4 Gol Kiawa Minyalo Bedogo

“Yaye in man gi yie matin, iriwo gi kiawa nang’o?”—Mathayo 14:31.

GIMOMIYO MANO NYALO BEDO MATEK. Kata mana jopuonjre Yesu seche moko ne bedo gi paro mag kiawa. (Mathayo 14:30; Luka 24:⁠36-​39; Johana 20:⁠24, 25) Kuom adier, Muma lero ni bedo ma onge gi yie en kaka “richo ma duodowa.” (Jo Hibrania 12:1) Jaote Paulo nondiko kama: “Ji duto ok gin jo moyie.” (2 Thessalonika 3:⁠2) Mano ok nyis ni jomoko ok nyal nyiso yie. To en mana ni, ji mang’eny ok ti matek mondo gibed gi yie. Nyasaye biro gwedho kinda mar joma bedo gi yie.

ERE KAKA INYALO LOYO PAROGO? Fweny gigo mamiyo ibedo gi kiawa. Kuom ranyisi, japuonjre Thoma ne nigi kiawa kuom chier mar Yesu, kata obedo ni jopuonjre mamoko nowacho ni ne gisenene. Thoma ne dwaro gima nyiso adiera mar wachno ayanga. Ang’o  ma notimore? Yesu nomiye gima nyiso mano mondo omi obed gi yie motegno kuom chier mare.—Johana 20:⁠24-​29.

Kokalo kuom Muma, Jehova Nyasaye chiwonwa weche madwarore e konyowa golo kiawa. Kuom ranyisi, ji mang’eny ok oketo yie kuom Nyasaye nikech giwacho ni en ema omiyo lweny, timbe gero, kod chandruoge mag dhano obedie. Muma to wacho ang’o kuom wachni?

Nyasaye ok lochi kokalo kuom sirkande mag dhano. Yesu noluongo Satan ni, jaloch kata “jaduong’ mar pinyni.” (Johana 14:30) Satan ne dwaro miyo Yesu teko e wi pinjeruodhi duto manie piny mana kuom tim achiel mar lamo, kowachone kama: ‘Teko duto namiyi, gi duong’gi; nikech an nomiya, kendo ng’a ma hero miyo to amiyo.’ Yesu ne ok otamore ni Satan ne nigi tekogo. Kar mano, Yesu nowacho kama: “Nondiki ni, ‘Ruoth Nyasaye ema nilam, to en kende ema nitine.’” (Luka 4:⁠5-8) Satan kaachiel gi sirkande mag dhano ema miyo ji chandore e piny, to ok Nyasaye.—Fweny 12:⁠9, 12.

E kinde makayo machiegni, Jehova Nyasaye biro golo gigo duto makelo chandruok. Osetimo chenro mar bedo gi Pinyruoth, kata sirkal, manie bwo Wuode, Kristo Yesu, obi olochi e wi dhano. (Mathayo 6:⁠9, 10; 1 Jo Korintho 15:⁠20-​28) E chopo weche ma Muma nokoro, wach maber mar Pinyruoth ilando sani e piny mangima. (Mathayo 24:14) E kinde machiegni, Pinyruodhni biro golo jogo duto ma kwede koda gigo makelo chandruoge ne dhano.—Daniel 2:⁠44; Mathayo 25:⁠31-​33, 46; Fweny 21:⁠3, 4.

GIN GWETH MAGE MWAYUDO? Jogo mabedo gi kiawa chalo kaka apaka ma “yamo duto mag puonj tago ataga kendo rundo kuom wuond mar ji.” (Jo Efeso 4:⁠14; 2 Petro 2:1) Mopogore gi mano, jogo ma nwang’o dwoko mag penjo ma gin-go bedo gi nyalo mar ‘chung’ matek kuom yie.’—1 Jo Korintho 16:13.

Jogo gasedni, ma gin Joneno mag Jehova, diher konyi yudo dwoko mag penjo mamiyi bedo gi kiawa. Gigweli mondo iriwri kanyachiel kodgi kendo mondo inon puonjgi in iwuon. Timo kamano biro tego yie mari kuom Nyasaye.

Mondo iyud weche momedore, ne sula mar 8, kama wacho ni “Pinyruodh Nyasaye En Ang’o?” kod sula mar 11, mawacho ni “Ang’o Momiyo Nyasaye Oweyo Chandruok Mondo Obedie?” ei bug Ang’o ma Muma Puonjo Kuom Adier? *

[Weche moler piny]

[Picha manie ite mar 9]

Jogo monwang’o dwoko mag penjo e wi kiawa ma gin-go, bedo gi yie mogurore motegno