Puonjri Kuom Wach Nyasaye

 Dwaro mar Nyasaye En Ang’o ne Piny?

Sulani oting’o penjo manyalo bedo ni isepenjori, kendo onyiso kama inyalo yudoe dwoko ei Mumbi. Joneno mag Jehova diher nono penjogi kaachiel kodi.

1. Dwaro mar Nyasaye en ang’o ne piny?

Piny en kar dak mosiko mar dhano. Bang’ chweyo malaike mondo odag e polo, Nyasaye nochweyo dhano mondo odag e piny. (Ayub 38:​4, 7) Kuom mano, Jehova noketo dhano mokwongo e paradis majaber ahinya miluongo ni Eden, kendo ne oketo e nyime koda e nyim nyithinde duto, geno mar dak nyaka chieng’ e piny.​​—⁠Chakruok 2:​15-​17; som Zaburi 115:16.

Puodho mar Eden ne en mana kamoro matin e piny. Dichwo gi dhako mokwongo, Adam gi Hawa, ne dhi bedo gi nyithindo. Kaka kwan dhano ne dhi medore e piny, ne dwarore ni girit piny kendo loke paradis. (Chakruok 1:​28) Piny mwadakieni ok bi kethi ngang’.​​—⁠Som Zaburi 104:5.

2. Ang’o momiyo sani piny ok en paradis?

Adam gi Hawa noketho chik Nyasaye, omiyo, ne oriembgi ma gidhi oko mar Eden. Paradis ne olal, kendo onge dhano ma osebedo gi nyalo mar duoke. Muma wacho kama: “Nochiu piny e luet jo maricho.”​​—⁠Ayub 9:​24; som Chakruok 3:​23, 24.

Kata kamano, wi Jehova ok osewil gi dwaro ma ne en-go mokwongo ne dhano, kendo dwarono ok nyal tamo Nyasaye chopo ngang’. (Isaiah 45:18) Obiro duoko dhano mondo odag kaka ne odwaro kar chakruok.​​—⁠Som Zaburi 37:11.

3. Ere kaka Nyasaye biro duoko kuwe e piny?

Mondo mi dhano obed gi kuwe, Nyasaye nyaka kwong gol oko jomaricho. E lweny mar Har–​Magedon, malaike mag Nyasaye biro ketho jogo duto makwedo Nyasaye. Ibiro twe Satan kuom higini 1,000, to jogo mohero Nyasaye biro tony mi gidag e piny manyien gi mor.​​—⁠Som Fweny 16:​14, 16; 20:​1-3; 21:​3, 4.

 4. Chandruok norum karang’o?

E kinde mar higini 1,000, Yesu biro locho e wi piny ka en e polo kendo obiro miyo piny obed paradis. Bende, obiro rucho oko richo mag jogo ma ohero Nyasaye. Gikone, Yesu biro tieko tuoche, bedo moti, koda tho.​​—⁠Som Isaiah 11:9; 25:8; 33:24; 35:1.

Nyasaye biro tieko richo me piny karang’o? Yesu nochiwo “ranyis” ma ne dhi nyiso ka giko chiegni. Gik masani timore e piny kelo hinyruok ne oganda dhano, kendo ginyiso ni wadak e kinde “giko mar ndalo.”​​—⁠Som Mathayo 24:​3, 7-​14, 21, 22; 2 Timotheo 3:​1-5.

5. Gin jomage manodag e paradis mabiro?

Yesu nochiko jolupne mondo otim ji obed jopuonjre, kendo gipuonjgi yore mag hera mar Nyasaye. (Mathayo 28:​19, 20) E piny mangima, Jehova puonjo ji tara mang’eny ka oikogi ne ngima e chenro manyien ma nobedie piny. (Zefania 2:3) E Ute Romo mag Joneno mag Jehova, ji puonjore kaka ginyalo bedo chwo koda wuone mabeyo, gi kaka ginyalo bedo mon mabeyo ne chwogi kod mine mabeyo. Nyithindo koda jonyuol, puonjore kanyachiel kuom kaka ginyalo bedo gi yie motegno kuom ngima mar kinde mabiro.​​—⁠Som Mika 4:​1-4.

E Od Romo mar Joneno mag Jehova, ibiro yudo ji mohero Nyasaye kendo madwaro puonjore timo gik moyiego.​​—⁠Som Jo Hibrania 10:​24, 25.

Mondo iyud weche momedore, ne sula mar 3 mar bugni, Ang’o ma Muma Puonjo Kuom Adier?, mogo gi Joneno mag Jehova.