap Kiche kendo tieko gi chokruok mar lamo kochakore odiechieng’ mar 15 nyaka odiechieng’ mar 22 e dweno mar Tishri. Omiyo ne gichako timo ikruok. Sap Kicheno ema nobedo sawo ma notim maberie moloyo nikech ne pok otime chakre e kinde Joshua, to mano nomiyo Jo-Israel obedo gi “mor gi ilo maduong’ moloyo.” Gimaduong’ ma notimore e nyasini en ni Chike Nyasaye ne isomo e lela pile ka pile chakre “chieng’ mokwongo nyaka ndalo mogik.”​—⁠Neh. 8:​13-​18.

5. Ang’o ma ne jotich Nyasaye otimo kane Jo-Lawi pok ochako lemo e logi?

⁵ Ndalo ariyo bang’ sawo, ne en odiechieng’ ma nowinjore Jo-Israel ohul richogi ayanga nikech ne gisebedo kaok giluw Chike Nyasaye. Mano ok ne en odiechieng chiemo kendo bedo mamor. Kar mano, jotich Nyasaye notueyo kendo ne girwakore gi lep ogunia ka ginyiso lit ma ne gin-go e chunygi. Jo-Lawi nochako somo ne ji Chike Nyasaye kendo, kuom seche adek gokinyi. Bang’e godiechieng’, “ne gihulo kethgi, kendo ne gimiyo Jehova Nyasachgi duong’.” Bang’ mano eka Jo-Lawi nochako lemo e lo ji duto. ​—⁠Neh. 9:​1-4.

6. Ang’o ma nokonyo Jo-Lawi mondo ochiw lamo moik maber, to mano puonjowa ang’o?

⁶ Jo-Lawi ne siko somo Chike Nyasaye, to mano emomiyo ne giiko lamo maber kamano. E lamono, kare mokwongo jiwo ahinya tije mag Jehova kod kido mabeyo ma en-go. E kare mogik, Jo-Lawi nowuoyo e wi richo mang’eny ma ji notimo kendo lero gimomiyo Jo-Israel ne ok owinjore oyud ng’wono kata ‘miwafu mogundho’ mag Nyasaye. (Neh. 9:⁠19, 27, 28, 31) Mana kaka Jo-Lawi, wabende lamo ma wachiwo ne Jehova biro bedo moik maber mana ka  wasomo Wach Nyasaye pile ka pile kendo waparo matut kuom gima wasomo ka wamiyo Jehova thuolo mar wuoyo kodwa kapok walemo.​—⁠Zab. 1:​1, 2.

7. Jo-Lawi nokwayo Nyasaye ang’o, to mano puonjowa ang’o?

⁷ E lamo ma ne Jo-Lawi ochiwono, ne gikwayo gimoro achiel. Kwayono yudore e kwan matindo 32 mawacho niya: “Koro Nyasachwa, Nyasaye maduong’, maratego, kendo malich, marito muma kendo man gi miwafu, chandruokgo duto moseyudowa, mana wan kod [ruodhwa], gi jodongo magwa, gi jodolo magwa, gi jonabi magwa, gi wuonewa, gi jogi duto, ma nyaka a ndalo mag ruodhi mag Assuria nyaka koroni, chandruokgo kik nere ka gi matin e nyim wang’i.” Omiyo Jo-Lawi ketonwa ranyisi maber mar pako Jehova kendo goyone erokamano kapok wakwaye gimoro amora.

8, 9. (a) Jo-Lawi nochako nade lamo margi e yo mobolore? (b) Ogendini ariyo mag polo ma Jo-Lawi nowuoye gin mage?

⁸ Kata obedo ni Jo-Lawi ne oiko lamo margi e yo maber kamano, pod ne gibolore ka gineno ni weche ma ne gitiyogo e lamo ne ok oromo chiwo pak chuth ma Jehova owinjore oyudi. Omiyo, ne gichako kwayo Jehova e lo Jo-Israel duto ka giwacho niya: “Mondo odend nyingi man gi duong’, nying’ mobedo malo moloyo moyombo dend gi pak duto.”​—⁠Neh. 9:5.

⁹ Lamono dhi nyime kama: “In e Jehova, mana in kendi; in e michweyo polo, kod ogandagi duto, gi piny kod gik moko duto mantie, gi nembe kod gik moko duto mantie, kendo in e miritogi duto; kendo oganda duto mar polo paki ka gimiyi duong’.” (Neh. 9:6) Ee, Jehova Nyasaye nochweyo polo kod sulwe duto manie iye. Bende nochweyo gik moko duto mabeyo ma waneno e pinywani ka omiyo gik mangima nyalo mar nyuolruok mondo gimedre. Joma noneno ka Nyasaye chweyo gigi duto ne gin malaike makare mabende iluongo ni ‘oganda mar polo.’ (1 Ruo. 22:19; Ayub 38:​4, 7) E wi mano, malaikego bolore mondo gitim dwaro mar Nyasaye ma en konyo “jo ma biro yudo warruok.” (Hib. 1:​14) Donge malaikego ketonwa ranyisi maber mar tiyo ne Jehova ka wariwore kaka oganda motiegi?​—⁠1 Kor. 14:⁠33, 40.

10. Ang’o ma wapuonjore kuom gima Nyasaye notimo ne Ibrahim?

¹⁰ Bang’e, Jo-Lawi nowuoyo e wi gima Nyasaye notimone Abram, ma koro nosechopo higini 99 to pok onyuolo kata nyathi achiel nikech Sarai chiege ne en migumba. Mano e kinde ma Jehova noloko nying Abram mobedo Ibrahim ma tiende ni “wuon ogendini mang’eny.” (Chak. 17:⁠1-6, 15, 16) Nyasaye nosingo bende ne Ibrahim  ni kothe ne dhi dak e piny Kanaan. Mopogore gi dhano, Jehova wiye ok wil gi singo mosetimo. Jo-Lawi nowacho kama ka ginyiso kaka Jehova rito singone: “In e Jehova Nyasaye, ma noyiero Abram, kendo nigole oa e Ur e piny mar jo Kaldayo, kendo nimiye nying mar Ibrahim; nineno chunye kaka ne en ng’a makare e nyimi, mi nitimo kode muma kaka dimiye piny mar Jo-Kanaan, . . . mar chiwogo mana ni kothe, kendo isechopo wechenigo; nikech in wuon adiera.” (Neh. 9:​7, 8) Wabende weuru waluw ranyisi mar Nyasachwa ma wuon adiera kuom temo matek mondo wabed jogo ma timo kaka wasesingo.​—⁠Math. 5:​37.

11, 12. Ler ane tiend nying Jehova kod kaka mano otudore gi gik ma notimo ne nyikwa Ibrahim.

¹¹ Nying Jehova tiende en ni “Omiyo Gima Odwaro Timore,” manyiso ni Nyasaye timo gigo madwarore mondo ochop gik mosingo. Ranyisi maber en kaka notimo ne nyikwa Ibrahim ma ne gin wasumbini e piny Misri. E kindeno, ne nenore ka gima ogandano duto ne ok nyal gol e twech kendo terogi e Piny Manosingi. Kata kamano, Nyasaye nodhi nyime timo gik ma ne dwarore nyaka nochopo kama ne otimoe gik ma ne osingone joge. Kuom timo kamano, nonyiso ni owinjore bedo gi nyinge mar Jehova.

¹² Jo-Lawi nowacho moko kuom gik ma Jehova nosetimo ne joge kane giwacho niya: “Nineno sand ma nosandgo kwerewa e Misri, kendo niwinjo yuakgi e Nam Makwar; kendo ninyiso ranyisi gi tim honde kuom Farao, kendo kuom jotichne duto, kendo kuom ji duto mag pinye; nikech ning’eyo kaka ging’ayore kuom kwerewa; kendo nimiyo nyingi bedo gi duong’, kaka obet nyaka koroni. Kendo ning’ado pi nam e nyimgi, ma gikadho e dier nam kuom lowo motwo; to jo ma nolawogi niwitogi e ndiwa matut, kaka diwit kidi e kar pi maduong’.” Kae to lamoni dhi nyime wacho kaka Jehova nokonyo joge mondo okaw Piny Manosingi. Owacho kama: “Niloyo jopinyno e nyimgi, mana Jo-Kanaan . . . Ne gikawo mier madongo mochiel motegno, gi piny mamiyo, kendo ne gikawo udi mopong’ gi gik mabeyo, gi sokini mosekuny, gi puothe mag mizabibu gi puothe mag zeituni, kod yedhe mang’eny ahinya mag olembe mi ne gichiemo, ne giyieng’, kendo ne gibet mamor kuom berni mogundho.”​—⁠Neh. 9:​9-⁠11, 24, 25.

13. Jehova notimo ang’o mondo Jo-Israel obed gi winjruok maber kode, kata kamano ne gitimo ang’o bang’e?

¹³ Nitie gik mamoko mang’eny ma Nyasaye notimo mondo mi ochop dwache. Kuom ranyisi, mapiyo bang’ kane Jo-Israel osewuok Misri, Jehova nomiyogi chikene kendo nopuonjogi kaka ne ginyalo lame e yo mowinjore. Jo-Lawi nowacho kama e lamo: “Ne ilor e wi god Sinai, kiwuoyo kodgi gi dwol moa e polo, gi bura maber, kod weche michiko.” (Neh. 9:​13) Jehova nopuonjo joge mondo gibed joma owinjore oluong gi nyinge maler nikech ne gin ogandano ma ne dhi donjo e Piny Manosingi. Kata kamano ne ok gidhi nyime rito chike Jehova.​—⁠Som Nehemia 9:​16-18.

14, 15. (a) Jehova nobedo mang’won gi oganda mar Jo-Israel e yo mane? (b) Ang’o ma wapuonjore kuom kaka Jehova notimo ne Jo-Israel?

¹⁴ Lamo mar Jo-Lawi wuoyo kuom richo ariyo ma Jo-Israel notimo bang’ timo singruok e Got Sinai ni gibiro rito Chike Nyasaye. Nikech richogo, nowinjore owegi mondo githo. Kata kamano Jo-Lawi nopako Jehova e lamo niya: “Kuom miwafu  magi mogundho ne ok ijwang’ogi e thim. . . . Nikurogi . . . kuom higini piero ang’wen, kendo ne ok girem gimoro; nenggi ok noti, kata tiendegi ok nokuot.” (Neh. 9:⁠19, 21) E ndalogi bende, Jehova miyowa gigo madwarore mondo wadhi nyime tiyone ka wachung’ motegno. Kik wabed kaka Jo-Israel gana gi gana ma notho e thim nikech tamruok luwo chike Nyasaye kendo bedo maonge yie. Kuom adier, gik ma noyudogigo nondiki “mondo omiwa tang’, wan ma giko mar ndalo ochoponwa.”​—⁠1 Kor. 10:​1-​11.

¹⁵ Gima lit en ni bang’ kane Jo-Israel osedonjo e Piny Manosingi, ne gichako lamo nyiseche mag Jo-Kanaan ma noriwo timbe mag terruok kod golo nyithindo kaka misango. Kuom mano, Jehova noweyo mondo ogendini mamoko osand ogandane ma noyiero mondo obed joge. Kane giloko chunygi ma giweyo yoregi maricho, Jehova ne weyonegi richogi kendo resogi e lwet jowasikgi. Mano ne jatimore “ndalo mang’eny.” (Som Nehemia 9:​26-​28, 31.) Jo-Lawi noyie gi chunygi duto kama: “Nikurogi higini mang’eny kisiemogi kuom roho mari e dho jonabi magi; to ne ok gidewo: emomiyo nichiwogi e luet ogendini mag piny.”​—⁠Neh. 9:​30.

16, 17. (a) Bang’ wuok e twech, chal mar Jo-Israel nopogore nade gi mar kweregi ma nokwongo donjo e Piny Manosingi? (b) Jo-Israel nohulo ayanga wach mane, to ne gisingore mar timo ang’o?

¹⁶ Bang’ wuok e twech Babulon, Jo-Israel nochako chayo chike Jehova kendo. To nikech mano, ang’o ma notimorenegi? Jo-Lawi dhi nyime ka wacho niya: “Ne, wan jotichni tinendeni, kendo pinyno ma ne imiyo kwerewa mondo gicham nyakne kod berne, ne koro, wan mana misumbini e pinyno. Kendo onyago nyak mathoth ni ruodhigo miseketo mobedo gi loch kuomwa nikech richowa . . . kendo wan e dhier maduong’.”​—⁠Neh. 9:⁠36, 37.

¹⁷ Be Jo-Lawi ne temo wacho ni Nyasaye notimo marach kuom weyo mondo Jo-Israel ochandre kamano? Ooyo! Jo-Lawigo nowacho niya: “In itimo makare kuom duto moseyudowa; nikech isetimo madieri, to wan wasetimo maricho.” (Neh. 9:​33) Jo-Lawi tieko lamogino ka gisingore ni ogandano biro luwo Chike Nyasaye. (Som Nehemia 9:​38; 10:29) Ne gindiko piny singo ma ne gitimono kae to chwo 84 ma notelo ne Jo-Yahudi noketo sei maggi.​—⁠Neh. 10:​1-​27.

18, 19. (a) Mondo wadonj e piny manyien ma Nyasaye osingo, dwarore ni wayie gang’o? (b) Onego wadhi nyime lamo ka wakwayo ang’o, to nikech ang’o?

¹⁸ Ka wadwaro donjo e piny manyien ma Jehova osingo, ber mondo wayie gi kum momiyowa. Jaote Paulo nopenjo niya: “Ere wuowi ma ok wuon mare kum? ” (Hib. 12:7) Wanyiso ni wayie mondo Nyasaye otawa e ngimawa kuom nano sama watiyone kendo yie mondo rohone otiegwa. To ka watimo richo, wanyalo bedo gadier ni Jehova biro weyonwa ka waloko chunywa gadier kendo rwako kum momiyowa.

¹⁹ Machiegni, Jehova biro timo gik madongo moloyo ma notimo ka noreso Jo-Israel e piny Misri. To mano biro miyo ng’ato ang’ata ong’e ni en Nyasaye maduong’ miwuoro. (Eze. 38:23) To mana kaka jotichne machon nodonjo e Piny Manosingi maonge kiawa, Jokristo duto ma nano ka tiyo ne Jehova biro yudo ngima mochwere e piny manyien ma Nyasaye osingo. (2 Pet. 3:​13) Kapod warito gik mabeyo mosingnwa, wadhiuru nyime lamo mondo nying Nyasaye obed maler. Sula maluwo mae biro wuoyo e wi lamo machielo manyalo konyowa timo gima dwarore mondo wayud gweth mag Nyasaye e kindegi koda e kinde mabiro.