1, 2. (a) Ang’o momiyo in gadier chuth ni Jehova ohero joge? (b) En gombo mane ma Nyasaye nochueyogo dhano duto?

ANG’O momiyo in gadier chuth ni Jehova ohero joge? Kapok idwoko penjono, ne ane ranyisigi: Kuom higni moko mathoth, owete gi nyimine moko ne jiwo nyaminwa moro miluongo ni Taylene mondo obed gi paro mowinjore kuome owuon. Taylene wacho niya: “Ka dine Jehova ok ohera, dine ok otimo kinda e jiwa e yo ma kamano.” Brigitte ma nopidho nyithinde ariyo kende owuon bang’ tho chwore wacho kama: “Pidho nyithindo e piny Satanni en achiel kuom gik matek moloyo to ahinya ahinya ka in janyuol achiel. Kata kamano, an gadier ni Jehova ohera nikech osebedo kotaya kata weche tek ma chalo nade, kendo ok oyie mondo arom gi tembe mapek ma ok anyal nanoe.” (1 Kor. 10:13) Sandra to nyagore gi tuwo moro ma ok nyal thiedhi. E chokruok moro maduong’, nyaminwa moro ma jaode ong’ere nokeche e yo makende ahinya. Chwor Sandra wacho kama: “Kata obedo ni ok nwang’eyo nyaminwano chon, yo ma nokechowago nomorowa ahinya. Kata mana gik matindo tindo ma owete gi nyiminewa timonwa ka ginyiso ni giherowa, miyo aneno adier ni Jehova oherowa.”

 ² Nyasaye nochueyo dhano gi gombo mar hero jomoko kendo mondo gin bende ohergi. Yot ahinya mondo chuny ng’ato onyosre kapo ni ok onyise hera sama gimoro marach otimorene apoya, gimoro otimorene e yo ma ne ok opar, tuwo moro osieko, weche yuto obedo matek, kata ka ng’ato ok oyudo nyak e tij lendo. Kapo ni wachako winjo e chunywa ni koro Jehova ok oherowa, ber mondo wang’e ni kinde duto ogenowa ahinya kendo ni ‘omako luetwa korachwich’ mondo okonywa. Wiye ok nyal wil kodwa ngang’ ka wadhi nyime tiyone.—Isa. 41:13; 49:15.

3. En ang’o ma nyalo jiwowa mondo wamed bedo gadier ni hera ma Jehova oherowago osiko?

³ Jokristo wetewa ma owuo kuomgi malo kae ne ni gadier ni Nyasaye ne ni kodgi e kinde mag tem. Wan bende wan gadier ni en kodwa. (Zab. 118:6, 7) Sulani biro jiwo kaka hera ma Nyasaye oherowago nenore e (1) gik mochueyo, (2) Wachne mondik kuom muche, (3) thuolo ma wan-go mar lemo, kod (4) mich mar rawar. Paro matut kuom gik mabeyo ma Jehova osetimo biro miyo wamed goyone erokamano kuom herane mosiko.—Som Zaburi 77:11, 12.

4. Paro matut kuom gik ma Jehova ochueyo fwenyonwa ang’o?

⁴ Ka wang’iyo gik ma Jehova osechueyo, be wanyalo neno kaka oherowa? En kamano, nikech herane e ma nomiyo ochueyo gik moko. (Rumi 1:20) Nochueyo piny e yo ma nyalo miyo wadag e iye maber. Kata kamano, ok odwar mana ni wadag adaga kende. Nyaka wachiem eka wabed mangima. Jehova nochueyo piny e yo ma miyo onyago kit alode gi yiende ma nyalo miyowa chiemo mabeyo miwuoro. Nomiyowa nyalo mar winjo mit chiemo! (Ekl. 9:7) Nyaminwa moro miluongo ni Catherine morga ahinya sama ong’iyo chuech, to ahinya e kinde ma gik moko chako lothie e piny Canada. Owacho niya: “Neno kaka gik moko duto bedoga ka koth osechako chue bang’ oro, en gima iwuoro ahinya. Maupe chako twi ka giwuok e lowo, winy ma nodar koro duogo, moriwo nyaka winyo moro matin ma biroga chiemo machiegni gi dirisa mar jokonda. Jehova oherowa e momiyo omiyowa gik mathoth ma morowa.” Wuonwa manie polo morga ahinya gi chuechne kendo odwaro ni wan be wabed mamor kodgi.—Tich 14:16, 17.

5. Yo ma Jehova nochueyowago nyiso nade ni oherowa?

⁵ Jehova nochueyowa gi nyalo mar timo tije ma kelo nyak kendo ma morowa mondo ngimawa omed bedo gi ndhadhu. (Ekl. 2:24) Dwaro mare ne en ni dhano opong’ piny, gibed gi loch kuom piny, kuom rech, winy, kod chuech moko duto mangima. (Chak. 1:26-28) Bedo ni Jehova nochueyowa gi kido ma konyowa luwo timne en gima nyiso hera gadier!—Efe. 5:1.

6. Ang’o momiyo onego wakaw Wach Nyasaye kaka gima duong’ e ngimawa?

⁶ Nyasaye osenyisowa ni oherowa malich kuom miyowa Wachne ma nondik kuom muche. Muma fwenyonwa gik monego wang’e kuom Nyasaye kod gik mosebedo kotimo ne dhano. Kuom ranyisi, Ndiko nyisowa kaka notimo ne Jo-Israel, ma ne siko ng’anyone. Zaburi  78:38 luwonwa kama: “To en, kokechogi gilala, noweyo timgi mamono, ne ok onegogi: ero, ndalo mang’eny noweyo mirima mare; ne ok ojimbo mirimbe duto.” Paro ndikoni e yo matut nyalo konyi neno e yo ma kende ahinya ni kuom adier Jehova oheri kendo odewi. Bed gadier chuth ni Jehova ogeni.—Som 1 Petro 5:6, 7.

7. Ang’o momiyo onego wagen Muma?

⁷ Onego wagen Muma ahinya nikech en e buk ma Nyasaye tiyogo mondo owuo kodwa. Mondo genruok kod hera obedie e kind joot, dwarore ni jonyuol owuo gi nyithindgi e yo malong’o kendo e yo ma nyiso ni gikechogi. To nade Jehova? Kata obedo ni pok wanene kata winjo dwonde, owuoyo kodwa kotiyo gi Wachne mondik kuom muche kendo onego wachikne itwa. (Isa. 30:20, 21) Jehova gombo ahinya tayo joge mochiworene kendo ritogi kik gimoro ohinygi. E wi mano, odwaro ni wang’eye kendo waket genowa kuome.—Som Zaburi 19:7-11; Ngeche 1:33.

8, 9. En ang’o ma Jehova dwaro ni mondo wang’e? Ti gi ranyisi manie Muma.

⁸ Jehova dwaro ni wang’e ni oherowa kendo ok oket pache mana kuom richo ma nonyuolwago. Omanyoga gik mabeyo ma watimo. (2 Weche 16:9) Kamano e kaka notimo ne Jehoshafat ruodh Juda. Kinde moro, Jehoshafat ok notiyo gi rieko ka noyie riwo lwedo Ahab ruodh Israel ma ne dhi kedo gi jolweny mag Suria mondo gikaw Ramoth-gilead. Kata obedo ni jonabi 400 mag miriambo nonyiso Ahab ni ne odhi loyo  lwenyno, janabi mar Jehova miluongo ni Mikaia e ma nokoro ni ne idhi loye. Ahab notho e lwenyno, kendo Jehoshafat notony mana matin. Ka nodok Jerusalem, nomiye siem mager nikech noriwo Ahab lwedo. Kata kamano, Jehu, wuod Hanani janen, nonyiso Jehoshafat niya: “Oyud gik moko mabeyo kuomi.”—2 Weche 18:4, 5, 18-22, 33, 34; 19:1-3.

⁹ Ka Jehoshafat nochako locho, nochiko jodongo mage, Jo-Lawi, kod jodolo mondo owuoth e miech Juda duto ka gitimo kampen mar puonjo ji chike Jehova. Kampendno nobedo gi nyak ahinya mi nyaka ogendni ma nolworogi nochako miyo Jehova luor. (2 Weche 17:3-10) Kata obedo ni Jehoshafat notimo tim fuwo, Jehova pod noparo gik mabeyo ma nosetimo. Siganani paronwa ni kata obedo ni warem, Jehova biro nyisowa herane mosiko ka watemo kar nyalowa duto mondo wamore.

10, 11. (a) Ang’o momiyo wanyalo wacho ni lamo en mich ma jaber ahinya ma Jehova omiyowa? (b) Nyasaye nyalo dwoko lamowa e yore mage? (Ne picha manie chak sulani)

¹⁰ Wuoro ma jahera kawoga thuolo mondo ochik ite ne nyithinde seche ma gidwa wuoyo kode. Odwaro ng’eyo gik ma chandogi nikech odewogi ahinya. Jehova Wuonwa manie polo, chikonwaga ite sama wawuoyo kode kokalo kuom lamo, ma en mich maber ahinya ma omiyowa.

¹¹ Wanyalo wuoyo gi Jehova e lamo sa asaya. Ok ogeng’onwa e yo moro amora. En osiepwa moikore winjowa kinde duto. Taylene, ma nowuo kuome motelo, wacho kama: “Inyalo nyise gimoro amora.” Sama wanyiso Nyasaye gik manie chunywa ma iye, onyalo dwokowa kokalo kuom wach moro e Muma, sula moro mondik e gasedewa, kata onyalo tiyo gi Jakristo wadwa mondo ojiwwa. Jehova winjoga kwayowa duto kendo ong’eyo gik ma chandowa maber moloyo ng’ato ang’ata ma wanyalo lerone. Bedo ni odwoko lamowa nyiso ni oherowa gi hera mogundho.

12. Ang’o momiyo onego wanon kwayo mopogore opogore mag jotich Nyasaye ma yudore e Muma? Chiw ane ranyisi

¹² Wanyalo puonjore gik mathoth kuom lamo mondik e Muma. Omiyo, seche moko wanyalo puonjore gik mabeyo kuom nono lamogo sama watimo lamo mar joot. Paro kaka jotich Jehova machon ne nyise weche manie chunygi ma iye nyalo konyowa bero lamo magwa. Kuom ranyisi, inyalo somo lamo ma Jona nogolo kane en ei rech maduong’ ka en gi chuny mar kwayo ng’wono. (Jona 1:17–2:10) Inyalo nono bende kwayo ma Suleman nogolo ne Jehova kowuok e chunye kane iwalo hekalu. (1 Ruo. 8:22-53) Par matut kuom Lamo mar Ruodhwa ma Yesu nopuonjo jolupne. (Mat. 6:9-13) To moloyo, kinde duto ‘nyis Nyasaye kwayoni.’ Ka watimo kamano, ‘kuwe mar Nyasaye ma loyo ng’eyo duto biro rito chunywa kod pachwa.’ Mano biro miyo wamed goyo ne Jehova erokamano kuom herane mosiko.—Fil. 4:6, 7.

13. En thuolo mane makende ma sani nitie nikech mich mar rawar?

¹³ Misango mar rawar ma Yesu nochiwo ne en mich maduong’ “mondo wayud ngima.” (1 Joh. 4:9) Kane jaote Paulo owuoyo e wi hera maduong’ ma Nyasaye nonyisowano, nondiko niya: “Kristo ne otho ne joma richo e kinde  sie ma ne oseket. Nimar tek ahinya mondo ng’ato otho e lo ng’at makare; to samoro ng’ato nyalo yie tho ne ng’at maber. Kata kamano, Nyasaye nyiso hera moherowago kama: ni kane pod wan joricho, Kristo ne othonwa.” (Rumi 5:6-8) Mano e yo maduong’ ma Jehova nonyisogo ni ohero dhano, koyawonegi thuolo mar bedo gi winjruok maber kode.

14, 15. Rawar biro kelo gueth mage ne (a) Jokristo mowal? (b) joma nigi geno mar dak e piny?

¹⁴ Nitie joma nok ma Jehova osenyiso herane mosiko e yo makende. (Joh. 1:12, 13; 3:5-7) Nikech owalgi gi roho maler, gisebedo “nyithind Nyasaye.” (Rumi 8:15, 16) Kane Paulo wuoyo e wi Jokristo mowalgo, nowacho ni ‘ne ochiergi kanyachiel, mi noketgi kanyachiel e polo e winjruok achiel gi Kristo Yesu.’ (Efe. 2:6) Osemigi geno mar yudo ngima mochwere e polo nikech ‘Nyasaye notiyo gi roho maler ma ne osingo mondo oket alama kuomgi. Roho maler en gima nyiso motelo ni gin joma biro yudo pok,’ ma tiende ni, ‘geno mosekannegi e polo.’—Efe. 1:13, 14; Kol. 1:5.

¹⁵ Kuom dhano tara gi tara ma bende oketo yie kuom rawar, oyawnegi thuolo malach mar bedo osiepe Jehova ka gin gi geno mar bedo joma okwano kaka nyithinde ma biro dak nyaka chieng’ e Paradiso mosingnegi e piny. Omiyo, rawar nyiso hera ma Jehova oherogo dhano. (Joh. 3:16) Ka wan gi geno mar dak nyaka chieng’ e piny kendo wadhi nyime tiyo ne Jehova ma ok waweyo, wanyalo bedo gadier ni obiro miyo ngima obednwa maber e piny manyien. Mano kaka en gima owinjore mondo wane rawar kaka yo maduong’ ma Nyasaye nyisogo ni oherowa!

16. Paro matut kuom yore mathoth ma Jehova oherowago konyowa nade?

¹⁶ Ok wanyal kwano yore duto ma Jehova nyisogo ni oherowa. Ruoth Daudi nowero niya: “A Nyasaye, weche miparo bende berna ahinya! Kar rombgi ng’eny ahinya! Ka dakwangi, ging’eny moloyo kuoyo.” (Zab. 139:17, 18) Onego wawe mondo parogo ojiw e chunywa gombo mar hero Jehova e yo matut nikech en bende oherowa kendo odewowa. Kuom mano, watim duto ma wanyalo mondo wamiye gik mabeyo moloyo.

17, 18. Gin yore mage ma wanyisogo ni wahero Nyasaye?

¹⁷ Nitie yore mang’eny ma wanyalo nyisogo ni wahero Jehova. Kuom ranyisi, wanyiso ni wahero Nyasaye gi dhano wetewa kuom lando wach Pinyruoth gi kinda. (Mat. 24:14; 28:19, 20) E wi mano, wanyiso ni wahero Jehova kuom timo sinani sama waromo gi tembe. (Som Zaburi 84:11; Jakobo 1:2-5.) Ka tembe ma waromogo medo bedo mager, wanyalo bedo gadier ni Nyasaye ong’eyo chandruogewago kendo obiro konyowa nimar ogenowa ahinya.—Zab. 56:8.

¹⁸ Hera ma waherogo Jehova miyo waparo matut kuom gik mochueyo kaachiel gi tijene moko madongo. Wanyiso bende ni wahero Nyasaye kendo wageno Wachne ahinya kuom puonjruok Muma adimba. Hero Jehova biro miyo wamed sudo machiegni kode kuom lemo. Kendo hera ma waherego medo gurore ka waparo matut mich mar rawar ma nochiwo ne richowa. (1 Joh. 2:1, 2) Magi gin mana moko kuom gik mathoth ma wan-go ma miyo wahero Jehova nikech en bende oherowa gi hera mosiko.