3 Ng’e Adiera e Wi Yesu

“Nyasaye nohero piny ahinya, omiyo nochiwo Wuode ma miderma, mondo ng’a ma oyie kuome kik lal, to obed gi ngima mochwere.”​—⁠Johana 3:⁠16.

GIMOMIYO MANO NYALO BEDO MATEK. Jomoko nyalo miyo ipar ni Yesu ne ok en ng’ato madier. Jomoko to nyalo yie ni, ne en ng’ato madier, kata kamano, giwacho ni ne en mana dhano adhana ma koro nosetho chon.

ERE KAKA INYALO LOYO PAROGO? Luw ranyisi mar japuonjre Nathanael. * Osiepne ma Filipo nowachone ni noparo ni osenwang’o Mesia—“Yesu ja Nazareth, wuod Josef.” Kata kamano, Nathanael ne ok oyie ayiea gi weche ma Filipo nowachone. Kendo ne odwoke kama: “Gi maber nyalo a Nazareth?” Kata kamano, ne oyie gi gwel ma Filipo ne ogwelego ni mondo ‘odhi one’ en owuon. (Johana 1:⁠43-​51) In bende ibiro bedo mamor nono in iwuon weche mawuoyo ayanga kuom Yesu. En ang’o minyalo timo?

Tim nonro kuom weche machon manyiso ayanga ni Yesu ne en ng’ato madier. Josephus kod Tacitus ne gin josomo ariyo ma ne nigi huma kuom nono weche machon, kendo ne gidak e kinde Jokristo mokwongo, to gin giwegi ne ok gin Jokristo. Giwuoyo kuom Yesu Kristo kaka ng’ato ma ne nitie adier. Kolero kaka Ruoth Nero ma Ja-Rumi ne odonjo ne Jokristo kuom wach mach ma nowang’o Rumi higa 64 E Ndalowa, Tacitus nondiko kama: “Nero nodonjo ne oganda miluongo ni Jokristo, ma gin joma Jo-Rumi ne osin-go nikech kit ngima ma ne giluwo kaka Jokristo, ka osandogi gi sand mager ahinya. Christus [Kristo], ma ne en wuon nyingno, ne oyudo sand mager moloyo e bwo lwet achiel kuom ruodhwa, Pontio Pilato, e kinde ma Tiberio ne locho.”

Buk miluongo ni Encyclopædia Britannica, mar 2002, wuoyo kuom nonro ma josomo notimo kuom Yesu koda kuom Jokristo mokwongo kama: ‘Weche ma ne ondiki gi josomogo nyiso maler ni kata e kinde machon, kata mana jogo ma ne kwedo Jokristo ne oyie ni Yesu ne en ng’ato ma ne nitie adier. Ji ne ochako keto kiawa ka onge gimomiyo e giko mag higini 1700 nyaka e kar chakruok mag higini 1900.’ E higa 2002, weche moko ma ne ondiki e gaset miluongo ni, The Wall Street Journal nowacho kama: ‘Josomo mang’eny, sani koro oseyie ni Yesu Ja-Nazareth ne en ng’ato madier.’

Non ane weche manyiso gadier ni Yesu ne ochier. Kane omak Yesu gi joma ne kwede, jogo ma ne hinyo wuotho kode ahinya ne  oringe, kendo Petro osiepne ne okwede nikech luoro. (Mathayo 26:⁠55, 56, 69-​75) Bang’ kane osemak Yesu, jolupne ne oke. (Mathayo 26:31) Kae to mapiyo nono, ne gichako tiyo tich ma Yesu nomiyogi. Petro gi Johana ne onyiso chir kane gi chung’ e nyim jogo ma ne omiyo oneg Yesu. Jopuonjre Yesu ne oyudo jip ahinya, mi ne gilando puonj mag Yesu e Pinyruodh Rumi duto, ka giyiero tho kar weyo makruok gi yie margi.

Achiel kuom gik ma ne okonyogi timo lokruok maduong’ kamano ne en mane? Jaote Paulo lero ni Yesu ne ochier, mi “nonenore ni Kefa [Petro], eka ni ji apar gariyogo.” Paulo medo wacho kama: “Bang’ mano, nonenore ni owete moloyo piero apar abich chieng’ achiel.” Thoth joma ne oneno chier Yesu pod ne ngima kane Paulo ndiko wechego. (1 Jo Korintho 15:⁠3-7) Joma keto kiawa ne nyalo tamore wach ng’at achiel kata ji ariyo e yo mayot. (Luka 24:⁠1-​11) Kata kamano, wach ji mokalo mia abich ma noneno gi wang’gi gima ne otimore, ne onyiso gadier maonge kiawa ni Yesu ne ochier.

GIN GWETH MAGE MWAYUDO? Jogo moyie kuom Yesu kendo mawinje, ibiro ng’won negi richogi kendo gibiro siko ka gin gi chuny maler. (Mariko 2:⁠5-​12; 1 Timotheo 1:⁠19; 1 Petro 3:⁠16-​22) To kapo ni githo, Yesu singo ni obiro chierogi “chieng’ giko.”—Johana 6:⁠40.

Mondo iyud weche momedore, ne sula mar 4, kama wacho ni “Yesu Kristo En Ng’a?” kod sula mar 5, mawacho ni “Rawar—Mich Maduong’ Ahinya Moa Kuom Nyasaye,” ei bug Ang’o ma Muma Puonjo Kuom Adier? *

[Weche moler piny]

[Picha manie ite mar 7]

Mana kaka Nathanael, tim nonro kuom weche ma wuoyo ayanga e wi Yesu