Nitie ranyisi moko e Muma manyiso ni ringre jomotho kata chokegi ne ji owang’o. (Josh. 7:25; 2 Weche 34:4, 5) Mano ne nyalo nyiso ni joma ne owang’go ne ikwano kaka joma ok owinjore oyiki e yo maber. Kata kamano, wang’o ringre joma osetho ne ok en gima nyiso kinde duto ni koro jogo ne ok owinjore oyik maber.

Wanyalo neno mano kaluwore gi gima notimne Ruoth Saulo kod yawuote adek kane githo. Kargi ji ang’wen, ne githo e lweny ka gikedo gi Jo-Filistia. Achiel kuom yawuot Saulo ne en Jonathan ma ne en osiep Daudi ma ngita gi del kendo ma ne riwo Daudi lwedo kinde duto. Kane Jo-Israel ma jochir ma nodak Jabesh-gilead owinjo ni githo, ne gidhi giomo ringregi ma giwang’o, kae to giiko chokegi. Bang’e Daudi nopwoyo Jo-Israelgo kuom gima ne gitimono.—1 Sam. 31:2, 8-13; 2 Sam. 2:4-6.

Geno ma Muma chiwo e wi jomotho en chier, tiende ni Nyasaye biro duoko ngima ne ng’at motho. Bedo ni owang’ kata ok owang’ ringre ng’at motho, Jehova nigi nyalo mar chiero ng’atno ka en gi ringre manyien. Jo-Hibrania adek ma nomakore gi Jehova kendo ma ne owit e mach mondo githo mana kaka Ruoth Nebukadereza nowacho, ne ok obedo maluor ni kowang’gi to ni koro Jehova ne ok nyal chierogi. (Dan. 3:16-18) Jotich Jehova ma nochung’ motegno nyaka e thogi ma owang’ ringregi e kembe mag Jo-Nazi bende ok nobedo maluor ni ok bi chiergi. Jotich Jehova mathoth osetho e mach kata kuonde ma ringregi ne ok nyal yudi. Kata kamano, pod ibiro chiergi.—Fwe. 20:13.

Ok ochuno ni Jehova ochok kanyachiel ringre ng’at ma nosetho chon eka mondo ochiere. Mano nenore maler e yo ma Nyasaye chierogo Jokristo mowal mondo odhi odag e polo. Mana kaka Yesu “ne ochier gi del mar polo,” Jokristo mowal ichiero ka kitgi chal mana kaka ne gin chon, to ringruok ema imiyogi mar polo. Ok gidhi e polo gi ringruok mar dhano ma ne gin-go chon.—1 Pet. 3:18, New World Translation; 1 Kor. 15:42-53; 1 Joh. 3:2.

Wan gi geno ni ng’ato inyalo chier, ok ni nikech ringrene owang’ kata ok owang’, to nikech noketo yie kuom nyalo koda gombo ma Nyasaye nigo mar chopo gik mosingo. (Tich 24:15) En adier ni ok wanyal ng’eyo chuth kaka Nyasaye notimo hono mar chiero jomotho e kinde mosekalo, kata kaka obiro timo honono e kinde mabiro. Kata kamano, pod waketo genowa kuom Jehova. Osemiyowa “singo” kata gima nyiso ni chier nitie adier kuom chiero Yesu.—Tich 17:31; Luka 24:2, 3.

Ber mondo Jokristo oket e paro chike mag ogandagi, gik ma jogweng’gi wacho, kod chike ma sirkal oketo kuom gima onego otim gi ringre ng’at mosetho. (2 Kor. 6:3, 4) Omiyo, bed ni ringre ng’at motho ibiro wang’ kata ok bi wang’, luwore gi yiero mar ng’ato owuon kapok otho, kata yiero mar joodgi.