Be Pesa e Gima Kelo Mor Madier?

SONIA ne onyuol e piny Spain. Kane pod en nyathi, ne ojadhi gi min mare e chokruoge mag Joneno mag Jehova. Kata kamano, kane obedo ng’at maduong’, ne odar mi odhi London, e piny Ingresa, kendo ne ochako tiyo gi kambi moro maloso pesa kuom loko ohala madongo.

Sonia nohero tije. Ne oloso pesa mang’eny ahinya kendo rito ohala mag kambe madongo mag joma ne gitimogo ohala. Tijno ne more, kendo ne dhine maber ahinya. Sonia pile ne tiyo seche 18 e odiechieng’ achiel kendo seche moko ne onindo mana kuom seche ariyo kata adek kende. Ne oketo ngimane duto kuom tije. Kae to apoya nono, ngimane ne olokore. Tuwo (stroke) ne ogoyo Sonia—nyalo bedo ni, nikech kit ngima modich ahinya ma nodakie. Ne en mana jahigini 30 kende.

Bath Sonia konchiel ne otho, kendo lakteche ne ok ong’eyo ka chieng’ moro ne odhi bedo gi nyalo mar wuoyo kendo. Piyo piyo min mare ne odhi Ingresa mondo orite. Kane Sonia ochako wuotho kendo, min mare ne owachone ni, “An adhi e chokruok mar kanyakla, kendo nyaka ibi koda nikech ok anyal weyi kendi.” Sonia noyie dhi kode. Ang’o ma ne otimore bang’e?

Sonia wacho kama: “Gik moko duto ma ne awinjo ne gin adier chuth. Wechego ne beyo. Omiyo, ne ayie puonjora Muma gi achiel kuom joma ne omosa e odiechieng’ mokwongono ma ne adhi e Od Romo. Osiepena machon ne oweyo biro lima, to osiepena manyien ne onyisa hera kendo ne gidewa.”

Mosmos, Sonia nochako bedo gi nyalo mar wuoyo, kendo ne otimo dongruok mapiyo e puonjruok mare mar Muma. Kapok higa achiel orumo, ne obatise. Thoth osiepene manyien ne gin Jokristo mochiwore kuom thuologi duto e tij Nyasaye, kendo ne onyalo neno mor ma ne gin-go. Sonia noparo e chunye kama: ‘An bende adwaro bedo kaka gin. Adwaro chiwo ne Jehova Nyasaye duto manyalo!’ Sani koro Sonia tiyo gi thuolone duto e tij Nyasaye.

Ang’o ma Sonia osepuonjore kuom gima ne otimorene e ngima? Sonia wacho niya: “Kata obedo ni ne ayudo pesa mang’eny, dich koda parruok ni tijno ne nyalo rumo sa asaya ne miyo abedo gi kibaji kendo ne aonge mor. Koro asefwenyo ni gima duong’ ahinya e ngima en bedo gi winjruok maber gi Wuora manie polo Jehova. Sani koro an gi mor madier.”

Jaote Paulo nondiko kama: “Hero pesa en chakruok mar richo duto; jo moko, kosegombo bedo jomwandu, gisebaro giweyo yie, kendo gisechwowo chunygi gi chandruok mathoth.” (1 Timotheo 6:10) Sonia nyalo dimbo kaka wechego gin adier kuom gima ne otimore e ngimane.